ਪੀਅਰ ਪੌਲੀਐਵ ਖਿਲਾਫ਼ ਫਿਰ ਤੋਂ ਆਜ਼ਾਦ ਉਮੀਦਵਾਰ ਚੋਣ ਮੈਦਾਨ ਵਿਚ

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਖਿਲਾਫ਼ ਫਿਰ ਤੋਂ ਦਰਜਨਾਂ ਆਜ਼ਾਦ ਉਮੀਦਵਾਰ ਚੋਣ ਮੈਦਾਨ ਵਿਚ ਉਤਰ ਰਹੇ ਹਨ। ਐਲਬਰਟਾ ਦੀ ਬੈਟਲ ਰਿਵਰ-ਕਰੋਫੁੱਟ ਜ਼ਿਮਨੀ ਚੋਣ ਅਗਸਤ ਵਿਚ ਹੋਣੀ ਹੈ, ਜਿੱਥੋਂ ਪੌਲੀਐਵ ਵਾਪਸ ਹਾਊਸ ਆਫ ਕਾਮਨਜ਼ ਲਈ ਸੀਟ ਜਿੱਤਣ ਦੀ ਉਮੀਦ ਕਰ ਰਹੇ ਹਨ, ਇਸ ਜ਼ਿਮਨੀ ਚੋਣ ਲਈ ਹੁਣ ਤੱਕ 50 ਤੋਂ ਵੱਧ ਆਜ਼ਾਦ ਉਮੀਦਵਾਰ ਰਜਿਸਟਰ ਕਰਾ ਚੁੱਕੇ ਹਨ।

ਲੋਂਗੈਸਟ ਬੈਲਟ ਕਮੇਟੀ ਨਾਂ ਦੇ ਗਰੁੱਪ ਦਾ ਇਰਾਦਾ 100 ਉਮੀਦਵਾਰਾਂ ਨੂੰ ਰਜਿਸਟਰ ਕਰਵਾ ਕੇ ਰਿਕਾਰਡ ਤੋੜਨਾ ਹੈ। ਹਾਲ ਹੀ ਦੀਆਂ ਫੈਡਰਲ ਚੋਣਾਂ ਦੌਰਾਨ ਇਸ ਗਰੁੱਪ ਨੇ ਪੌਲੀਐਵ ਦੇ ਪੁਰਾਣੇ ਹਲਕੇ ਵਿਚ 91 ਆਜ਼ਾਦ ਉਮੀਦਵਾਰ ਖੜ੍ਹੇ ਕੀਤੇ ਸਨ।

ਉਥੇ ਹੀ, ਹੁਣ ਤੱਕ ਕਿਸੇ ਵੀ ਲਿਬਰਲ ਉਮੀਦਵਾਰ ਨੇ ਆਪਣਾ ਨਾਮ ਦਰਜ ਨਹੀਂ ਕਰਵਾਇਆ ਹੈ, ਪਰ ਪਾਰਟੀ ਨੇ ਐਲਾਨ ਕੀਤਾ ਹੈ ਕਿ ਡਾਰਸੀ ਸਪੇਡੀ ਇਸ ਸੀਟ ਲਈ ਚੋਣ ਲੜ ਰਹੇ ਹਨ ਅਤੇ ਆਪਣਾ ਪ੍ਰਚਾਰ ਕਰ ਰਹੇ ਹਨ। ਗੌਰਤਲਬ ਹੈ ਕਿ ਉਮੀਦਵਾਰਾਂ ਲਈ ਰਜਿਸਟ੍ਰੇਸ਼ਨ ਕਰਵਾਉਣ ਦੀ ਆਖਰੀ ਤਾਰੀਖ਼ 28 ਜੁਲਾਈ ਹੈ ਅਤੇ ਨਿਵਾਸੀ 18 ਅਗਸਤ ਨੂੰ ਵੋਟ ਪਾਉਣਗੇ।