ਪੀਐੱਮ ਮੋਦੀ ਵੱਲੋਂ 80 ਕਰੋੜ ਲੋਕਾਂ ਨੂੰ ਦੀਵਾਲੀ ਤੱਕ ਮੁਫ਼ਤ ਅਨਾਜ ਦੇਣ ਦਾ ਐਲਾਨ

ਅੱਜ ਸੋਮਵਾਰ ਨੂੰ ਪ੍ਰਧਾਨ ਮੰਤਰੀ ਨੇ ਐਲਾਨ ਕੀਤਾ ਕਿ ਕੇਂਦਰ ਸਰਕਾਰ ਨੇ ਪ੍ਰਧਾਨ ਮੰਤਰੀ ਗਰੀਬ ਕਲਿਆਣ ਯੋਜਨਾ ਨੂੰ ਇਸ ਸਾਲ ਦੀਵਾਲੀ ਤੱਕ ਵਧਾਉਣ ਦਾ ਫ਼ੈਸਲਾ ਕੀਤਾ ਹੈ।

ਪੀਐੱਮ ਮੋਦੀ ਨੇ ਅੱਜ ਕੌਮ ਨੂੰ ਆਪਣੇ ਸੰਬੋਧਨ ਦੌਰਾਨ ਆਖਿਆ,"ਬੀਤੇ ਸਾਲ ਕੋਵਿਡ-19 ਦੌਰਾਨ ਕੀਤੀ ਗਈ ਤਾਲਾਬੰਦੀ ਦੌਰਾਨ ਮੁਫ਼ਤ ਅਨਾਜ ਵਾਲੀ ਯੋਜਨਾ ਹੁਣ ਦੀਵਾਲੀ ਤੱਕ ਚੱਲੇਗੀ, ਜਿਸਦੇ ਤਹਿਤ ਮੁਲਕ ਵਿੱਚ 80 ਕਰੋੜ ਤੋਂ ਵੀ ਵੱਧ ਲੋਕਾਂ ਨੂੰ ਲਾਭ ਹੋਵੇਗਾ। ਇਸ ਮਹਾਮਾਰੀ ਦੌਰਾਨ, ਸਰਕਾਰ ਗ਼ਰੀਬਾਂ ਦੇ ਨਾਲ ਹੈ। 80 ਕਰੋੜ ਤੋਂ ਵੀ ਵੱਧ ਵੱਸੋਂ ਨੂੰ ਹੁਣ ਨਵੰਬਰ ਮਹੀਨੇ ਤੱਕ ਰਾਸ਼ਨ ਮਿਲੇਗਾ| ਕੋਈ ਵੀ ਭੁੱਖਾ ਨਹੀਂ ਸੌਂਵੇਗਾ।"

"ਬੀਤੇ ਸਾਲ, ਜਦੋਂ ਸਾਨੂੰ ਕੋਵਿਡ-19 ਕਰਕੇ ਤਾਲਾਬੰਦੀ ਕਰਨੀ ਪਾਈ ਸੀ, ਤਾਂ ਪੀਐੱਮ ਗਰੀਬ ਕਲਿਆਣ ਯੋਜਨਾ ਤੇ ਤਹਿਤ, ਮੁਲਕ ਦੇ 80 ਕਰੋੜ ਨਾਗਰਿਕਾਂ ਨੂੰ ਅੱਠ ਮਹੀਨਿਆਂ ਵਿੱਚ ਮੁਫ਼ਤ ਰਾਸ਼ਨ ਦੇਣ ਦੀ ਯੋਜਨਾ ਬਣਾਈ ਗਈ ਸੀ। ਇਸ ਸਾਲ ਵੀ, ਦੂਜੀ ਲਹਿਰ ਕਰਕੇ ਇਹ ਯੋਜਨਾ ਮਈ ਅਤੇ ਜੂਨ ਲਈ ਬਣਾਈ ਗਈ ਸੀ," ਪ੍ਰਧਾਨ ਮੰਤਰੀ ਨੇ ਕਿਹਾ।
ਪ੍ਰਧਾਨ ਮੰਤਰੀ ਨੇ ਮੁਲਕ ਵਿੱਚ ਕੇਂਦਰੀ ਵੈਕਸੀਨ ਮੁਹਿੰਮ ਦਾ ਕੇਂਦਰੀਕਰਨ ਵੀ ਐਲਾਨਿਆ, ਜਿਸ ਮੁਤਾਬਕ ਕੋਵਿਡ-19 ਵੈਕਸੀਨਸ ਨੂੰ ਕੇਂਦਰ ਸਰਕਾਰ ਵੱਲੋਂ ਖ਼ਰੀਦ ਕੇ ਸੂਬਿਆਂ ਨੂੰ ਮੁਫ਼ਤ ਵੰਡਿਆ ਜਾਵੇਗਾ।

