ਯੋਗ ਕੈਨੇਡੀਅਨਜ਼ ਲਈ ਗ੍ਰੋਸਰੀ ਬੈਨੀਫਿਟ ਦੀ ਵਾਧੂ ਰਕਮ ਦੀ ਅਦਾਇਗੀ ਅੱਜ ਤੋਂ ਸ਼ੁਰੂ

ਕੈਨੇਡਾ ਰੈਵੇਨਿਊ ਏਜੰਸੀ ਵੱਲੋਂ ਦੇਸ਼ ਦੇ ਲਗਭਗ 12 ਮਿਲੀਅਨ ਘੱਟ ਅਤੇ ਦਰਮਿਆਨੀ ਆਮਦਨ ਵਾਲੇ ਪਰਿਵਾਰਾਂ ਦੇ ਖਾਤਿਆਂ ਵਿਚ ਇੱਕ ਵਾਰ ਦੀ ਵਿਸ਼ੇਸ਼ ਜੀ.ਐਸ.ਟੀ. ਕ੍ਰੇਡਿਟ ਟੌਪ ਅੱਪ ਰਾਸ਼ੀ ਭੇਜਣੀ ਸ਼ੁਰੂ ਕਰ ਦਿੱਤੀ ਗਈ ਹੈ। ਇਹ ਪੈਸੇ ਸਿੱਧੇ ਬੈਂਕ ਖਾਤਿਆਂ ਜਾਂ ਚੈੱਕ ਰਾਹੀਂ ਭੇਜੇ ਜਾ ਰਹੇ ਹਨ।

ਇਹ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵੱਲੋਂ ਇਸੇ ਸਾਲ ਜਨਵਰੀ ਵਿਚ ਐਲਾਨੇ ਗਏ Canada Groceries and Essentials Benefit ਪ੍ਰੋਗਰਾਮ ਦਾ ਹਿੱਸਾ ਹੈ, ਜੋ ਜੁਲਾਈ ਤੋਂ ਪੂਰੀ ਤਰ੍ਹਾਂ ਲਾਗੂ ਹੋਵੇਗਾ। ਕੈਨੇਡੀਅਨਜ਼ ਇਸ ਪੈਸੇ ਦੀ ਵਰਤੋਂ ਆਪਣੇ ਘਰ ਦੇ ਕਿਰਾਏ, ਬਿੱਲ, ਗੈਸ ਜਾਂ ਕਿਸੇ ਵੀ ਹੋਰ ਜ਼ਰੂਰਤ ਲਈ ਕਰ ਸਕਦੇ ਹਨ। ਨਵਾਂ ਪ੍ਰੋਗਰਾਮ ਪੁਰਾਣੇ ਜੀ.ਐਸ.ਟੀ./ਐਚ.ਐਸ.ਟੀ. ਕ੍ਰੇਡਿਟ ਦੀ ਥਾਂ ਲਵੇਗਾ।

ਜੁਲਾਈ ਮਹੀਨੇ ਤੋਂ ਅਗਲੇ ਪੰਜ ਸਾਲਾਂ ਲਈ ਰੈਗੂਲਰ ਤਿਮਾਹੀ ਭੁਗਤਾਨਾਂ ਵਿਚ 25 ਫੀਸਦੀ ਦਾ ਵਾਧਾ ਕੀਤਾ ਗਿਆ ਹੈ। ਉਥੇ ਹੀ, ਕੈਨੇਡੀਅਨਜ਼ ਨੂੰ ਇਸ ਹਫ਼ਤੇ ਵਨ-ਟਾਈਮ ਟੌਪ-ਅੱਪ ਪੇਮੈਂਟ ਉਨ੍ਹਾਂ ਨੂੰ ਪਿਛਲੇ ਇੱਕ ਸਾਲ ਵਿਚ ਮਿਲੇ ਕੁੱਲ ਜੀ.ਐਸ.ਟੀ. ਕ੍ਰੈਡਿਟ ਦੇ 50 ਫ਼ੀਸਦੀ ਹਿੱਸੇ ਬਰਾਬਰ ਦਿੱਤੀ ਜਾ ਰਹੀ ਹੈ।