ਰੂਸ 'ਤੇ ਵਧ ਰਹੇ ਦਬਾਅ ਬਾਰੇ ਚਰਚਾ ਕਰਨ ਲਈ ਜੀ-7 ਵਿੱਤ ਮੰਤਰੀਆਂ ਨੇ ਕੀਤੀ ਮੀਟਿੰਗ

ਕੈਨੇਡਾ ਨੇ ਸ਼ੁੱਕਰਵਾਰ ਨੂੰ ਜੀ-7 ਫਾਈਨਾਂਸ ਮਨਿਸਟਰ ਦੀ ਵਰਚੁਅਲ ਮੀਟਿੰਗ ਹੋਸਟ ਕੀਤੀ, ਜਿਸ ਵਿਚ ਰੂਸ 'ਤੇ ਦਬਾਅ ਵਧਾਉਣ ਲਈ ਅੱਗੇ ਦੇ ਕਦਮਾਂ ਬਾਰੇ ਚਰਚਾ ਹੋਈ ਹੈ। ਫਾਈਨਾਂਸ ਮਨਿਸਟਰ ਅਤੇ ਰਾਸ਼ਟਰੀ ਮਾਲੀਆ ਦੇ ਪ੍ਰੈਸ ਸਕੱਤਰ ਜੌਨ ਫ੍ਰੈਗੋਸ ਦਾ ਕਹਿਣਾ ਹੈ ਕਿ ਗਰੁੱਪ ਨੇ ਰੂਸ ਦੀ ਯੁੱਧ ਮਸ਼ੀਨਰੀ ਨੂੰ ਸੀਮਤ ਕਰਨ ਦੇ ਤਰੀਕਿਆਂ ਬਾਰੇ ਵੀ ਗੱਲ ਕੀਤੀ ਹੈ।

ਉਨ੍ਹਾਂ ਕਿਹਾ ਕਿ ਜੀ-7 ਯੂਕਰੇਨ ਖਿਲਾਫ਼ ਰੂਸ ਦੇ ਗੈਰ-ਕਾਨੂੰਨੀ ਅਤੇ ਗੈਰ-ਵਾਜਬ ਯੁੱਧ ਦੇ ਵਿਰੋਧ ਵਿਚ ਇੱਕਜੁੱਟ ਹੈ।ਫ੍ਰੈਗੋਸ ਨੇ ਕਿਹਾ ਕਿ ਬੁੱਧਵਾਰ ਨੂੰ ਪੋਲੈਂਡ ਦੇ ਹਵਾਈ ਖੇਤਰ ਵਿਚ ਰੂਸੀ ਡਰੋਨ ਦੀ ਘੁਸਪੈਠ ਤੋਂ ਬਾਅਦ ਕੈਨੇਡਾ ਰੂਸ ਵਲੋਂ ਸੰਘਰਸ਼ ਨੂੰ ਵਧਾਉਣ ਲੈ ਕੇ ਬਹੁਤ ਚਿੰਤਤ ਹੈ। ਗੌਰਤਲਬ ਹੈ ਕਿ ਜੀ-7 ਗਰੁੱਪ ਵਿਚ ਕੈਨੇਡਾ, ਅਮਰੀਕਾ, ਫਰਾਂਸ, ਜਰਮਨੀ, ਇਟਲੀ, ਜਾਪਾਨ ਅਤੇ ਯੂ. ਕੇ. ਸ਼ਾਮਲ ਹਨ, ਗਰੁੱਪ ਦੀਆਂ ਬੈਠਕਾਂ ਵਿਚ ਯੂਰਪੀਅਨ ਯੂਨੀਅਨ ਵੀ ਇੱਕ ਗੈਰ-ਗਿਣਤੀ ਮੈਂਬਰ ਵਜੋਂ ਹਿੱਸਾ ਲੈਂਦਾ ਹੈ।

ਇਸ ਮਹੀਨੇ ਦੇ ਸ਼ੁਰੂ ਵਿਚ ਜਦੋਂ ਪੁਤਿਨ ਨੇ ਯੂਕਰੇਨ ਵਿਚ ਭਵਿੱਖ ਵਿਚ ਵਿਦੇਸ਼ੀ ਸੈਨਿਕਾਂ ਦੀ ਤਾਇਨਤੀ 'ਤੇ ਉਨ੍ਹਾਂ ਨੂੰ ਟਾਰਗੇਟ ਕਰਨ ਦੀ ਧਮਕੀ ਦਿੱਤੀ ਸੀ ਤਾਂ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਕਿਹਾ ਸੀ ਕਿ ਕੈਨੇਡਾ ਅਤੇ ਸਹਿਯੋਗੀਆਂ ਨੂੰ ਮਾਸਕੋ 'ਤੇ ਵੱਧ ਤੋਂ ਵੱਧ ਦਬਾਅ ਪਾਉਣ ਦੀ ਜ਼ਰੂਰਤ ਹੈ।