ਉਹਨਾਂ ਆਖਿਆ,"ਸੂਬਿਆਂ ਦਾ ਟੀਕਾਕਰਨ ਦਾ 25 ਫ਼ੀਸਦ ਕੰਮ ਹੁਣ ਕੇਂਦਰ ਵੱਲੋਂ ਵੇਖਿਆ ਜਾਵੇਗਾ, ਇਹ ਅਗਲੇ ਦੋ ਹਫ਼ਤਿਆਂ ਵਿੱਚ ਲਾਗੂ ਕੀਤਾ ਜਾਵੇਗਾ। ਆਉਣ ਵਾਲੇ ਦੋ ਹਫ਼ਤਿਆਂ ਵਿੱਚ ਸੂਬਿਆਂ ਅਤੇ ਕੇਂਦਰ ਨੂੰ ਇਸ 'ਤੇ ਕੰਮ ਕਰਨ ਲਈ ਨਵੀਆਂ ਹਦਾਇਤਾਂ ਦੀ ਪਾਲਣਾ ਕਰਨੀ ਪਵੇਗੀ। 21 ਜੂਨ ਤੋਂ 18 ਸਾਲਾਂ ਤੋਂ ਵੱਧ ਉਮਰ ਦੇ ਲੋਕਾਂ ਲਈ ਵੈਕਸੀਨ ਮੁਫ਼ਤ ਮੁਹਈਆ ਕਰਾਈ ਜਾਵੇਗੀ।"

ਪੀਐੱਮ ਮੋਦੀ ਨੇ ਕਿਹਾ ਕਿ ਲੋਕਾਂ ਨੂੰ 'ਅਦ੍ਰਿਸ਼', 'ਰੂਪ ਬਦਲਣ ਵਾਲੇ' ਕੋਰੋਨਾਵਾਇਰਸ ਵਰਗੇ ਦੁਸ਼ਮਣ ਨੂੰ ਹਰਾਉਣ ਲਈ ਪ੍ਰੋਟੋਕੋਲ ਦੀ ਪਾਲਣਾ ਕਰਨੀ ਪਵੇਗੀ।

ਭਾਰਤੀ ਟੀਕਾਕਰਨ ਕਵਰੇਜ 'ਤੇ ਬੋਲਦਿਆਂ ਉਨ੍ਹਾਂ ਆਖਿਆ:"ਜੇ ਤੁਸੀਂ ਬੀਤੇ 50-60 ਸਾਲਾਂ ਦਾ ਇਤਿਹਾਸ ਵੇਖੋ, ਤਾਂ ਤੁਸੀਂ ਵੇਖੋਗੇ ਕਿ ਭਾਰਤ ਨੂੰ ਵਿਦੇਸ਼ਾਂ ਤੋਂ ਮਦਦ ਮਿਲਣ ਵਿੱਚ ਕਈ ਦਹਾਕੇ ਲੱਗ ਜਾਂਦੇ ਸਨ। ਜਦੋਂ ਵਿਦੇਸ਼ਾਂ ਵਿੱਚ ਟੀਕਾਕਰਨ ਦਾ ਕੰਮ ਖ਼ਤਮ ਹੋ ਚੁੱਕਾ ਸੀ, ਤਾਂ ਵੀ ਸਾਡੇ ਮੁਲਕ ਵਿੱਚ ਟੀਕਾਕਰਨ ਸ਼ੁਰੂ ਤੱਕ ਨਹੀਂ ਸੀ ਹੁੰਦਾ। 2014 ਵਿੱਚ, ਭਾਰਤ ਦੀ ਟੀਕਾਕਰਨ ਦਰ 60 ਫ਼ੀਸਦ ਸੀ। ਸਾਡੇ ਮੁਤਾਬਕ ਇਹ ਚਿੰਤਾ ਦਾ ਮੁੱਦਾ ਸੀ।"

ਉਨ੍ਹਾਂ ਅੱਗੇ ਆਖਿਆ,"ਜਿਸ ਰਫ਼ਤਾਰ ਨਾਲ ਭਾਰਤ ਵਿੱਚ ਟੀਕਾਕਰਨ ਪ੍ਰੋਗਰਾਮ ਦਾ ਵਿਕਾਸ ਹੋਇਆ ਹੈ, ਉਸ ਹਿਸਾਬ ਨਾਲ ਤਾਂ ਇਸਨੂੰ ਟੀਕਾਕਰਨ ਦਾ ਟੀਚਾ ਪੂਰਾ ਕਰਨ ਲਈ 40 ਹੋਰ ਸਾਲ ਲੱਗ ਜਾਣੇ ਸਨ।"

ਉਹਨਾਂ ਕੋਵਿਡ-19 ਵੈਕਸੀਨਸ ਨੂੰ ਵਿਦੇਸ਼ਾਂ ਤੋਂ ਖ਼ਰੀਦਣ ਦੀ ਪ੍ਰਕਿਰਿਆ ਨੂੰ ਹੋਰ ਤੇਜ਼ ਕਰਨ ਅਤੇ ਬੱਚਿਆਂ ਲਈ ਦੋ ਵੈਕਸੀਨਾਂ ਦੇ ਟਰਾਇਲ ਚੱਲਣ ਬਾਰੇ ਵੀ ਐਲਾਨ ਕੀਤਾ।

ਪ੍ਰਧਾਨ ਮੰਤਰੀ ਨੇ ਇਹ ਜਾਣਕਾਰੀ ਵੀ ਦਿੱਤੀ ਕਿ ਮੁਲਕ ਵਿੱਚ ਨੱਕ ਰਾਹੀਂ ਕੋਵਿਡ ਵੈਕਸੀਨ ਦੇਣ 'ਤੇ ਵੀ ਖੋਜ ਚੱਲ ਰਹੀ ਹੈ।