ਹਾਊਸ ਕਮੇਟੀ ਨੇ 'ਲੌਸਟ ਕੈਨੇਡੀਅਨਜ਼' ਬਿੱਲ ਵਿੱਚ ਭਾਸ਼ਾ, ਸੁਰੱਖਿਆ ਜਾਂਚ ਕੀਤੀ ਸ਼ਾਮਲ

ਕੈਨੇਡਾ ਦੇ ਹਾਊਸ ਔਫ ਕਾਮਨਜ਼ ਦੀ ਸਿਟੀਜ਼ਨਸ਼ਿਪ ਅਤੇ ਇਮੀਗ੍ਰੇਸ਼ਨ ਕਮੇਟੀ ਨੇ ਬਿੱਲ ਸੀ-3 ਜਿਸ ਨੂੰ "ਲੌਸਟ ਕੈਨੇਡੀਅਨਜ਼" ਬਿੱਲ ਵੀ ਕਿਹਾ ਜਾਂਦਾ ਹੈ ਦੇ ਤਹਿਤ ਨਾਗਰਿਕਤਾ ਲਈ ਅਰਜ਼ੀ ਦੇਣ ਵਾਲੇ ਲੋਕਾਂ ਲਈ ਕੁਝ ਵੱਡੇ ਪਰਿਵਰਤਨ ਸ਼ਾਮਲ ਕਰਨ ਦੀ ਸਿਫਾਰਸ਼ ਕੀਤੀ ਹੈ, ਜਿਸ ਨਾਲ ਵਿਦੇਸ਼ ਵਿਚ ਜਨਮੇ ਕੈਨੇਡੀਅਨ ਨਾਗਰਿਕਤਾ ਲਈ ਵੰਸ਼ ਦੇ ਆਧਾਰ 'ਤੇ ਨਾਗਰਿਕਤਾ ਪਾਸ ਕਰਨਾ ਸੀਮਤ ਹੋ ਸਕਦਾ ਹੈ।

ਪਾਰਲੀਮੈਂਟਰੀ ਕਮੇਟੀ ਵਲੋਂ ਮੰਗਲਵਾਰ ਨੂੰ ਸਿਫਾਰਸ਼ਾਂ ਨੂੰ ਦਿੱਤੀ ਗਈ ਮਨਜ਼ੂਰੀ ਵਿਚ ਸ਼ਾਮਲ ਹੈ ਕਿ ਬਿੱਲ ਸੀ-3 ਤਹਿਤ ਨਾਗਰਿਕਤਾ ਦੀ ਮੰਗ ਕਰਨ ਵਾਲੇ ਲੋਕਾਂ ਨੂੰ ਪ੍ਰਵਾਸੀ ਬਿਨੈਕਾਰ ਦੀ ਤਰ੍ਹਾਂ ਹੀ ਭਾਸ਼ਾ ਟੈਸਟ, ਕੈਨੇਡੀਅਨ ਹਿਸਟਰੀ ਬਾਰੇ ਜਾਣਕਾਰੀ ਅਤੇ ਸਕਿਓਰਟੀ ਚੈਕ ਵਿਚੋਂ ਲੰਘਣਾ ਹੋਵੇਗਾ। ਇਹ ਬਿੱਲ ਹੁਣ ਮਨਜ਼ੂਰੀ ਲਈ ਹਾਊਸ ਔਫ ਕੌਮਨਜ਼ ਵਿਚ ਵਾਪਸ ਜਾਵੇਗਾ।

ਸਿਫਾਰਸ਼ਾਂ ਅਨੁਸਾਰ, ਵੰਸ਼ ਦੇ ਆਧਾਰ 'ਤੇ ਕੈਨੇਡੀਅਨ ਨਾਗਰਿਕਤਾ ਪ੍ਰਾਪਤ ਕਰਨ ਲਈ 18 ਤੋਂ 55 ਸਾਲ ਦੀ ਉਮਰ ਦੇ ਲੋਕਾਂ ਨੂੰ ਇੰਗਲਿਸ਼ ਜਾਂ ਫ੍ਰੈਂਚ ਦੀ ਲੋੜੀਂਦੀ ਜਾਣਕਾਰੀ ਹੋਣੀ ਚਾਹੀਦੀ ਹੈ ਅਤੇ ਨਾਗਰਿਕ ਹੋਣ ਦੀਆਂ ਜ਼ਿੰਮੇਵਾਰੀਆਂ ਅਤੇ ਵਿਸ਼ੇਸ਼ ਅਧਿਕਾਰਾਂ ਦਾ ਵੀ ਗਿਆਨ ਹੋਣਾ ਚਾਹੀਦਾ ਹੈ। ਸਾਰੇ ਬਾਲਗਾਂ ਨੂੰ ਇਹ ਨਿਰਧਾਰਤ ਕਰਨ ਲਈ ਸੁਰੱਖਿਆ ਜਾਂਚਾਂ ਵਿਚੋਂ ਲੰਘਣਾ ਪਵੇਗਾ ਕਿ ਕੀ ਉਹ ਕੈਨੇਡਾ ਵਿਚ ਦਾਖ਼ਲ ਹੋਣ ਦੇ ਯੋਗ ਹਨ।