ਐਬਟਸਫੋਰਡ ਦੇ ਇੱਕ ਘਰ ਵਿਚ ਦੋ ਲੋਕਾਂ ਦੀਆਂ ਮਿਲੀਆਂ ਲਾਸ਼ਾਂ, ਪੁਲਿਸ ਕਰ ਰਹੀ ਹੈ ਜਾਂਚ

ਐਬਟਸਫੋਰਡ ਦੇ ਇੱਕ ਘਰ ਵਿਚ ਦੋ ਲੋਕਾਂ ਦੀਆਂ ਮਿਲੀਆਂ ਲਾਸ਼ਾਂ ਦੇ ਸਬੰਧ ਵਿਚ ਪੁਲਿਸ ਨੇ ਖੁਲਾਸਾ ਕੀਤਾ ਹੈ ਕਿ ਇਹ ਦੋਵੇਂ ਨਜ਼ਦੀਕੀ-ਸਾਥੀ ਸਨ ਅਤੇ ਇਹ ਘਰੇਲੂ ਹਿੰਸਾ ਦਾ ਮਾਮਲਾ ਸੀ। ਪੁਲਿਸ ਨੇ ਕਿਹਾ ਕਿ ਹੁਣ ਤੱਕ ਦੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਇਹ ਇੱਕ ਕਤਲ ਅਤੇ ਖੁਦਕੁਸ਼ੀ ਸੀ। ਇਸ ਮਾਮਲੇ ਵਿਚ ਹੋਰ ਕੋਈ ਵੀ ਸ਼ੱਕੀ ਨਹੀਂ ਹੈ।

ਇੰਟੀਗਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਦੀ ਸਾਰਜੈਂਟ ਫਰੈਡਾ ਫੋਂਗ ਨੇ ਕਿਹਾ ਕਿ 30 ਜੂਨ ਦੀ ਸ਼ਾਮ ਲਗਭਗ 7:46 ਵਜੇ ਐਬਟਸਫੋਰਡ ਪੁਲਿਸ ਦੇ ਗਸ਼ਤ ਅਧਿਕਾਰੀ ਨੂੰ ਮੈਕਕੀ ਰੋਡ ਦੇ 36000 ਬਲਾਕ ਵਿਚ ਇੱਕ ਘਰ ਵਿਚ ਝਗੜੇ ਦੀ ਰਿਪੋਰਟ ਮਿਲੀ, ਜਦੋਂ ਅਧਿਕਾਰੀ ਮੌਕੇ 'ਤੇ ਪਹੁੰਚੇ ਤਾਂ ਉਨ੍ਹਾਂ ਨੂੰ ਦੋ ਲੋਕ ਮ੍ਰਿਤਕ ਮਿਲੇ।

ਫੋਂਗ ਨੇ ਕਿਹਾ ਕਿ ਇਸ ਵਿਚ 80 ਸਾਲਾ ਪੁਰਸ਼ ਅਤੇ 80 ਸਾਲਾ ਔਰਤ ਸ਼ਾਮਲ ਸਨ ਜੋ ਇੱਕ ਹੀ ਘਰ ਵਿਚ ਇਕੱਠੇ ਰਹਿੰਦੇ ਸਨ।ਇੰਟੀਗਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਦੇ ਅਧਿਕਾਰੀ ਨੇ ਕਿਹਾ ਕਿ ਇਹ ਇੱਕ ਦੁਖਦਾਈ ਘਟਨਾ ਸੀ ਅਤੇ ਕਮਿਊਨਿਟੀ ਲਈ ਇੱਕ ਝਟਕਾ ਹੈ।