ਐਲਬਰਟਾ ਦੇ ਬੈਂਫ ਨੈਸ਼ਨਲ ਪਾਰਕ ਵਿਚ ਚੱਟਾਨ ਖਿਸਕਣ ਕਾਰਨ ਇਕ ਹਾਈਕਰ ਦੀ ਮੌਤ

ਐਲਬਰਟਾ ਦੇ ਬੈਂਫ ਨੈਸ਼ਨਲ ਪਾਰਕ ਵਿਚ ਚੱਟਾਨ ਖਿਸਕਣ ਕਾਰਨ ਇਕ ਹਾਈਕਰ ਦੀ ਮੌਤ ਹੋ ਗਈ ਅਤੇ ਹੋਰ 3 ਜ਼ਖਮੀ ਹੋ ਗਏ। ਪਾਰਕਸ ਕੈਨੇਡਾ ਮੁਤਾਬਕ ਬੋ ਗਲੇਸ਼ੀਅਰ ਫਾਲਸ ਨੇੜੇ ਵੀਰਵਾਰ ਦੁਪਹਿਰ ਕਰੀਬ 1 ਵਜੇ ਇਹ ਹਾਦਸਾ ਵਾਪਰਿਆ।

ਪੁਲਿਸ ਨੇ ਸ਼ਾਮ ਸਮੇਂ ਅਪਡੇਟ ਜਾਰੀ ਕਰਦਿਆਂ ਦੱਸਿਆ ਕਿ ਇੱਥੇ ਹੋਰ ਹਾਈਕਰਜ਼ ਵੀ ਮੌਜੂਦ ਸਨ, ਜਿਨ੍ਹਾਂ ਵਿਚੋਂ 4 ਇਸ ਦੇ ਸ਼ਿਕਾਰ ਹੋਏ ਅਤੇ ਬਾਕੀਆਂ ਦੀ ਭਾਲ ਕੀਤੀ ਜਾ ਰਹੀ ਹੈ।

ਬੈਂਫ ਅਤੇ ਜੈਸਪਰ ਨੈਸ਼ਨਲ ਪਾਰਕ ਦੀਆਂ ਸੁਰੱਖਿਆ ਟੀਮਜ਼ ਦੁਪਹਿਰ ਕਰੀਬ 1.30 ਵਜੇ ਇੱਥੇ ਮੌਜੂਦ ਸਨ। ਕੈਲਗਰੀ ਅਤੇ ਐਡਮੰਟਨ ਤੋਂ ਸਟਾਰਸ ਏਅਰ ਐਂਬੂਲੈਂਸ ਭੇਜੀ ਗਈ। ਰਾਤ ਕਰੀਬ 9 ਵਜੇ ਦੱਸਿਆ ਗਿਆ ਕਿ ਇਕ ਵਿਅਕਤੀ ਨੇ ਦਮ ਤੋੜ ਦਿੱਤਾ ਹੈ।

ਇਸ ਲਈ ਪਾਰਕ ਨੇੜਲੇ ਹਾਈਵੇਅ 93 ਐਨ ਨੂੰ ਕਾਫੀ ਦੇਰ ਬੰਦ ਰੱਖਿਆ ਗਿਆ। ਲੋਕਾਂ ਨੂੰ ਇਸ ਇਲਾਕੇ ਤੋਂ ਦੂਰ ਰਹਿਣ ਦੀ ਅਪੀਲ ਕੀਤੀ ਗਈ ਹੈ। ਸੂਬੇ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਇਸ ਹਾਦਸੇ 'ਤੇ ਦੁੱਖ ਸਾਂਝਾ ਕੀਤਾ ਹੈ ਅਤੇ ਜ਼ਖਮੀਆਂ ਦੇ ਜਲਦੀ ਠੀਕ ਹੋਣ ਲਈ ਪ੍ਰਾਰਥਨਾ ਕੀਤੀ ਹੈ।