25.49C Vancouver 25.49C VancouverJul 25, 2022 9:41 PM - The Canadian Press
ਬੀ.ਸੀ. ਦੇ ਲੈਂਗਲੀ ਇਲਾਕੇ ਵਿੱਚ ਮਲਟੀਪਲ ਲੋਕਾਂ ਨੂੰ ਸ਼ੂਟਿੰਗ ਦਾ ਨਿਸ਼ਾਨਾ ਬਣਾਉਣ ਵਾਲੇ ਸ਼ੱਕੀ ਦੀ ਪੁਲਿਸ ਦੀ ਗੋਲੀ ਨਾਲ ਮੌਤ ਹੋ ਗਈ ਹੈ।
ਲੈਂਗਲੀ ਆਰ.ਸੀ.ਐਮ.ਪੀ. ਅਤੇ ਇੰਟੈਗ੍ਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਯਾਨੀ ਕਿ ਆਈ.ਹਿਟ ਨੇ ਮਾਮਲੇ 'ਚ ਦੁਪਹਿਰ ਕਰੀਬ 1 ਵਜੇ ਸਾਂਝੀ ਪ੍ਰੈਸ ਕਾਨਫਰੰਸ ਕੀਤੀ।
ਸਾਰਜੈਂਟ ਡੇਵਿਡ ਲੀ ਨੇ ਦੱਸਿਆ ਕਿ ਵੱਖੋ-ਵੱਖਰੀਆਂ ਥਾਵਾਂ 'ਤੇ ਸਵੇਰ ਦੇ ਸਮੇਂ ਗੋਲੀ ਦੇ ਸ਼ਿਕਾਰ 4 ਪੀੜਤ ਮਿਲੇ ਸਨ।
ਇਸ 'ਚ 2 ਆਦਮੀਆਂ ਦੀ ਮੌਤ ਹੋ ਚੁੱਕੀ ਸੀ।
ਉਨ੍ਹਾਂ ਦੱਸਿਆ ਕਿ ਪੀੜਤਾਂ ਦੀ ਪਛਾਣ ਹੋ ਚੁੱਕੀ ਹੈ ਪਰ ਫਿਲਹਾਲ ਪਛਾਣ ਜਨਤਕ ਨਹੀਂ ਕੀਤੀ ਜਾ ਰਹੀ।
ਇੱਕ ਪੀੜਤ ਦੀ ਲਾਸ਼ ਕਰੀਕਸਟੋਨ ਪਲੇਸ ਅਤੇ ਦੂਜੇ ਦਾ ਮ੍ਰਿਤ ਸ਼ਰੀਰ ਲੋਗਨ ਅਤੇ ਗਲੋਵਰ ਰੋਡਸ ਕੋਲ ਲੈਂਗਲੀ ਸਿਟੀ ਬੱਸ ਲੂਪ ਕੋਲ ਮਿਲਿਆ।
ਇੱਕ ਔਰਤ 203A ਸਟ੍ਰੀਟ ਅਤੇ ਫਰੇਜ਼ਰ ਹਾਈਵੇਅ ਦੇ ਇਲਾਕੇ 'ਚ ਮਿਲੀ ਅਤੇ ਉਸ ਨੂੰ ਨਾਜੁਕ ਹਾਲਤ 'ਚ ਹਸਪਤਾਲ ਪਹੁੰਚਾਇਆ ਗਿਆ।
ਚੌਥੇ ਪੀੜਤ ਨੂੰ ਲੱਤ 'ਚ ਗੋਲੀ ਲੱਗੀ ਸੀ ਅਤੇ ਪੀੜਤ ਲੈਂਗਲੀ ਬਾਈਪਾਸ ਅਤੇ 200 ਸਟ੍ਰੀਟ ਦੇ ਇਲਾਕੇ 'ਚ ਮਿਲਿਆ।
