ਕਾਰਬਨ ਟੈਕਸ ਦੇ ਮੁੱਦੇ ’ਤੇ ਟਰੂਡੋ ਸਰਕਾਰ ਖ਼ਿਲਾਫ ਪੇਸ਼ ਕੀਤੇ ਗਏ ਅਵਿਸ਼ਵਾਸ ਪ੍ਰਸਤਾਵ ਨੂੰ ਕਰਨਾ ਪਿਆ ਹਾਰ ਦਾ ਸਾਹਮਣਾ

ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਲੀਵਰੇ ਵਲੋਂ ਕਾਰਬਨ ਟੈਕਸ ਦੇ ਮੁੱਦੇ ’ਤੇ ਟਰੂਡੋ ਸਰਕਾਰ ਖਿਲਾਫ ਪੇਸ਼ ਕੀਤੇ ਗਏ ਅਵਿਸ਼ਵਾਸ ਪ੍ਰਸਤਾਵ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ। ਬਲਾਕ ਕਿਊਬੇਕੋਇਸ ਅਤੇ ਐਨ.ਡੀ.ਪੀ. ਨੇ ਲਿਬਰਲ ਦੀ ਸਰਕਾਰ ਡਿੱਗਣ ਤੋਂ ਬਚਾਈ। 1 ਅਪ੍ਰੈਲ ਤੋਂ 15 ਡਾਲਰ ਵਧ ਰਹੇ ਕਾਰਬਨ ਟੈਕਸ ਨੂੰ ਰੋਕਣ ਲਈ ਪੋਲੀਵਰੇ ਦੀ ਇਸ ਹਫ਼ਤੇ ਇਹ ਦੂਜੀ ਕੋਸ਼ਿਸ਼ ਸੀ।

ਸਰਕਾਰ ਦੀ ਜਲਵਾਯੂ ਤਬਦੀਲੀ ਨੀਤੀ ਮੁਤਾਬਕ, 2030 ਤੱਕ ਹਰ ਸਾਲ ਕਾਰਬਨ ਟੈਕਸ ਵਿਚ 15 ਡਾਲਰ ਦਾ ਵਾਧਾ ਹੋਵੇਗਾ ਅਤੇ ਉਦੋਂ ਇਹ $170 ਪ੍ਰਤੀ ਟਨ ਤੱਕ ਪਹੁੰਚੇਗਾ। ਇਸ ਸਮੇਂ ਇਹ $64 ਪ੍ਰਤੀ ਟਨ ਹੈ ਜੋ ਅਗਲੇ ਮਹੀਨੇ $80 ਪ੍ਰਤੀ ਟਨ ਹੋ ਰਿਹਾ ਹੈ।

2019 ਵਿਚ ਇਹ $20 ਪ੍ਰਤੀ ਟਨ ਦੇ ਨਾਲ ਸ਼ੁਰੂ ਹੋਇਆ ਸੀ। 1 ਅਪ੍ਰੈਲ ਤੋਂ ਇਸ ਨਾਲ ਗੈਸੋਲੀਨ ਕੀਮਤਾਂ ਵਿਚ ਪ੍ਰਤੀ ਲਿਟਰ ਲਗਭਗ ਤਿੰਨ ਸੈਂਟ ਦਾ ਵਾਧਾ ਹੋਵੇਗਾ ਅਤੇ 2030 ਤੱਕ ਇਹ ਵਾਧਾ 40 ਸੈਂਟ ਪ੍ਰਤੀ ਲਿਟਰ ਤੱਕ ਪਹੁੰਚੇਗਾ।

ਹਾਲਾਂਕਿ, ਸਰਕਾਰ ਕਾਰਬਨ ਰਿਬੇਟ ਪ੍ਰੋਗਰਾਮ ਜ਼ਰੀਏ ਪਰਿਵਾਰਾਂ ਨੂੰ ਉਨ੍ਹਾਂ ਦੇ ਮੈਂਬਰਸ ਦੀ ਗਿਣਤੀ ਦੇ ਆਧਾਰ ’ਤੇ ਹਰ ਤਿਮਾਹੀ ਪੇਮੈਂਟ ਦੇ ਰਹੀ ਹੈ ਪਰ ਵਿਰੋਧੀ ਧਿਰ ਦੇ ਲੀਡਰ ਪੋਲੀਵਰੇ ਦਾ ਕਹਿਣਾ ਹੈ ਕਿ ਲੋਕ ਘਾਟੇ ਵਿਚ ਹਨ ਕਿਉਂਕਿ ਉਹ ਜਿੰਨਾ ਟੈਕਸ ਦੇ ਰਹੇ ਨੇ ਉਸ ਤੋਂ ਘੱਟ ਰਕਮ ਵਾਪਸ ਪ੍ਰਾਪਤ ਕਰ ਰਹੇ ਹਨ।

ਉਨ੍ਹਾਂ ਦਾ ਇਲਜ਼ਾਮ ਹੈ ਕਿ ਐੱਨ.ਡੀ.ਪੀ. ਲਿਬਰਲ ਦਾ ਕਾਰਬਨ ਟੈਕਸ ਕੈਨੇਡਾ ਦੇ ਨਿਕਾਸੀ ਟੀਚੇ ਨੂੰ ਪੂਰਾ ਕਰਨ ਵਿਚ ਫੇਲ੍ਹ ਸਾਬਤ ਹੋ ਰਿਹਾ ਹੈ, ਇਸ ਦੇ ਉਲਟ ਇਹ ਕਰਿਆਨੇ ਦੀ ਖਰੀਦਦਾਰੀ ਤੋਂ ਲੈ ਕੇ ਹਰ ਚੀਜ਼ ਦੀ ਕੀਮਤ ਵਧਾ ਰਿਹਾ ਹੈ।