14.34C Vancouver 14.34C VancouverDec 10, 2024 4:43 PM - The Canadian Press
ਕੈਨੇਡੀਅਨਾਂ ਨੂੰ ਜੀ. ਐੱਸ. ਟੀ. ਛੋਟ ਦੇਣ ਵਰਗੇ ਰਾਜਨਤੀਕ ਖ਼ਰਚ ਉਪਾਵਾਂ ਨੂੰ ਲੈ ਕੇ ਪ੍ਰਧਾਨ ਮੰਤਰੀ ਦਫ਼ਤਰ ਅਤੇ ਵਿੱਤ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਦੇ ਦਫ਼ਤਰ ਵਿਚਕਾਰ ਤਲਖੀ ਪੈਦਾ ਹੋਣ ਦੀਆਂ ਖ਼ਬਰਾਂ ਹਨ। ਸੂਤਰਾਂ ਦੀ ਮੰਨੀਏ ਤਾਂ ਵਿੱਤ ਵਿਭਾਗ ਨੇ $6.28-ਬਿਲੀਅਨ ਦੇ ਰਾਹਤ ਪੈਕੇਜ ਨੂੰ ਵਿੱਤੀ ਤੌਰ ’ਤੇ ਨਾਸਮਝੀ ਵਾਲਾ ਕਦਮ ਕਰਾਰ ਦਿੱਤਾ ਹੈ।
ਸੂਤਰਾਂ ਦਾ ਕਹਿਣਾ ਹੈ ਕਿ ਖਿਡੌਣਿਆਂ, ਵੀਡੀਓ ਗੇਮਜ਼, ਕ੍ਰਿਸਮਸ ਟਰੀਜ਼ ਅਤੇ ਰੈਸਟੋਰੈਂਟ ਦਾ ਭੋਜਨ ਤੇ ਸ਼ਰਾਬ ਵਰਗੀਆਂ ਚੀਜ਼ਾਂ ’ਤੇ ਜੀ.ਐੱਸ.ਟੀ. ਛੋਟ ਦਾ ਵਿਚਾਰ ਪ੍ਰਧਾਨ ਮੰਤਰੀ ਦਫ਼ਤਰ ਵਲੋਂ ਹੀ ਲਿਆਂਦਾ ਗਿਆ ਸੀ, $150,000 ਤੱਕ ਦੀ ਇਨਕਮ ਵਾਲੇ ਲੋਕਾਂ ਨੂੰ $250 ਦੇ ਚੈੱਕ ਭੇਜਣ ਦਾ ਵਿਚਾਰ ਵੀ ਪ੍ਰਧਾਨ ਮੰਤਰੀ ਦਫ਼ਤਰ ਦਾ ਹੀ ਸੀ।
ਵਿੱਤ ਵਿਭਾਗ ਨੇ ਚਿੰਤਾ ਜਤਾਈ ਕਿ ਇਸ ਕਦਮ ਨਾਲ ਮੰਤਰੀ ਵਲੋਂ ਬਜਟ ਘਾਟੇ ਨੂੰ $40.1 ਬਿਲੀਅਨ ਤੱਕ ਰੱਖਣ ਦਾ ਟੀਚਾ ਖੁੰਝ ਸਕਦਾ ਹੈ। ਹਾਲਾਂਕਿ, $250 ਦੇ ਚੈੱਕ ਭੇਜਣ ਦਾ ਪਲੈਨ ਵਿਚਾਲੇ ਹੀ ਲਟਕ ਗਿਆ ਹੈ ਕਿਉਂਕਿ ਵਿਰੋਧੀ ਧਿਰਾਂ ਨੇ ਇਸ ਨੂੰ ਪਾਸ ਕਰਨ ਲਈ ਰਿਟਾਇਰਡ ਬਜ਼ੁਰਗਾਂ ਨੂੰ ਵੀ ਸ਼ਾਮਲ ਕਰਨ ਦੀ ਮੰਗ ਕੀਤੀ ਹੈ।
ਰਿਪੋਰਟ ਵਿਚ ਲਿਬਰਲ ਪਾਰਟੀ ਦੇ ਸੀਨੀਅਰਾਂ ਦੇ ਹਵਾਲੇ ਨਾਲ ਖ਼ਰਚ ਨੂੰ ਲੈ ਕੇ ਪੀ. ਐੱਮ. ਓ. ਅਤੇ ਫ੍ਰੀਲੈਂਡ ਦੇ ਦਫ਼ਤਰ ਵਿਚਕਾਰ ਤਣਾਅ ਹੋਣ ਦੀ ਪੁਸ਼ਟੀ ਕੀਤੀ ਗਈ ਹੈ।