ਚੌਥੇ ਪੀੜਤ ਦੇ ਨੇੜੇ ਹੀ ਪੁਲਿਸ ਨੂੰ ਸ਼ੱਕੀ ਵੀ ਨਜਰ ਆਇਆ।
ਸਾਰਜੈਂਟ ਡੇਵਿਡ ਲੀ ਨੇ ਦੱਸਿਆ ਕਿ ਐਤਵਾਰ ਮੱਧ ਰਾਤ ਦੇ ਕਰੀਬ ਤੋਂ ਸ਼ੂਟਰ ਨੇ ਲੋਕਾਂ ਨੂੰ ਨਿਸ਼ਾਨਾ ਬਣਾਉਣਾ ਸ਼ੁਰੂ ਕੀਤਾ ਸੀ।
ਉਨ੍ਹਾਂ ਦੱਸਿਆ ਕਿ ਪਹਿਲੀ ਵਾਰਦਾਤ ਨੂੰ ਮੱਧ ਰਾਤ ਦੇ ਕਰੀਬ ਪਹਿਲੇ ਵਿਅਕਤੀ ਨੂੰ ਨਿਸ਼ਾਨਾ ਬਣਾਇਆ ਗਿਆ ਅਤੇ ਦੂਜੇ ਨੂੰ ਤੜਕੇ ਕਰੀਬ 3 ਵਜੇ ਨਿਸ਼ਾਨਾ ਬਣਾਇਆ ਗਿਆ।
ਇੱਕ ਔਰਤ ਨੂੰ ਸਵੇਰ ਕਰੀਬ 5 ਵਜੇ ਗੋਲੀ ਮਾਰੀ ਗਈ ਅਤੇ ਫਿਰ ਚੌਥੇ ਪੀੜਤ 'ਤੇ ਸਵੇਰ ਕਰੀਬ 5.30 ਵਜੇ ਗੋਲੀ ਚਲਾਈ ਗਈ।
ਇਸ ਤੋਂ ਬਾਅਦ ਕਰੀਬ ਸਵੇਰ 5.40 ਵਜੇ ਪੁਲਿਸ ਦਾ ਸ਼ੱਕੀ ਨਾਲ ਸਾਹਮਣਾ ਹੋਇਆ।
ਪਹਿਲਾਂ ਪੁਲਿਸ ਨੇ ਦੱਸਿਆ ਸੀ ਕਿ ਸ਼ੱਕੀ ਨੂੰ ਹਿਰਾਸਤ 'ਚ ਲਿਆ ਗਿਆ ਹੈ ਪਰ ਅਪਡੇਟ 'ਚ ਦੱਸਿਆ ਗਿਆ ਕਿ ਸ਼ੱਕੀ 'ਤੇ ਪੁਲਿਸ ਨੇ ਗੋਲੀ ਚਲਾਈ ਸੀ ਅਤੇ ਉਸ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ।
ਮਾਮਲੇ 'ਚ ਇੰਡੀਪੈਂਡੈਂਟ ਇਨਵੈਸਟੀਗੇਸ਼ਨਸ ਆਫਿਸ ਯਾਨੀ ਕਿ ਆਈ.ਆਈ.ਓ. ਨੂੰ ਸੱਦਿਆ ਗਿਆ ਹੈ।
ਸਵੇਰ ਕਰੀਬ 6.20 'ਤੇ ਜਾਰੀ ਕੀਤਾ ਗਿਆ ਸੀ ਪਹਿਲਾ ਐਲਰਟ
ਲੈਂਗਲੀ 'ਚ ਵਾਪਰੀ ਵਾਰਦਾਤ ਤੋਂ ਬਾਅਦ ਪੁਲਿਸ ਅਧਿਕਾਰੀਆਂ ਨੇ ਅੱਜ ਦੁਪਹਿਰ 1 ਵਜੇ ਕੀਤੀ ਪ੍ਰੈਸ ਕਾਨਫਰੰਸ ਦੌਰਾਨ ਦੱਸਿਆ ਹੈ ਕਿ ਬੀ.ਸੀ. ਦੇ ਵਿੱਚ ਕਿਸੇ ਸ਼ੂਟਿੰਗ ਸੰਬੰਧੀ ਵਾਰਦਾਤ 'ਚ ਐਲਰਟ ਭੇਜੇ ਜਾਣ ਦਾ ਇਹ ਸਿਰਫ ਦੂਜਾ ਮੌਕਾ ਹੈ।
