9.07C Vancouver 9.07C VancouverJul 21, 2021 8:58 AM -
ਅੱਜ ਬੁੱਧਵਾਰ ਨੂੰ ਅੰਮ੍ਰਿਤਸਰ ਵਿੱਚ, ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਨਵਜੋਤ ਸਿੰਧ ਸਿੱਧੂ ਦੇ ਘਰ, ਤਾਕਤ ਦਾ ਵਿਖਾਵਾ ਕਰਨ ਲਈ 62 ਐੱਮਐੱਲਏ ਪੁੱਜੇ।
ਸਿੱਧੂ ਦੇ ਦਫ਼ਤਰ ਮੁਤਾਬਕ, ਉਨ੍ਹਾਂ ਪਾਰਟੀ ਦੇ ਐੱਮਐੱਲਏਜ਼ ਨੂੰ ਸਵੇਰ ਦੇ ਖਾਣੇ 'ਤੇ ਸੱਦਿਆ ਸੀ।
ਅਮਰਿੰਦਰ ਸਿੰਘ ਦੇ ਮੀਡੀਆ ਸਲਾਹਕਾਰ ਨੇ ਬੀਤੇ ਕੱਲ ਟਵੀਟ ਕੀਤਾ ਸੀ,"ਮੁੱਖ ਮੰਤਰੀ ਸਿੱਧੂ ਨੂੰ ਓਦੋਂ ਤੱਕ ਨਹੀਂ ਮਿਲਣਗੇ, ਜਦੋਂ ਤੱਕ ਉਹ, ਉਨ੍ਹਾਂ ਖ਼ਿਲਾਫ਼ ਸੋਸ਼ਲ ਮੀਡੀਆ 'ਤੇ ਕੀਤੀਆਂ ਨਿੱਜੀ ਟਿੱਪਣੀਆਂ ਲਈ ਜਨਤਕ ਤੌਰ 'ਤੇ ਮੁਆਫ਼ੀ ਨਹੀਂ ਮੰਗ ਲੈਂਦੇ।"
ਪਰ ਸਿੱਧੂ ਦੇ ਘਰ ਇਕੱਠੇ ਹੋਏ ਐੱਮਲਏਜ਼ ਨੇ ਆਖਿਆ ਕਿ ਪਾਰਟੀ ਵਿੱਚ ਏਕਾ ਹੈ ਅਤੇ ਮੁਆਫ਼ੀ ਮੰਗਣ ਦੀ ਕੋਈ ਲੋੜ ਨਹੀਂ ਹੈ।
ਕਾਂਗਰਸ ਐੱਮਐੱਲਏ ਪ੍ਰਗਟ ਸਿੰਘ ਨੇ ਆਖਿਆ,"ਸਿੱਧੂ (ਸੀਐੱਮ ਤੋਂ) ਮੁਆਫ਼ੀ ਕਿਉਂ ਮੰਗਣ? ਇਹ ਕੋਈ ਜਨਤਕ ਮੁੱਦਾ ਨਹੀਂ । ਸੀਐੱਮ ਨੇ ਕਈ ਮੁੱਦੇ ਨਹੀਂ ਸੁਲਝਾਏ। ਇਸ ਤਰਾਂ ਤਾਂ ਫਿਰ ਉਨ੍ਹਾਂ ਨੂੰ ਵੀ ਜਨਤਾ ਤੋਂ ਮੁਆਫ਼ੀ ਮੰਗਣੀ ਚਾਹੀਦੀ ਹੈ।"
