ਜਰਮਨੀ ਦੇ ਕਿਸਾਨਾਂ ਨੇ ਬਰਲਿਨ ਦੀਆਂ ਸੜਕਾਂ ਨੂੰ ਹਜ਼ਾਰਾਂ ਟਰੈਕਟਰਾਂ ਨਾਲ ਕੀਤਾ ਜਾਮ

ਜਰਮਨੀ ਦੇ ਕਿਸਾਨਾਂ ਨੇ ਸੋਮਵਾਰ ਨੂੰ ਬਰਲਿਨ ਦੀਆਂ ਸੜਕਾਂ ਨੂੰ ਹਜ਼ਾਰਾਂ ਟਰੈਕਟਰਾਂ ਨਾਲ ਜਾਮ ਕਰ ਦਿੱਤਾ। ਕਿਸਾਨ ਸਰਕਾਰ ਵਲੋਂ ਖੇਤੀ ਬਾਲਣ ਸਬਸਿਡੀ ਵਿਚ ਕਟੌਤੀ ਦੇ ਵਿਰੋਧ ਵਿਚ ਸੜਕਾਂ ’ਤੇ ਹਨ।

ਕਿਸਾਨ ਯੂਨੀਅਨ ਦੇ ਪ੍ਰਧਾਨ ਜੋਚਿਮ ਰੁਕਵਿਡ ਨੇ ਬਰਲਿਨ ਵਿਚ ਬਰੈਂਡਨਬਰਗ ਗੇਟ ’ਤੇ ਕਿਸਾਨਾਂ ਨੂੰ ਸੰਬੋਧਨ ਵਿਚ ਕਿਹਾ ਕਿ ਸਰਕਾਰ ਬਾਲਣ ਸਬਸਿਡੀਆਂ ਵਿਚ ਕਟੌਤੀ ਦੀਆਂ ਆਪਣੀ ਯੋਜਨਾਵਾਂ ਤੋਂ ਪੈਰ ਪਿਛਾਂਹ ਖਿੱਚੇ, ਉਨ੍ਹਾਂ ਕਿਹਾ ਕਿ ਇਹ ਅਜਿਹਾ ਕਦਮ ਹੈ ਜਿਸ ਨਾਲ ਕਈ ਕਿਸਾਨ ਦਿਵਾਲੀਆ ਹੋ ਜਾਣਗੇ।

ਕਿਸਾਨ ਯੂਨੀਅਨ ਦੇ ਪ੍ਰਧਾਨ ਨੇ ਕਿਹਾ ਕਿ ਸਰਕਾਰ ਇਹ ਨਾ ਭੁੱਲੇ ਕਿ ਕਿਸਾਨ ਜਰਮਨੀ ਦਾ ਮਹੱਤਵਪੂਰਨ ਹਿੱਸਾ ਹਨ। ਬਾਲਣ ਸਬਸਿਡੀ ਵਿਚ ਕਟੌਤੀ ਦਾ ਫੈਸਲਾ ਲੈਣ ਵਾਲੇ ਵਿੱਤ ਮੰਤਰੀ ਕ੍ਰਿਸ਼ਚੀਅਨ ਲਿੰਡਨਰ ਨੇ ਮੰਨਿਆ ਕਿ ਡੀਜ਼ਲ ਸਬਸਿਡੀ ਨੂੰ ਲੈ ਕੇ ਕਿਸਾਨਾਂ ਵਿਚ ਗੁੱਸਾ ਵਧਿਆ ਹੈ, ਉਨ੍ਹਾਂ ਕਿਹਾ ਕਿ ਪਰ ਹੁਣ ਸਮਾਂ ਆ ਗਿਆ ਹੈ ਕਿ ਨਵੇਂ ਸਿਰੇ ਤੋਂ ਗੱਲਬਾਤ ਕੀਤੀ ਜਾਵੇ।

ਕਿਸਾਨਾਂ ਦੇ ਨੁਮਾਇੰਦਿਆਂ ਨੇ ਤਿੰਨੋਂ ਸ਼ਾਸਕ ਪਾਰਟੀਆਂ ਦੇ ਲੀਡਰਸ ਨਾਲ ਮੁਲਾਕਾਤ ਕੀਤੀ ਹੈ ਜਿਨ੍ਹਾਂ ਨੇ ਉਨ੍ਹਾਂ ਨੂੰ ਮੁਸ਼ਕਲਾਂ ਦਾ ਹੱਲ ਕਰਨ ਦਾ ਭਰੋਸਾ ਦਿੱਤਾ ਪਰ ਡੀਜ਼ਲ ਸਬਸਿਡੀ ਨੂੰ ਲੈ ਕੇ ਫਿਲਹਾਲ ਕੋਈ ਸਹਿਮਤੀ ਨਹੀਂ ਬਣੀ ਹੈ।