ਜਰਮਨੀ ਨੇ ਨਾਗਰਿਕਤਾ ਦੇ ਨਿਯਮਾਂ ਨੂੰ ਕੀਤਾ ਸੌਖਾ, ਦੋਹਰੇ ਪਾਸਪੋਰਟਾਂ 'ਤੇ ਘਟਾਈਆਂ ਪਾਬੰਦੀਆਂ

ਜਰਮਨੀ ਦੀ ਸੰਸਦ ਨੇ ਦੋਹਰੀ ਨਾਗਰਿਕਤਾ ’ਤੇ ਪਾਬੰਦੀਆਂ ਨੂੰ ਖਤਮ ਕਰਦੇ ਹੋਏ ਨਾਗਰਿਕਤਾ ਪ੍ਰਾਪਤ ਕਰਨ ਲਈ ਨਿਯਮਾਂ ਨੂੰ ਸੌਖਾ ਕਰਨ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ।

ਸਰਕਾਰ ਦਾ ਕਹਿਣਾ ਹੈ ਕਿ ਇਸ ਕਦਮ ਨਾਲ ਹੁਨਰਮੰਦ ਕਾਮਿਆਂ ਨੂੰ ਆਕਰਸ਼ਿਤ ਕਰਨ ਵਿਚ ਮਦਦ ਮਿਲੇਗੀ। ਉਥੇ ਹੀ, ਮੁੱਖ ਵਿਰੋਧੀ ਧਿਰ ਨੇ ਇਸ ਦੀ ਆਲੋਚਨਾ ਕਰਦੇ ਹੋਏ ਸਰਕਾਰ ’ਤੇ ਜਰਮਨੀ ਨਾਗਰਿਕਤਾ ਸਸਤੇ ਵਿਚ ਵੰਡਣ ਦੇ ਆਰੋਪ ਲਗਾਏ ਹਨ।

ਨਵੇਂ ਕਾਨੂੰਨ ਤਹਿਤ ਲੋਕ ਜਰਮਨੀ ਵਿਚ ਪੰਜ ਸਾਲਾਂ ਬਾਅਦ ਨਾਗਰਿਕਤਾ ਲਈ ਯੋਗ ਹੋਣਗੇ ਅਤੇ ਵਿਸ਼ੇਸ਼ ਕੇਸ ਵਿਚ ਤਿੰਨ ਸਾਲਾਂ ਬਾਅਦ ਨਾਗਰਿਕਤਾ ਲਈ ਜਾ ਸਕੇਗੀ।

ਮੌਜੂਦਾ ਸਮੇਂ ਇਸ ਵਿਚ 6 ਤੋਂ 8 ਸਾਲਾਂ ਦਾ ਸਮਾਂ ਲੱਗਦਾ ਹੈ। ਉਥੇ ਹੀ, ਜੇ ਕਿਸੇ ਮਾਤਾ ਜਾਂ ਪਿਤਾ ਵਿਚੋਂ ਕੋਈ ਪਿਛਲੇ ਪੰਜ ਸਾਲ ਤੋਂ ਕਾਨੂੰਨੀ ਤੌਰ ਤੇ ਨਿਵਾਸੀ ਹੈ ਤਾਂ ਉਨ੍ਹਾਂ ਦੇ ਜਰਮਨੀ ਵਿਚ ਜਨਮੇ ਬੱਚੇ ਨੂੰ ਆਪਣੇ ਆਪ ਨਾਗਰਿਕਤਾ ਦਾ ਦਰਜਾ ਮਿਲ ਜਾਵੇਗਾ, ਪਹਿਲਾਂ ਮਾਂ ਜਾਂ ਪਿਓ ਲਈ 8 ਸਾਲ ਕਾਨੂੰਨੀ ਤੌਰ ’ਤੇ ਨਿਵਾਸੀ ਹੋਣਾ ਜ਼ਰੂਰੀ ਸੀ। ਦੋਹਰੀ ਨਾਗਰਿਕਤਾ ਰੱਖਣ ’ਤੇ ਲੱਗੀ ਪਾਬੰਦੀ ਵੀ ਹਟਾ ਦਿੱਤੀ ਜਾਵੇਗੀ।

ਹੁਣ ਤੱਕ ਯੂਰਪੀਅਨ ਯੂਨੀਅਨ ਦੇ ਮੈਂਬਰ ਅਤੇ ਸਵਿਟਜ਼ਰਲੈਂਡ ਤੋਂ ਇਲਾਵਾ ਹੋਰ ਦੇਸ਼ਾਂ ਦੇ ਜ਼ਿਆਦਾਤਰ ਲੋਕਾਂ ਨੂੰ ਜਰਮਨੀ ਵਿਚ ਨਾਗਰਿਕਤਾ ਪ੍ਰਾਪਤ ਕਰਨ ’ਤੇ ਆਪਣੀ ਪਿਛਲੀ ਨਾਗਰਿਕਤਾ ਛੱਡਣੀ ਪੈਂਦੀ ਹੈ। ਹਾਲਾਂਕਿ, ਕੁਝ ਵਿਚ ਛੋਟ ਵੀ ਹੈ।