12.12C Vancouver 12.12C VancouverMay 13, 2020 2:28 PM -
ਹੈਲਥ ਕੈਨੇਡਾ ਮੁਤਾਬਕ ਕੋਵਿਡ-19 ਦੀਆਂ ਐਂਟੀਬਾਡੀਜ਼ ਦੀ ਪਛਾਣ ਕਰਣ ਵਾਸਤੇ ਪਹਿਲੇ ਸਿਰੋਲੌਜੀਕਲ ਟੈਸਟ ਨੂੰ ਮਨਜ਼ੂਰੀ ਦੇ ਦਿੱਤੀ ਗਈ ਹੈ।
ਡਿਆਸੋਰੀਨ ਨਾਂ ਦੀ ਇਕ ਇਟਾਲੀਅਨ ਮਲਟੀਨੈਸ਼ਨਲ ਬਾਇਓਟੈਕਨਾਲੋਜੀ ਕੰਪਨੀ ਨੇ ਲਿਏਸੌਨ ਟੈਸਟ ਵੀ ਵਿਕਸਿਤ ਕੀਤਾ ਸੀ ਜਿਸ ਨੂੰ ਹਾਲ ਹੀ ਵਿੱਚ ਯੂ.ਐਸ. ਫੂਡ ਐਂਡ ਡਰੱਗ ਐਡਮਿਨਿਸਟ੍ਰੇਸ਼ਨ ਵੱਲੋਂ ਮਨਜ਼ੂਰੀ ਮਿਲੀ ਸੀ।
ਹੈਲਥ ਕੈਨੇਡਾ ਵੱਲੋਂ ਮੰਗਲਵਾਰ ਨੂੰ ਜਾਰੀ ਕੀਤੀ ਗਈ ਇੱਕ ਸਟੇਟਮੈਂਟ ਵਿੱਚ ਇਹ ਗੱਲ ਸਾਂਝੀ ਕੀਤੀ ਗਈ ਕਿ ਕਨੇਡੀਅਨ ਲੈਬਾਰਟਰੀਆਂ ਦੇ ਵਿੱਚ ਇਹ ਟੈਸਟ ਕੋਵਿਡ-19 ਦੀਆਂ ਐਂਟੀਬਾਡੀਜ਼ ਪਛਾਨਣ ਅਤੇ ਇਹ ਬਿਹਤਰ ਸਮਝਣ ਵਿੱਚ ਸਹਾਈ ਹੋਵੇਗਾ ਕਿ ਜਿਹੜੇ ਵਿਅਕਤੀਆਂ ਨੂੰ ਵਾਇਰਸ ਹੋ ਚੁੱਕਾ ਹੈ ਕੀ ਉਨ੍ਹਾਂ ਨੂੰ ਇਸ ਤੋਂ ਬਚਾਅ ਹੈ।
ਹੈਲਥ ਕੈਨੇਡਾ ਦਾ ਕਹਿਣਾ ਹੈ ਕਿ ਹੋਰ ਖੋਜ ਰਾਹੀਂ ਪਾਜ਼ਿਟਿਵ ਐਂਟੀਬਾਡੀ ਟੈਸਟਾਂ ਅਤੇ ਦੋਬਾਰਾ ਇਨਫੈਕਸ਼ਨ ਦੇ ਖ਼ਤਰੇ ਦੇ ਆਪਸ ਵਿੱਚ ਸੰਬੰਧ ਨੂੰ ਸਮਝਣ ਵਿੱਚ ਵੀ ਮਦਦ ਮਿਲੇਗੀ।
ਹੈਲਥ ਕੈਨੇਡਾ ਮੁਤਾਬਕ ਅਗਲੇ ਦੋ ਸਾਲਾਂ ਵਿੱਚ ਤਕਰੀਬਨ ਇੱਕ ਮਿਲੀਅਨ ਖ਼ੂਨ ਦੇ ਸੈਂਪਲ ਇਕੱਠੇ ਕੀਤੇ ਜਾਣਗੇ ਤਾਂ ਕਿ ਆਮ ਆਬਾਦੀ ਅਤੇ ਸਿਹਤ ਸੰਭਾਲ ਕਾਮਿਆਂ ਅਤੇ ਬਜ਼ੁਰਗਾਂ ਵਰਗੇ ਇਨਫੈਕਸ਼ਨ ਦੇ ਵੱਧ ਖ਼ਤਰੇ ਵਾਲੇ ਸਮੂਹਾਂ ਵਿੱਚ ਵਾਇਰਸ ਦੇ ਫੈਲਾਅ ਉੱਤੇ ਨਜ਼ਰ ਰੱਖੀ ਜਾ ਸਕੇ।
ਉਨ੍ਹਾਂ ਅਨੁਸਾਰ ਟੈਸਟਿੰਗ ਰਾਹੀਂ ਕਨੇਡੀਅਨਾਂ ਦੀ ਸਿਹਤ ਸੰਭਾਲ ਲਈ ਸਹੀ ਫੈਸਲੇ ਲੈਣ ਵਿੱਚ ਮਦਦ ਮਿਲੇਗੀ।
ਸਟੇਟਮੈਂਟ ਮੁਤਾਬਕ “ਹੈਲਥ ਕੈਨੇਡਾ ਕਨੇਡੀਅਨ ਲੋਕਾਂ ਦੀ ਸਿਹਤ ਅਤੇ ਸੁਰੱਖਿਆ ਯਕੀਨੀ ਬਣਾਉਣ ਵੱਲ ਅਤੇ ਸੁਰੱਖਿਅਤ ਅਤੇ ਅਸਰਦਾਰ ਸਿਹਤ ਉਤਪਾਦਾਂ ਵਿੱਚ ਵਾਧਾ ਕਰਣ ਲਈ ਕੰਮ ਕਰਦੀ ਰਹੇਗੀ।”
