ਹੈਲੀਫੈਕਸ 'ਤੇ ਫਲਾਈਟ ਹਾਦਸਾਗ੍ਰਸਤ, ਮੁੜ ਖੁੱਲ੍ਹਾ ਹਵਾਈ ਅੱਡੇ ਦਾ ਰਨਵੇਅ

ਹੈਲੀਫੈਕਸ ਦੇ ਅੰਤਰਰਾਸ਼ਟਰੀ ਹਵਾਈ ਅੱਡੇ ’ਤੇ ਵੀਕਐਂਡ ਦੌਰਾਨ ਇਕ ਫਲਾਈਟ ਲੈਂਡਿੰਗ ਦੌਰਾਨ ਹਾਦਸਾਗ੍ਰਸਤ ਹੋ ਗਈ। ਇਸ ਦੇ ਇਕ ਹਿੱਸੇ ਵਿਚ ਅੱਗ ਲੱਗ ਗਈ। ਇਹ ਫਲਾਈਟ ਪੀ.ਏ.ਐੱਲ. ਏਅਰਲਾਈਨਜ਼ ਵਲੋਂ ਓਪਰੇਟ ਕੀਤੀ ਜਾ ਰਹੀ ਏਅਰ ਕੈਨੇਡਾ ਦੀ ਸੀ। ਇਸ ਵਿਚ 73 ਲੋਕ ਸਵਾਰ ਸਨ, ਹਾਲਾਂਕਿ ਸਾਰੇ ਯਾਤਰੀ ਸੁਰੱਖਿਅਤ ਬਾਹਰ ਕੱਢ ਲਏ ਗਏ ਸਨ। ਇਹ ਘਟਨਾ ਸ਼ਨੀਵਾਰ ਰਾਤ ਕਰੀਬ 9.30 ਵਜੇ ਵਾਪਰੀ।

ਰਨਵੇਅ ਤੋਂ ਫਿਸਲਣ ਕਾਰਨ ਇਸ ਦੇ ਖੱਬੇ ਪਾਸੇ ਅੱਗ ਲੱਗਣੀ ਸ਼ੁਰੂ ਹੋ ਗਈ ਸੀ। ਯਾਤਰੀਆਂ ਨੇ ਦੱਸਿਆ ਕਿ ਕੈਬਿਨ ਇਕ ਦਮ ਧੂੰਏਂ ਨਾਲ ਭਰ ਗਿਆ ਸੀ। ਇਹ ਫਲਾਈਟ ਨਿਊਫਾਊਂਡਲੈਂਡ ਦੇ ਸੇਂਟ ਜੌਹਨ ਤੋਂ ਆਈ ਸੀ। ਇਸ ਹਾਦਸੇ ਦੀ ਜਾਂਚ ਆਵਾਜਾਈ ਸੁਰੱਖਿਆ ਬੋਰਡ ਵਲੋਂ ਕੀਤੀ ਜਾ ਰਹੀ ਹੈ।

ਨੋਵਾ ਸਕੋਸ਼ੀਆ ਆਰ.ਸੀ.ਐੱਮ.ਪੀ. ਨੇ ਦੱਸਿਆ ਕਿ ਇਸ ਹਾਦਸੇ ਵਿਚ ਯਾਤਰੀਆਂ ਦੇ ਹਲਕੀਆਂ ਸੱਟਾਂ ਹੀ ਲੱਗੀਆਂ ਸਨ, ਕੋਈ ਵੱਡੀ ਘਟਨਾ ਵਾਪਰਨ ਤੋਂ ਬਚਾਅ ਰਿਹਾ। ਗੌਰਤਲਬ ਹੈ ਕਿ ਇਸ ਘਟਨਾ ਤੋਂ ਇਕ ਦਿਨ ਬਾਅਦ ਐਤਵਾਰ ਨੂੰ ਸਾਊਥ ਕੋਰੀਆ ਵਿਚ ਲੈਂਡਿੰਗ ਦੌਰਾਨ ਇਕ ਜਹਾਜ਼ ਹਾਦਸਾਗ੍ਰਸਤ ਹੋ ਗਿਆ ਸੀ, ਜਿਸ ਵਿਚ ਸਵਾਰ 179 ਲੋਕਾਂ ਦੀ ਮੌਤ ਹੋ ਗਈ।