ਬੀ. ਸੀ. ਦੇ ਨੌਰਥ ਕੋਸਟ ਖੇਤਰ ਲਈ ਇਨਵਾਇਰਮੈਂਟ ਕੈਨੇਡਾ ਨੇ ਭਾਰੀ ਬਾਰਸ਼ ਦੀ ਚਿਤਾਵਨੀ ਕੀਤੀ ਜਾਰੀ

ਬੀ. ਸੀ. ਦੇ ਨੌਰਥ ਕੋਸਟ ਖੇਤਰ ਲਈ ਇਨਵਾਇਰਮੈਂਟ ਕੈਨੇਡਾ ਨੇ ਭਾਰੀ ਬਾਰਸ਼ ਦੀ ਚਿਤਾਵਨੀ ਜਾਰੀ ਕੀਤੀ ਹੈ, ਜਿਥੇ ਅੱਜ ਪ੍ਰਿੰਸ ਰੂਪਰਟ ਅਤੇ ਆਸਪਾਸ ਦੇ ਇਲਾਕਿਆਂ ਵਿਚ 200 ਮਿਲੀਮੀਟਰ ਤੱਕ ਬਾਰਸ਼ ਹੋ ਸਕਦੀ ਹੈ। ਇਸ ਦੌਰਾਨ ਹੈਡਾ ਗਵਾਈ ਵਿਚ 110 ਮਿਲੀਮੀਟਰ ਅਤੇ ਕਿਟੀਮਟ ਨੇੜੇ 100 ਮਿਲੀਮੀਟਰ ਤੱਕ ਬਾਰਸ਼ ਪੈਣ ਦੀ ਭਵਿੱਖਬਾਣੀ ਕੀਤੀ ਗਈ ਹੈ।

ਇਸ ਤੋਂ ਇਲਾਵਾ ਮੌਸਮ ਵਿਭਾਗ ਨੇ ਟੈਰਿਸ ਵਿਚ ਸਰਦੀਆਂ ਦੇ ਤੂਫਾਨ ਅਤੇ ਫ਼ਰੀਜ਼ਿੰਗ ਰੇਨ ਦਾ ਖ਼ਤਰਾ ਦੱਸਿਆ ਹੈ, ਜਿਥੇ 25 ਸੈਂਟੀਮੀਟਰ ਬਰਫ਼ਬਾਰੀ ਪਹਿਲਾਂ ਹੀ ਹੋ ਚੁੱਕੀ ਹੈ। ਇਸ ਵਿਚਕਾਰ ਬੀ.ਸੀ. ਰਿਵਰ ਫੋਰਕਾਸਟ ਸੈਂਟਰ ਨੇ ਹੈਡਾ ਗਵਾਈ ਅਤੇ ਨੌਰਥ ਕੋਸਟ ਲਈ ਹੜ੍ਹ ਦੀ ਚਿਤਾਵਨੀ ਜਾਰੀ ਕਰ ਦਿੱਤੀ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਭਾਰੀ ਬਾਰਸ਼ ਅਤੇ ਪਿਘਲ ਰਹੀ ਬਰਫ਼ ਕਾਰਨ ਦਰਿਆਵਾਂ ਦਾ ਪੱਧਰ ਖ਼ਤਰੇ ਦੇ ਨਿਸ਼ਾਨ ਤੋਂ ਉੱਪਰ ਜਾ ਸਕਦਾ ਹੈ।

ਉਥੇ ਹੀ, ਬੀ. ਸੀ. ਰਾਹੀਂ ਯੂਕੋਨ ਅਤੇ ਅਲਾਸਕਾ ਪੈਨਹੈਂਡਲ ਨੂੰ ਜੋੜਨ ਵਾਲੀਆਂ ਦੋ ਮੁੱਖ ਸੜਕਾਂ ਸਾਊਥ ਕਲੋਂਡਾਈਕ ਹਾਈਵੇ ਅਤੇ ਹੇਨਸ ਰੋਡ 'ਤੇ 40 ਸੈਂਟੀਮੀਟਰ ਤੱਕ ਬਰਫ਼ਬਾਰੀ ਦੀ ਉਮੀਦ ਜਤਾਈ ਗਈ ਹੈ। ਬੀ.ਸੀ.-ਯੂਕੋਨ ਬਾਰਡਰ ਨੇੜੇ ਕੈਸੀਅਰ ਮਾਊਂਟੇਨ ਖੇਤਰ ਵਿਚ ਵੀ 15 ਸੈਂਟੀਮੀਟਰ ਤੱਕ ਬਰਫਬਾਰੀ ਹੋਣ ਦੀ ਸੰਭਾਵਨਾ ਹੈ।