9.33C Vancouver 9.33C VancouverFeb 23, 2022 1:57 AM - The Canadian Press
ਬੀ.ਸੀ. 'ਚ ਅੱਜ ਸਾਲ 2022-2023 ਦਾ ਬਜਟ ਪੇਸ਼ ਕੀਤਾ ਗਿਆ ਹੈ।
ਵਿੱਤ ਮੰਤਰੀ ਸਿਲੀਨਾ ਰੌਬਿਨਸਨ ਨੇ ਬਜਟ ਪੇਸ਼ ਕਰਨ ਦੇ ਸ਼ੁਰੂਆਤੀ ਸੰਬੋਧਨ ਦੌਰਾਨ ਕਿਹਾ ਕਿ ਸੂਬੇ ਨੇ ਬੀਤੇ ਸਾਲ ਰੈਜ਼ੀਡੈਂਸ਼ੀਅਲ ਸਕੂਲਾਂ ਸੰਬੰਧੀ ਕੁਝ ਪ੍ਰੇਸ਼ਾਨ ਕਰਨ ਵਾਲੀ ਜਾਣਕਾਰੀ ਉਜਾਗਰ ਹੁੰਦੇ ਵੇਖੀ ਅਤੇ ਵਾਤਾਵਰਨ ਸੰਬੰਧੀ ਮਾਰ ਝੱਲੀ।
ਪਰ ਉਨ੍ਹਾਂ ਕਿਹਾ ਕਿ ਸੂਬੇ ਦੇ ਲੋਕਾਂ 'ਚ ਏਕਾ ਬਰਕਰਾਰ ਹੈ।
ਉਨ੍ਹਾਂ ਕਿਹਾ ਕਿ ਸੂਬੇ ਦੀ ਵੈਕਸੀਨੇਸ਼ਨ ਦਰ ਦੇਸ਼ ਦੇ ਬਾਕੀ ਸੂਬਿਆਂ ਮੁਕਾਬਲੇ ਬਿਹਤਰ ਹੈ ਅਤੇ ਪੈਂਡੈਮਿਕ ਸੰਬੰਧੀ ਮੌਤਾਂ ਦੀ ਗਿਣਤੀ ਬਾਕੀ ਸੂਬਿਆਂ ਤੋਂ ਘਟ ਹੈ।
ਸਿਲੀਨਾ ਰੌਬਿਨਸਨ ਨੇ ਕਿਹਾ ਕਿ ਪੈਂਡੈਮਿਕ ਤੋਂ ਉਭਰਦੇ ਹੋਏ ਬੀ.ਸੀ. ਦੀ ਬੇਰੁਜਗਾਰੀ ਦਰ ਬਾਕੀ ਸੂਬਿਆਂ ਮੁਕਾਬਲੇ ਸਭ ਤੋਂ ਘਟ ਹੈ ਅਤੇ ਸੂਬੇ 'ਚ ਪੈਂਡੈਮਿਕ ਤੋਂ ਬਾਅਦ 160,000 ਤੋਂ ਵਧੇਰੇ ਨੌਕਰੀਆਂ ਸਥਾਪਿਤ ਹੋਈਆਂ ਹਨ।
ਉਨ੍ਹਾਂ ਐਲਾਨ ਕੀਤਾ ਕਿ ਸੂਬੇ 'ਚ ਆਰਟਸ, ਕਲਚਰ ਅਤੇ ਮਿਊਜ਼ਿਕ ਦੇ ਖੇਤਰ 'ਚ ਨਾਨ-ਪ੍ਰੌਫਿਟ ਸੰਸਥਾਵਾਂ ਨੂੰ $25 ਮਿਲੀਅਨ ਪ੍ਰਦਾਨ ਕੀਤੇ ਜਾਣਗੇ।
ਉਨ੍ਹਾਂ ਕਿਹਾ ਅੱਜ ਸਰਕਾਰ ਵੱਲੋਂ ਫੈਸਲਾ ਲਿਆ ਗਿਆ ਹੈ ਕਿ ਸੂਬੇ ਦੇ 50 ਸੈਕਸ਼ੂਅਲ ਅਸੌਲਟ ਕੇਂਦਰਾਂ ਨੂੰ $22 ਮਿਲੀਅਨ ਦੀ ਰਾਸ਼ੀ ਪ੍ਰਦਾਨ ਕੀਤੀ ਜਾ ਰਹੀ ਹੈ।