ਜਾਣਕਾਰੀ ਦਿੱਤੀ ਗਈ ਕਿ ਇਸ ਤੋਂ ਪਹਿਲਾਂ ਨਵੰਬਰ 2021 'ਚ ਵੈਂਡਰਹੂਫ 'ਚ ਵਾਪਰੀ ਸ਼ੂਟਿੰਗ ਦੀ ਘਟਨਾ 'ਚ ਪਬਲਿਕ ਸੇਫਟੀ ਐਲਰਟ ਭੇਜਿਆ ਗਿਆ ਸੀ।
ਹਾਲ ਦੀ ਘੜੀ ਪੁਲਿਸ ਦਾ ਮੰਨਣਾ ਹੈ ਕਿ ਸ਼ੂਟਿੰਗ ਦੀ ਵਾਰਦਾਤ ਨੂੰ ਇੱਕੋ ਸ਼ੱਕੀ ਨੇ ਇਕੱਲਿਆਂ ਅੰਜਾਮ ਦਿੱਤਾ ਸੀ ਅਤੇ ਘਟਨਾ 'ਚ ਉਸ ਦਾ ਕੋਈ ਸਾਥੀ ਨਹੀਂ ਸੀ।
ਹਾਲਾਂਕਿ ਕਿਸੇ ਹੋਰ ਸਾਥੀ ਸੰਬੰਧੀ ਜਾਂਚ ਜਾਰੀ ਰੱਖੀ ਜਾ ਰਹੀ ਹੈ।
ਅੱਜ ਸਵੇਰ ਦੇ ਸਮੇਂ ਸੈਲਫੋਨਸ 'ਤੇ ਐਮਰਜੈਂਸੀ ਐਲਰਟ ਭੇਜਿਆ ਗਿਆ ਸੀ।
ਸਵੇਰ ਕਰੀਬ 6.30 ਵਜੇ ਪਹਿਲਾ ਐਮਰਜੈਂਸੀ ਐਲਰਟ ਭੇਜਿਆ ਗਿਆ ਸੀ ਅਤੇ ਇਸ 'ਚ ਸ਼ੂਟਿੰਗ ਬਾਰੇ ਦੱਸਣ ਤੋਂ ਇਲਾਵਾ ਇੱਕ ਸ਼ੱਕੀ ਨਾਲ ਕਿਸੇ ਪ੍ਰਕਾਰ ਦੀ ਇੰਟਰੈਕਸ਼ਨ ਦੀ ਜਾਣਕਾਰੀ ਦਿੱਤੀ ਗਈ ਸੀ।
ਇਸ ਤੋਂ ਬਾਅਦ ਦੂਜਾ ਐਲਰਟ ਸਵੇਰ ਕਰੀਬ 7.30 ਵਜੇ ਭੇਜਿਆ ਗਿਆ ਸੀ ਅਤੇ ਦੱਸਿਆ ਗਿਆ ਕਿ ਮਾਮਲੇ 'ਚ ਸ਼ਾਮਿਲ ਸ਼ੱਕੀ ਨੂੰ ਹੁਣ ਖਤਰਾ ਨਹੀਂ ਮੰਨਿਆ ਜਾ ਰਿਹਾ।
ਅਧਿਕਾਰੀਆਂ ਨੇ ਦੱਸਿਆ ਕਿ ਪਬਲਿਕ ਸੇਫਟੀ ਐਲਰਟ ਇਸੇ ਕਾਰਨ ਭੇਜਿਆ ਗਿਆ ਕਿ ਘਟਨਾ ਇਸ ਐਲਰਟ ਸੰਬੰਧੀ ਪੈਮਾਨੇ 'ਤੇ ਪੂਰੀ ਉੱਤਰਦੀ ਸੀ ਅਤੇ ਲੋਕਾਂ ਨੂੰ ਸਾਵਧਾਨ ਕਰਨਾ ਜਰੂਰੀ ਸੀ।
