10.19C Vancouver 10.19C VancouverNov 24, 2023 5:15 PM - Connect News
ਇਜ਼ਰਾਈਲ ਅਤੇ ਹਮਾਸ ਵਿਚਕਾਰ 4 ਦਿਨਾਂ ਲਈ ਅਸਥਾਈ ਜੰਗਬੰਦੀ ਸ਼ੁੱਕਰਵਾਰ ਤੋਂ ਸ਼ੁਰੂ ਹੋ ਚੁੱਕੀ ਹੈ। ਇਸ ਸਮਝੌਤੇ ਤਹਿਤ ਹਮਾਸ ਨੇ ਪਹਿਲੇ ਗੇੜ ਵਿੱਚ 13 ਇਜ਼ਰਾਈਲੀ ਬੰਧਕਾਂ ਨੂੰ ਛੱਡਿਆ ਹੈ। ਇਸ ਦੀ ਜਾਣਕਾਰੀ ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਦਫਤਰ ਵੱਲੋਂ ਦਿੱਤੀ ਗਈ।
ਯੁੱਧ ਵਿਰਾਮ ਦੇ 4 ਦਿਨਾਂ ਦੌਰਾਨ ਹਮਾਸ ਕੁੱਲ 50 ਬੰਧਕਾਂ ਨੂੰ ਰਿਹਾਅ ਕਰੇਗਾ ਅਤੇ ਬਦਲੇ ਵਿੱਚ ਇਜ਼ਰਾਇਲ ਵੀ 150 ਫਲਸਤੀਨੀ ਕੈਦੀਆਂ ਨੂੰ ਛੱਡੇਗਾ। ਯੂ. ਕੇ. ਅਮਰੀਕਾ ਅਤੇ ਯੂਰਪੀਅਨ ਸੰਘ ਵੱਲੋਂ ਅੱਤਵਾਦੀ ਸਮੂਹ ਐਲਾਨੇ ਗਏ ਹਮਾਸ ਨੇ 7 ਅਕਤੂਬਰ ਨੂੰ ਇਜ਼ਰਾਈਲ 'ਤੇ ਹਮਲਾ ਕਰਦਿਆਂ ਲਗਭਗ 240 ਲੋਕਾਂ ਨੂੰ ਬੰਧਕ ਬਣਾ ਲਿਆ ਸੀ।
ਦੋਹਾਂ-ਧਿਰਾਂ ਵਿੱਚ ਜੰਗਬੰਦੀ ਲਈ ਮੁੱਖ ਤੌਰ 'ਤੇ ਕਤਰ ਨੇ ਭੂਮਿਕਾ ਨਿਭਾਈ। ਹਮਾਸ ਵੱਲੋਂ ਛੱਡੇ ਜਾਣ ਵਾਲੇ ਬੰਧਕਾਂ ਨੂੰ ਰਫਾਹ ਬਾਰਡਰ ਜ਼ਰੀਏ ਮਿਸਰ ਪਹੁੰਚਾਉਣ ਦੀ ਜ਼ਿੰਮੇਵਾਰੀ ਰੈੱਡ ਕਰਾਸ ਦੀ ਅੰਤਰਰਾਸ਼ਟਰੀ ਕਮੇਟੀ ਨੂੰ ਸੌਂਪੀ ਗਈ ਹੈ। ਉਥੇ ਹੀ ਥਾਈਲੈਂਡ ਦੇ ਪ੍ਰਧਾਨ ਮੰਤਰੀ ਨੇ ਹਮਾਸ ਵੱਲੋਂ ਵੱਖਰੇ ਤੌਰ 'ਤੇ 12 ਥਾਈਂ ਨਾਗਰਿਕਾਂ ਨੂੰ ਵੀ ਛੱਡੇ ਜਾਣ ਦੀ ਪੁਸ਼ਟੀ ਕੀਤੀ।