ਉਨ੍ਹਾਂ ਕਿਹਾ ਕਿ ਸਾਡੀ ਸਰਕਾਰ ਅਗਲੇ 3 ਸਾਲ 'ਚ ਪ੍ਰਭਾਵਿਤ ਫੌਰੈਸਟ ਵਰਕਰਾਂ, ਕੰਟਰੈਕਟਰਾਂ, ਇੰਡਸਟਰੀਆਂ, ਕਮਿਊਨਿਟੀਸ ਅਤੇ ਫਰਸਟ ਨੇਸ਼ਨਸ ਲਈ $185 ਮਿਲੀਅਨ ਪ੍ਰਦਾਨ ਕਰੇਗੀ।
ਉਨ੍ਹਾਂ ਦੱਸਿਆ ਕਿ ਸੂਬੇ 'ਚ ਇਸ ਬਜਟ ਨਾਲ ਕਨੈਕਟਿਵਿਟੀ ਦੇ ਕਾਰਜਾਂ 'ਚ ਹੋ ਰਿਹਾ ਨਿਵੇਸ਼ $500 ਮਿਲੀਅਨ 'ਤੇ ਪਹੁੰਚ ਜਾਵੇਗਾ।
ਉਨ੍ਹਾਂ ਕਿਹਾ ਕਿ ਇਸ ਦਾ ਅਰਥ ਹੈ ਕਿ ਕਰੀਬ 280 ਹੋਰ ਕਮਿਊਨਿਟੀਸ ਨੂੰ ਹਾਈ ਸਪੀਡ ਇੰਟਰਨੈਟ ਸੇਵਾ ਪ੍ਰਦਾਨ ਹੋ ਸਕੇਗੀ।
ਉਨ੍ਹਾਂ ਕਿਹਾ ਕਿ ਸਾਲ 2027 ਤਕ ਕਰੀਬ 800 ਕਮਿਊਨਟੀਸ ਨੂੰ ਇਸ ਕਨੈਕਟਿਵਿਟੀ ਸੰਬੰਧੀ ਨਿਵੇਸ਼ ਦਾ ਲਾਭ ਹੋ ਸਕੇਗਾ।
ਸਿਲੀਨਾ ਰੌਬਿਨਸਨ ਨੇ ਲੈਂਗਲੀ ਟ੍ਰਾਂਜ਼ਿਟ ਐਕਸਪੈਂਸ਼ਨ ਦੀ ਦਿੱਤੀ ਜਾਣਕਾਰੀ
ਅੱਜ ਸਿਲੀਨਾ ਰੌਬਿਨਸਨ ਨੇ ਬਜਟ ਪੇਸ਼ ਕਰਦੇ ਹੋਏ ਦੱਸਿਆ ਕਿ ਅਸੀਂ ਸੂਬੇ 'ਚ ਇਨਫਰਾਸਟਰਕਚਰ ਪਲੈਨ ਨੂੰ ਨਵੀਆਂ ਉਚਾਈਆਂ 'ਤੇ ਲਿਜਾ ਰਹੇ ਹਾਂ।
ਉਨ੍ਹਾਂ ਦੱਸਿਆ ਕਿ ਅਗਲੇ 3 ਸਾਲ 'ਚ ਇਨਫਰਾਸਟਰਕਚਰ ਸੰਬੰਧੀ $27.4 ਬਿਲੀਅਨ ਦਾ ਨਿਵੇਸ਼ ਕੀਤਾ ਜਾ ਰਿਹਾ ਹੈ।
ਸਿਲੀਨਾ ਰੌਬਿਨਸਨ ਨੇ ਦੱਸਿਆ ਕਿ ਇਸ 'ਚ ਸਰੀ ਤੋਂ ਲੈਂਗਲੀ ਲਈ ਸਕਾਈਟਰੇਨ ਸੇਵਾ ਸਥਾਪਿਤ ਕਰਨ ਦੀ ਫੰਡਿੰਗ ਵੀ ਸ਼ਾਮਿਲ ਹੈ।
ਉਨ੍ਹਾਂ ਕਿਹਾ ਕਿ ਫਰੇਜ਼ਰ ਦੇ ਦੱਖਣ 'ਚ ਇਹ ਹੋਣ ਵਾਲਾ 3 ਦਹਾਕਿਆਂ 'ਚ ਇਹ ਪਹਿਲਾ ਰੈਪਿਡ ਟ੍ਰਾਂਜ਼ਿਟ ਐਕਸਪੈਂਸ਼ਨ ਹੈ।
ਉਨ੍ਹਾਂ ਕਿਹਾ ਕਿ ਇਸ ਦੀ ਪਲੈਨਿੰਗ ਸ਼ੁਰੂ ਹੋ ਚੁੱਕੀ ਹੈ।
