ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਦੋ ਦਿਨ ਦੇ ਭਾਰਤ ਦੌਰੇ ’ਤੇ

ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ ਦੋ ਦਿਨ ਦੇ ਭਾਰਤ ਦੌਰੇ ’ਤੇ ਹਨ। ਉਨ੍ਹਾਂ ਦੀ ਯਾਤਰਾ ਦੀ ਸ਼ੁਰੂਆਤ ਰਾਜਸਥਾਨ ਦੇ ਜੈਪੁਰ ਤੋਂ ਹੋਈ ਹੈ। ਉਹ ਪੈਰਿਸ ਤੋਂ ਸਿੱਧੇ ਜੈਪੁਰ ਪਹੁੰਚੇ ਜਿੱਥੇ ਆਮੇਰ ਕਿਲ੍ਹੇ ਵਿਚ ਉਨ੍ਹਾਂ ਦਾ ਰਾਜਸਥਾਨੀ ਤੌਰ-ਤਰੀਕਿਆਂ ਨਾਲ ਸਵਾਗਤ ਕੀਤਾ ਗਿਆ।

ਰਾਸ਼ਟਰਪਤੀ ਮੈਕਰੋਨ ਭਲਕੇ ਗਣਤੰਤਰ ਦਿਵਸ ਪਰੇਡ ਵਿਚ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਣ ਲਈ ਭਾਰਤ ਪਹੁੰਚੇ ਹਨ। ਪ੍ਰਧਾਨ ਮੰਤਰੀ ਮੋਦੀ ਅਤੇ ਮੈਕਰੋਨ ਨੇ ਅੱਜ ਜੈਪੁਰ ਵਿਚ ਮਹਾਰਾਜਾ ਸਵਾਈ ਜੈ ਸਿੰਘ ਵਲੋਂ ਸਥਾਪਤ ਜੰਤਰ ਮੰਤਰ ਦਾ ਦੌਰਾ ਵੀ ਕੀਤਾ। ਇਥੋਂ ਉਨ੍ਹਾਂ ਦਾ ਰੋਡ ਸ਼ੌਅ ਦਾ ਵੀ ਪ੍ਰੋਗਰਾਮ ਸੀ।

ਦੱਸ ਦੇਈਏ ਕਿ ਜੈਪੁਰ ਦੇ ਜੰਤਰ-ਮੰਤਰ ਨੂੰ ਜੁਲਾਈ 2010 ਵਿਚ ਯੂ.ਐੱਨ.ਈ.ਐੱਸ.ਸੀ.ਓ. ਵਲੋਂ ਵਿਸ਼ਵ ਵਿਰਾਸਤ ਸਾਈਟ ਘੋਸ਼ਿਤ ਕੀਤਾ ਗਿਆ ਸੀ। ਗੁਲਾਬੀ ਸ਼ਹਿਰ ਆਖੇ ਜਾਣ ਵਾਲੇ ਜੈਪੁਰ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੇ ਫਰਾਂਸ ਦੇ ਰਾਸ਼ਟਰਪਤੀ ਮੈਕਰੋਨ ਦੇ ਪੋਸਟਰਾਂ ਨਾਲ ਸਜਾਇਆ ਗਿਆ ਸੀ।

ਦੱਸ ਦੇਈਏ ਕਿ ਫਰਾਂਸ ਦੇ ਹਥਿਆਰਬੰਦ ਬਲਾਂ ਦੀ ਟੁਕੜੀ ਗਣਤੰਤਰ ਦਿਵਸ ਪਰੇਡ ਵਿਚ ਭਾਰਤੀ ਸੈਨਿਕਾਂ ਅਤੇ ਫਰੈਂਚ ਏਅਰ ਐਂਡ ਸਪੇਸ ਫੋਰਸ ਦੇ ਦੋ ਲੜਾਕੂ ਜਹਾਜ਼ਾਂ ਨਾਲ ਫਲਾਈਪਾਸਟ ਅਤੇ ਮਾਰਚ ਵਿਚ ਹਿੱਸਾ ਲੈ ਰਹੀ ਹੈ।