13.75C Vancouver 13.75C VancouverJan 5, 2020 7:39 PM -
ਬ੍ਰਿਟਿਸ਼ ਕੋਲੰਬੀਆ ਵਿੱਚ ਘਰਾਂ ਦੇ ਸਾਲਾਨਾ ਮੁਲਾਂਕਣ ਨੇ ਜ਼ਾਹਿਰ ਕੀਤਾ ਹੈ ਕਿ ਲੋਅਰ ਮੇਨਲੈਂਡ ਵਿੱਚ ਰੀਅਲ ਇਸਟੇਟ ਮਾਰਕੀਟ ਵਿੱਚ ਠੱਲ੍ਹ ਪੈਣ ਦਾ ਸਿਲਸਿਲਾ ਜਾਰੀ ਹੈ ਪਰ ਵੈਨਕੂਵਰ ਆਇਲੈਂਡ ਅਤੇ ਸੂਬੇ ਦੇ ਹੋਰਨਾਂ ਹਿੱਸਿਆਂ ਵਿੱਚ ਪ੍ਰਾਪਰਟੀ ਮੁੱਲ ਸਥਿਰ ਹੋ ਰਹੇ ਹਨ।
ਬੀ.ਸੀ. ਅਸੈੱਸਮੈਂਟ ਵੱਲੋਂ ਜਾਰੀ ਕੀਤੇ ਅੰਕੜੇ ਦਰਸਾਉਂਦੇ ਹਨ ਕਿ 1 ਜੁਲਾਈ 2019 ਦੇ ਮੁਲਾਂਕਣ ਮੁਤਾਬਕ ਵੈਨਕੂਵਰ ਵਿੱਚ ਸਿੰਗਲ-ਫ਼ੈਮਲੀ ਘਰਾਂ ਦੇ ਮੁੱਲ ਵਿੱਚ 11 ਫ਼ੀ ਸਦੀ ਗਿਰਾਵਟ ਆਈ ਹੈ, ਭਾਵ ਇਹ ਮੁੱਲ $1.76 ਮਿਲੀਅਨ ਤੋਂ ਘਟ ਕੇ $1.57 ਮਿਲੀਅਨ ਹੋ ਗਿਆ ਹੈ।
ਵੈਨਕੂਵਰ ਸ਼ਹਿਰ ਦੇ ਪੱਛਮ ਵੱਲ ਯੂਨੀਵਰਸਿਟੀ ਐਨਡਾਓਮੈਂਟ ਲੈਂਡਜ਼ ’ਤੇ ਸਥਿਤ ਪ੍ਰਾਪਰਟੀਆਂ ਦੇ ਮੁੱਲ ਵਿੱਚ ਹੋਰ ਵੀ ਵੱਡੀ ਗਿਰਾਵਟ ਦਰਜ ਕੀਤੀ ਗਈ ਹੈ। ਇਸ ਇਲਾਕੇ ਵਿੱਚ ਪ੍ਰਾਪਰਟੀਆਂ ਦੇ ਮੁੱਲ 16 ਫ਼ੀ ਸਦੀ ਡਿੱਗੇ ਹਨ ਅਤੇ $5.9 ਮਿਲੀਅਨ ਤੋਂ ਘਟ ਕੇ $4.95 ਮਿਲੀਅਨ ਰਹਿ ਗਏ ਹਨ।
ਪਰ, ਸੈਲਾਨੀਆਂ ਲਈ ਖਿੱਚ ਦਾ ਕੇਂਦਰ ਰਹਿਣ ਵਾਲੇ ਸ਼ਹਿਰ ਵਿਸਲ੍ਹਰ ਅਤੇ ਉਸ ਨੇ ਨਾਲ ਲੱਗਦੇ ਪੈਂਬਰਟਨ ਵਿੱਚ ਪ੍ਰਾਪਰਟੀ ਦੇ ਮੁੱਲ 5 ਫ਼ੀ ਸਦੀ ਵਧੇ ਹਨ ਅਤੇ ਵੈਨਕੂਵਰ ਆਇਲੈਂਡ ਦੇ ਕੁਝ ਹਿੱਸਿਆਂ ਵਿੱਚ ਮਾਮੂਲੀ ਗਿਰਾਵਟ ਅਤੇ ਕੁਝ ਵਿੱਚ ਮਾਮੂਲੀ ਵਾਧੇ ਦਰਜ ਕੀਤੇ ਗਏ ਹਨ।
ਉੱਤਰੀ ਬੀ.ਸੀ. ਦੇ ਸ਼ਹਿਰਾਂ ਟੈਰੇਸ ਅਤੇ ਕਿੱਟੀਮੈਟ, ਜਿੱਥੇ ਐੱਲ.ਐੱਨ.ਜੀ. ਕੈਨੇਡਾ ਦਾ ਇੱਕ ਵੱਡਾ ਪ੍ਰੌਜੈੱਕਟ ਉਸਾਰਿਆ ਜਾ ਰਿਹਾ ਹੈ, ਵਿੱਚ ਪ੍ਰਾਪਰਟੀ ਮੁੱਲ 20 ਫ਼ੀ ਸਦੀ ਅਤੇ 41 ਫ਼ੀ ਸਦੀ ਵਧੇ ਹਨ।
ਬੀ.ਸੀ. ਦੀ ਐੱਨ.ਡੀ.ਪੀ. ਸਰਕਾਰ ਨੇ ਪ੍ਰਾਪਰਟੀ ਮੁੱਲਾਂ ਵਿੱਚ ਆ ਰਹੀ ਤੂਫ਼ਾਨੀ ਤੇਜ਼ੀ ਨੂੰ ਕਾਬੂ ਕਰਨ ਲਈ ਖ਼ਾਲੀ ਪਏ ਘਰਾਂ ਉੱਪਰ ਸਪੈਕੂਲੇਸ਼ਨ ਟੈਕਸ ਜਿਹੇ ਕੁੱਝ ਨਿਯਮ ਲਾਗੂ ਕੀਤੇ ਸਨ ਅਤੇ ਹਾਊਸਿੰਗ ਮਨਿਸਟਰ ਸਲੀਨਾ ਰੌਬਿਨਸੰਨ ਦਾ ਕਹਿਣਾ ਹੈ ਕਿ ਉਹ ਅਸੈੱਸਮੈਂਟ ਦੇ ਅੰਕੜਿਆਂ ਤੋਂ ਸੰਤੁਸ਼ਟ ਹਨ।
