12.72C Vancouver 12.72C VancouverNov 7, 2024 5:38 PM - Connect Newsroom
ਕੈਨੇਡਾ ਵਿਚ ਬੰਦੂਕ ਹਿੰਸਾ ਲਗਾਤਾਰ ਵੱਧ ਰਹੀ ਹੈ। ਖਾਸ ਤੌਰ ’ਤੇ ਗ੍ਰੇਟਰ ਟੋਰਾਂਟੋ ਖੇਤਰ ਦੇ ਕੁਝ ਹਿੱਸਿਆਂ ਵਿਚ ਇਹ ਇੱਕ ਰਿਕਾਰਡ ਤੋੜਨ ਵਾਲਾ ਸਾਲ ਹੈ। ਹੈਮਿਲਟਨ ਸਿਟੀ ਨੇ ਇਸ ਸਾਲ ਹੁਣ ਤੱਕ ਗੋਲੀਬਾਰੀ ਦੀਆਂ ਜਿੰਨੀਆਂ ਘਟਨਾਵਾਂ ਦਰਜ ਕੀਤੀਆਂ ਹਨ, ਉਹ ਪਹਿਲਾਂ ਕਦੇ ਨਹੀਂ ਹੋਈਆਂ ਸਨ।
ਸਟਾਫ ਸਾਰਜੈਂਟ ਸਟੀਵ ਬੇਰੇਜ਼ੁਕ ਮੁਤਾਬਕ, ਹੈਮਿਲਟਨ ਵਿਚ 4 ਨਵੰਬਰ ਤੱਕ 58 ਗੋਲੀਬਾਰੀ ਦੀਆਂ ਘਟਨਾਵਾਂ ਹੋ ਚੁੱਕੀਆਂ ਹਨ, ਜਦੋਂ ਕਿ ਪਿਛਲੇ ਪੂਰੇ ਸਾਲ ਵਿਚ 35 ਘਟਨਾਵਾਂ ਹੋਈਆਂ ਸਨ। ਇਹ ਸ਼ਹਿਰ ਵਿਚ ਗੋਲੀਬਾਰੀ ਦੀਆਂ ਘਟਨਾਵਾਂ ਦਾ ਨਵਾਂ ਰਿਕਾਰਡ ਹੈ। ਉਥੇ ਹੀ, ਪੀਲ ਪੁਲਿਸ ਦਾ ਕਹਿਣਾ ਹੈ ਕਿ ਉਹ ਹਰ 36 ਘੰਟੇ ਵਿਚ ਇੱਕ ਨਾਜ਼ਾਇਜ ਹਥਿਆਰ ਜ਼ਬਤ ਕਰ ਰਹੇ ਹਨ।
ਚੀਫ਼ ਨਿਸ਼ਾਨ ਦੁਰਾਈਪਾ ਮੁਤਾਬਕ, ਪਿਛਲੇ ਸਾਲ ਜਨਵਰੀ ਤੋਂ ਸਤੰਬਰ ਵਿਚਕਾਰ ਪੀਲ ਪੁਲਿਸ ਨੇ 84 ਨਾਜ਼ਾਇਜ ਹਥਿਆਰ ਜ਼ਬਤ ਕੀਤੇ ਸਨ, ਜਦੋਂ ਕਿ 2024 ਵਿਚ ਇਸੇ ਮਿਆਦ ਦੌਰਾਨ 157 ਬੰਦੂਕਾਂ ਜ਼ਬਤ ਕੀਤੀਆਂ ਜਾ ਚੁੱਕੀਆਂ ਹਨ।
ਯਾਰਕ ਅਤੇ ਟੋਰਾਂਟੋ ਵਿਚ ਵੀ ਇਸੇ ਤਰ੍ਹਾਂ ਦਾ ਵਾਧਾ ਹੈ। ਉਥੇ ਹੀ, ਕੈਨੇਡਾ ਭਰ ਦੀ ਗੱਲ ਕਰੀਏ ਤਾਂ ਸਟੈਟਿਸਟਿਕਸ ਕੈਨੇਡਾ ਦੇ ਅੰਕੜਿਆਂ ਅਨੁਸਾਰ, 2018 ਅਤੇ 2023 ਵਿਚਕਾਰ ਕੈਨੇਡਾ ਨੇ ਗੋਲੀਬਾਰੀ ਦੀਆਂ ਘਟਨਾਵਾਂ ਵਿਚ ਦੁੱਗਣੇ ਤੋਂ ਵੱਧ ਵਾਧਾ ਦਰਜ ਕੀਤਾ ਹੈ।
