ਕਿਊਬੈਕ ਪਬਲਿਕ ਸੈਕਟਰ ਦੇ ਹਜ਼ਾਰਾਂ ਕਾਮੇ ਅੱਜ ਹੜਤਾਲ 'ਤੇ

ਕਿਊਬੈਕ ਪਬਲਿਕ ਸੈਕਟਰ ਦੇ ਹਜ਼ਾਰਾਂ ਕਾਮੇ ਅੱਜ ਇੱਕ ਦਿਨ ਦੀ ਹੜਤਾਲ 'ਤੇ ਸਨ।

ਸਕੂਲ, ਸਿਹਤ ਸੰਭਾਲ ਸਹੂਲਤਾਂ ਅਤੇ ਸੋਸ਼ਲ ਸੇਵਾਵਾਂ ਦੇ 420,000 ਵਰਕਰਾਂ ਦੀ ਅਗਵਾਈ ਕਰਦੀਆਂ 4 ਯੂਨੀਅਨਾਂ ਦੇ ਸਾਂਝੇ ਮੋਰਚੇ ਨੇ ਤਨਖਾਹ ਵਾਧੇ ਨੂੰ ਲੈ ਕੇ ਸੂਬੇ ਦੇ ਨਵੀਨਤਮ ਇਕਰਾਰਨਾਮੇ ਦੀ ਪੇਸ਼ਕਸ਼ 'ਤੇ ਇਤਰਾਜ਼ ਜਤਾਇਆ।

ਸੂਬਾ ਸਰਕਾਰ ਨੇ ਪੰਜ ਸਾਲ ਦੌਰਾਨ 10.3 ਫੀਸਦੀ ਤਨਖਾਹ ਵਾਧੇ ਦੀ ਪੇਸ਼ਕਸ਼ ਦਿੱਤੀ ਹੈ ਅਤੇ ਨਾਲ ਹੀ ਕਿਹਾ ਹੈ ਕਿ ਹਰ ਵਰਕਰ ਨੂੰ $1,000 ਦੀ ਵਨ ਟਾਈਮ ਪੇਮੈਂਟ ਦਿੱਤੀ ਜਾਵੇਗੀ ਪਰ ਯੂਨੀਅਨਾਂ ਨੇ ਇਸ ਪ੍ਰਸਤਾਵ ਨੂੰ ਮਾਮੂਲੀ ਕਰਾਰ ਦਿੱਤਾ।

ਇਹ ਹੜਤਾਲ ਐਲੀਮੈਂਟਰੀ ਅਤੇ ਸੈਕੰਡਰੀ ਸਕੂਲ ਵਿੱਚ ਸਵੇਰੇ 10:30 ਵਜੇ ਤੱਕ ਅਤੇ ਜੂਨੀਅਰ ਕਾਲਜ ਵਿੱਚ ਦੁਪਹਿਰ ਤੱਕ ਲਈ ਸੱਦੀ ਗਈ ਸੀ।

ਉਥੇ ਹੀ, ਸਿਹਤ ਅਤੇ ਸੋਸ਼ਲ ਸੇਵਾਵਾਂ ਦਾ ਕਹਿਣਾ ਸੀ ਕਿ ਉਹ 70 ਤੋਂ 85 ਫੀਸਦੀ ਸਮਰੱਥਾ 'ਤੇ ਕੰਮ ਕਰਨਗੀਆਂ ਪਰ ਐਮਰਜੈਂਸੀ ਅਤੇ ICU ਸਰਵਿਸ ਵਿੱਚ ਕੋਈ ਕਮੀ ਨਹੀਂ ਹੋਵੇਗੀ।

ਉਥੇ ਹੀ, ਲਗਭਗ 65,000 ਕਿਊਬੈਕ ਅਧਿਆਪਕਾਂ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਨੇ ਚਿਤਾਵਨੀ ਦਿੱਤੀ ਕਿ ਜੇ ਸਮਝੌਤਾ ਨਾ ਹੋਇਆ ਤਾਂ ਉਹ 23 ਨਵੰਬਰ ਤੋਂ ਅਣਮਿੱਥੇ ਸਮੇਂ ਲਈ ਹੜਤਾਲ 'ਤੇ ਜਾ ਸਕਦੀ ਹੈ।