ਹੈਤੀ ਦੇ ਪ੍ਰਧਾਨ ਮੰਤਰੀ ਪਰਿਵਰਤਨ ਕੌਂਸਲ ਦੇ ਗਠਨ ਤੋਂ ਬਾਅਦ ਦੇਣਗੇ ਅਸਤੀਫ਼ਾ

ਕੈਨੇਡਾ ਦੇ ਹਜ਼ਾਰਾਂ ਨਾਗਰਿਕ ਹੈਤੀ ਵਿਚ ਫਸ ਗਏ ਹਨ ਅਤੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਕਹਿਣਾ ਹੈ ਕਿ ਸਰਕਾਰ ਮੌਜੂਦਾ ਹਾਲਾਤ ’ਤੇ ਨਜ਼ਰ ਰੱਖ ਰਹੀ ਹੈ। ਗਲੋਬਲ ਅਫੇਅਰਜ਼ ਕੈਨੇਡਾ ਮੁਤਾਬਕ, ਲਗਭਗ 3,000 ਕੈਨੇਡੀਅਨ ਹੈਤੀ ਵਿਚ ਫਸੇ ਹੋਏ ਹਨ ਕਿਉਂਕਿ ਦੇਸ਼ ਵਿਚ ਫੈਲੀ ਹਿੰਸਾ ਨੇ ਬੰਦਰਗਾਹਾਂ ਅਤੇ ਹਵਾਈ ਅੱਡੇ ਦੋਵਾਂ ਨੂੰ ਬੰਦ ਕਰ ਦਿੱਤਾ ਹੈ ਅਤੇ ਇਸ ਹਾਲਾਤ ਵਿਚ ਕੈਨੇਡੀਅਨ ਸਰਕਾਰ ਕੋਲ ਉਨ੍ਹਾਂ ਨੂੰ ਕੱਢਣ ਦਾ ਕੋਈ ਹੋਰ ਰਸਤਾ ਨਹੀਂ ਹੈ।

ਵਿਦੇਸ਼ ਦੌਰੇ ’ਤੇ ਗਏ ਹੈਤੀ ਦੇ ਪ੍ਰਧਾਨ ਮੰਤਰੀ ਏਰੀਅਲ ਹੈਨਰੀ ਖੁਦ ਵੀ ਦੇਸ਼ ਵਿਚ ਦਾਖਲ ਨਹੀਂ ਹੋ ਸਕੇ ਹਨ। ਬੀਤੇ ਕੱਲ੍ਹ ਜਮਾਇਕਾ ਵਿਚ ਕੈਰੇਬੀਅਨ ਆਗੂ ਅਤੇ ਅਮਰੀਕਾ ਦੇ ਵਿਦੇਸ਼ ਮੰਤਰੀ ਐਂਟਨੀ ਬਲਿੰਕਨ ਵਲੋਂ ਕੀਤੀ ਗਈ ਹਾਈ ਪ੍ਰੋਫਾਇਲ ਮੀਟਿੰਗ ਮਗਰੋਂ ਹੈਨਰੀ ਨੇ ਮੰਗਲਵਾਰ ਤੜਕੇ ਅਸਤੀਫਾ ਦੇਣ ਦੀ ਘੋਸ਼ਣਾ ਕੀਤੀ ਹੈ। ਕਾਨੂੰਨ ਵਿਵਸਥਾ ਪੂਰੀ ਤਰ੍ਹਾਂ ਤਹਿਸ-ਨਹਿਸ ਹੋ ਜਾਣ ਕਾਰਨ ਉਨ੍ਹਾਂ ’ਤੇ ਅਸਤੀਫੇ ਲਈ ਲਗਾਤਾਰ ਦਬਾਅ ਵੱਧ ਰਿਹਾ ਸੀ।

ਹੈਤੀ ਨੂੰ ਸੰਕਟ ਵਿਚੋਂ ਕੱਢਣ ਲਈ ਉਥੇ ਬਦਲਵੀਂ ਸਰਕਾਰ ਸਥਾਪਤ ਕਰਨ ਦੀ ਕੋਸ਼ਿਸ਼ ਚੱਲ ਰਹੀ ਹੈ। ਇਸ ਵਿਚਕਾਰ ਮਾਹਰਾਂ ਦਾ ਇਹ ਵੀ ਮੰਨਣਾ ਹੈ ਕਿ ਪਰਿਵਰਤਨਸ਼ੀਲ ਕੌਂਸਲ ਸਥਾਪਤ ਕੀਤੇ ਜਾਣ ਨਾਲ ਗੈਂਗ ਹਿੰਸਾ ਰੁਕੇਗੀ ਇਸ ਦੀ ਸੰਭਾਵਨਾ ਬਹੁਤ ਘੱਟ ਹੈ। ਹੈਨਰੀ ਇੱਕ ਗੈਰ-ਚੁਣੇ ਹੋਏ ਲੀਡਰ ਸਨ,

ਉਨ੍ਹਾਂ ਨੇ 2021 ਵਿਚ ਰਾਸ਼ਟਰਪਤੀ ਦੀ ਹੱਤਿਆ ਤੋਂ ਬਾਅਦ ਸੱਤਾ ਸੰਭਾਲੀ ਸੀ। ਹੈਤੀ ਵਿਚ 29 ਫਰਵਰੀ ਤੋਂ ਸ਼ੁਰੂ ਹੋਏ ਗੈਂਗ ਹਮਲਿਆਂ ਵਿਚ ਸੈਂਕੜੇ ਲੋਕ ਮਾਰੇ ਗਏ ਹਨ ਅਤੇ 15,000 ਤੋਂ ਵੱਧ ਲੋਕ ਬੇਘਰ ਹੋ ਗਏ ਹਨ।