ਕੈਨੇਡਾ ਸਰਕਾਰ ਫਾਰਮਾਕੇਅਰ ਬਿੱਲ ਨੂੰ ਇੱਕ-ਦੋ ਦਿਨਾਂ ਵਿਚ ਕਰੇਗੀ ਪੇਸ਼

ਕੈਨੇਡਾ ਸਰਕਾਰ ਫਾਰਮਾਕੇਅਰ ਬਿੱਲ ਨੂੰ ਇੱਕ-ਦੋ ਦਿਨਾਂ ਵਿਚ ਪੇਸ਼ ਕਰਨ ਜਾ ਰਹੀ ਹੈ। ਹੈਲਥ ਮਿਨਿਸਟਰ ਮਾਰਕ ਹੌਲੈਂਡ ਨੇ ਹਾਊਸ ਆਫ਼ ਕਾਮਨ ਦੇ ਨੋਟਿਸ ਪੇਪਰ ’ਤੇ ਇਸ ਨੂੰ ਲਿਸਟ ਕਰ ਦਿੱਤਾ ਹੈ। ਇਹ ਵੀਰਵਾਰ ਜਾਂ ਸ਼ੁੱਕਰਵਾਰ ਨੂੰ ਪੇਸ਼ ਹੋ ਸਕਦਾ ਹੈ ਕਿਉਂਕਿ ਸਰਕਾਰੀ ਬਿੱਲ ਨੂੰ ਪੇਸ਼ ਕਰਨ ਤੋਂ ਘੱਟੋ-ਘੱਟ ਦੋ ਦਿਨਾਂ ਪਹਿਲਾਂ ਨੋਟਿਸ ’ਤੇ ਪਾਉਣ ਦੀ ਲੋੜ ਹੁੰਦੀ ਹੈ।

ਸਰਕਾਰ ਦੇ ਹਾਊਸ ਲੀਡਰ ਸਟੀਵ ਮੈਕਕਿਨਨ ਨੇ ਅੱਜ ਸਵੇਰੇ ਲਿਬਰਲ ਮੀਟਿੰਗ ਲਈ ਜਾਂਦੇ ਹੋਏ ਕਿਹਾ ਕਿ ਉਹ ਉਮੀਦ ਕਰਦੇ ਹਨ ਕਿ ਇਹ ਵੀਰਵਾਰ ਨੂੰ ਪੇਸ਼ ਹੋ ਜਾਵੇਗਾ ਕਿਉਂਕਿ ਐੱਨ.ਡੀ.ਪੀ. ਨਾਲ ਸਮਝੌਤੇ ਤਹਿਤ ਇਸ ਦੀ ਅੰਤਿਮ ਸਮਾਂ-ਸੀਮਾ ਸ਼ੁੱਕਰਵਾਰ ਹੈ। ਸ਼ੁਰੂ ਵਿਚ ਡਾਇਬੀਟੀਜ਼ ਅਤੇ ਜਨਮ ਨਿਯੰਤਰਣ ਵਾਲੀਆਂ ਦਵਾਈਆਂ ਨੂੰ ਇਸ ਵਿਚ ਕਵਰ ਕੀਤਾ ਜਾ ਰਿਹਾ ਹੈ।

ਲਿਬਰਲਸ ਦੀ ਘੱਟ ਗਿਣਤੀ ਸਰਕਾਰ ਨੂੰ ਸਮਰਥਨ ਦੇਣ ਦੇ ਬਦਲੇ ਐੱਨ.ਡੀ.ਪੀ. ਨੇ ਕਈ ਸ਼ਰਤਾਂ ਰੱਖੀਆਂ ਸਨ, ਜਿਨ੍ਹਾਂ ਵਿਚ ਫਾਰਮਾਕੇਅਰ ਦੀ ਸ਼ਰਤ ਵੀ ਸ਼ਾਮਲ ਸੀ।

ਐੱਨ.ਡੀ.ਪੀ. ਨੇ ਪਹਿਲਾਂ ਇਸ ਦੀ ਡੈੱਡਲਾਈਨ ਦਸੰਬਰ 2023 ਤੱਕ ਦਿੱਤੀ ਸੀ ਪਰ ਲਿਬਰਲਸ ਵਲੋਂ ਹੋਰ ਸਮਾਂ ਮੰਗੇ ਜਾਣ ’ਤੇ ਇਹ ਡੈੱਡਲਾਈਨ ਵਧਾ ਕੇ ਇਸ ਸਾਲ ਫਰਵਰੀ ਤੱਕ ਕਰ ਦਿੱਤੀ ਗਈ ਸੀ ਅਤੇ ਜਗਮੀਤ ਸਿੰਘ ਨੇ ਚਿਤਾਵਨੀ ਦਿੱਤੀ ਸੀ ਜੇ ਲਿਬਰਲਸ 1 ਮਾਰਚ ਤੱਕ ਫਾਰਮਾਕੇਅਰ ਬਿੱਲ ਪੇਸ਼ ਨਹੀਂ ਕਰ ਸਕੇ ਤਾਂ ਉਹ ਸਮਝੌਤਾ ਤੋੜ ਦੇਣਗੇ। ਹਾਲਾਂਕਿ, ਜਗਮੀਤ ਸਿੰਘ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦਾ ਤੁਰੰਤ ਇਲੈਕਸ਼ਨ ਸ਼ੁਰੂ ਕਰਵਾਉਣ ਦਾ ਕੋਈ ਇਰਾਦਾ ਨਹੀਂ ਪਰ ਜੇ ਲਿਬਰਲਸ ਨੇ ਸਮਾਂ-ਸੀਮਾ ਇਸ ਵਾਰ ਲੰਘੀ ਤਾਂ ਉਹ ਕੇਸ-ਦਰ-ਕੇਸ ਦੇਖਣਗੇ ਕਿ ਸਮਰਥਨ ਦੇਣਾ ਹੈ ਜਾਂ ਨਹੀਂ।