ਐੱਮਐੱਲਏ ਮਦਨ ਲਾਲ ਜਲਾਲਪੁਰ ਨੇ ਆਖਿਆ,"ਮੈਨੂੰ ਯਕੀਨ ਹੈ ਕਿ 2022 ਦੀਆਂ ਵਿਧਾਨ ਸਭਾ ਚੋਣਾਂ ਸਿੱਧੂ ਦੀ ਵਜ੍ਹਾ ਤੋਂ ਜਿੱਤੀਆਂ ਜਾ ਸਕਦੀਆਂ ਹਨ। ਸੀਐੱਮ ਦੇ ਸਲਾਹਕਾਰ ਉਨ੍ਹਾਂ ਨੂੰ ਗ਼ਲਤ ਰਾਹ 'ਤੇ ਪਾ ਰਹੇ ਹਨ। ਇਸ ਨਾਲ ਪੰਜਾਬ ਪੱਛੜ ਰਿਹਾ ਹੈ ।"
"ਜਿਸ ਦਿਨ ਸਿੱਧੂ ਨੂੰ ਪੰਜਾਬ ਕਾਂਗਰਸ ਦਾ ਪ੍ਰਧਾਨ ਥਾਪਿਆ ਗਿਆ ਸੀ, ਕਾਂਗਰਸ ਦੀਆਂ ਤਕਰੀਬਨ 5 ਫ਼ੀਸਦ ਵੋਟਾਂ ਵਧ ਗਈਆਂ ਸਨ। ਜੋ ਨੌਜਵਾਨ ਕਾਂਗਰਸ ਛੱਡ ਕੇ ਆਪ ਵਿੱਚ ਜਾ ਰਹੇ ਸਨ, ਉਹ ਵੀ ਇਸ ਕਰਕੇ ਪਰਤ ਆਏ ਹਨ। ਮੈਨੂੰ ਯਕੀਨ ਹੈ ਕਿ ਸਿੱਧੂ ਦੀ ਵਜ੍ਹਾ ਤੋਂ ਕਾਂਗਰਸ ਦੀਆਂ 20 ਫ਼ੀਸਦ ਵੋਟਾਂ ਵਧਣਗੀਆਂ,"ਉਨ੍ਹਾਂ ਅੱਗੇ ਆਖਿਆ।
ਜਲਾਲਪੁਰ ਨੇ ਇਹ ਵੀ ਆਖਿਆ ਕਿ ਕਾਮਯਾਬ ਹੋਣ ਲਈ, ਪਾਰਟੀ ਅਤੇ ਸੀਐੱਮ ਨੂੰ ਮਿਲ ਕੇ ਕੰਮ ਕਰਨਾ ਪਵੇਗਾ।
ਪੰਜਾਬ ਸੀਐੱਮ ਦੇ ਟਵੀਟ ਬਾਰੇ ਉਨ੍ਹਾਂ ਆਖਿਆ ਕਿ ਸਿੱਧੂ ਨੂੰ ਮੁਆਫ਼ੀ ਨਹੀਂ ਮੰਗਣੀ ਚਾਹੀਦੀ ਕਿਉਂਕਿ ਸੀਐੱਮ ਦਾ ਇਹ ਫਰਜ਼ ਹੈ ਕਿ ਉਹ ਸੂਬੇ ਦੇ ਲੋਕਾਂ ਦੀਆਂ ਮੁਸ਼ਕਲਾਂ ਦਾ ਹਾਲ ਕਰੇ, ਭਾਵੇਂ ਉਹ ਉਸਦੇ ਵਿਰੋਧ ਵਿੱਚ ਹੀ ਕਿਉਂ ਨਾ ਹੋਵੇ।
ਉਨ੍ਹਾਂ ਅੱਗੇ ਆਖਿਆ,"ਸਿੱਧੂ ਹੁਣ ਸਿਰਫ਼ ਸਿੱਧੂ ਨਹੀਂ ਰਹੇ; ਹੁਣ ਉਹ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਹਨ। ਉਨ੍ਹਾਂ ਅਜਿਹਾ ਕੁਝ ਨਹੀਂ ਕੀਤਾ, ਜਿਸਦੀ ਮੁਆਫ਼ੀ ਮੰਗੀ ਜਾਵੇ। ਪਰ ਹਾਂ, ਕਿਉਂਕਿ ਉਹ ਪਿਤਾ ਸਮਾਂ ਹਨ, ਇਸ ਲਈ ਸਿੱਧੂ ਨੂੰ ਉਨ੍ਹਾਂ ਦਾ ਆਦਰ ਕਰਨਾ ਚਾਹੀਦਾ ਹੈ।"
