ਅਮਰੀਕਾ ਵਿਚ ਭਾਰਤੀ ਮੂਲ ਦੇ ਵਿਅਕਤੀ ਨੂੰ ਪਤਨੀ ਨੂੰ ਮਾਰਨ ਦੀ ਸਾਜ਼ਿਸ਼ ਰਚਣ ਦੇ ਦੋਸ਼ 'ਚ ਕੀਤਾ ਗਿਆ ਗ੍ਰਿਫ਼ਤਾਰ

ਅਮਰੀਕਾ ਵਿਚ ਭਾਰਤੀ ਮੂਲ ਦੇ ਇੱਕ ਵਿਅਕਤੀ ਦਰਸ਼ਨ ਆਰ ਸੋਨੀ ਨੂੰ ਆਪਣੀ ਪਤਨੀ ਨੂੰ ਮਾਰਨ ਦੀ ਸਾਜ਼ਿਸ਼ ਰਚਣ ਦੇ ਦੋਸ਼ ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਉਸ 'ਤੇ ਕਤਲ ਦੀ ਕੋਸ਼ਿਸ਼ ਅਤੇ ਕਤਲ ਦੀ ਸਾਜ਼ਿਸ਼ ਰਚਣ ਦੇ ਦੋਸ਼ ਲਗਾਏ ਗਏ ਹਨ। ਇਹ ਇੰਡੀਆਨਾ ਦੀ ਹੈਮਿਲਟਨ ਕਾਊਂਟੀ ਦਾ ਮਾਮਲਾ ਹੈ।

ਰਿਪੋਰਟ ਮੁਤਾਬਕ, 44 ਸਾਲਾ ਸੋਨੀ ਨੇ ਆਪਣੇ ਇੱਕ ਕਰਮਚਾਰੀ ਕੇਨ ਕੌਕਸ ਨੂੰ ਸਾਜ਼ਿਸ਼ ਵਿਚ ਸ਼ਾਮਲ ਕੀਤਾ ਅਤੇ ਕਥਿਤ ਤੌਰ 'ਤੇ ਇਸ ਯੋਜਨਾ ਮੁਤਾਬਕ, ਪਤਨੀ ਨੂੰ ਪਹਿਲਾਂ ਜ਼ਹਿਰ ਦੇਣਾ ਸ਼ਾਮਲ ਸੀ ਅਤੇ ਜਦੋਂ ਇਹ ਸਾਜ਼ਿਸ਼ ਫੇਲ੍ਹ ਹੋ ਗਈ ਤਾਂ 16 ਮਈ 2025 ਨੂੰ ਘਰ ਵਿਚ ਚੋਰੀ ਦੀ ਯੋਜਨਾ ਬਣਾਈ ਗਈ, ਜਿਸ ਦੌਰਾਨ ਹੱਤਿਆ ਹੋਣੀ ਸੀ।

ਇਹ ਮਾਮਲਾ ਉਦੋਂ ਖੁੱਲ੍ਹ ਗਿਆ ਜਦੋਂ ਇੱਕ ਮੁਖਬਿਰ ਨੇ ਪੁਲਿਸ ਨੂੰ ਸਾਜ਼ਿਸ਼ ਬਾਰੇ ਸੂਹ ਦਿੱਤੀ। ਪੁਲਿਸ ਵਲੋਂ ਕਾਰਵਾਈ 'ਤੇ ਕੌਕਸ ਨੇ ਮੰਨਿਆ ਕਿ ਸੋਨੀ ਨੇ ਉਸ ਨੂੰ ਇਸ ਵਾਰਦਾਤ ਦੇ ਬਦਲੇ ਪੈਸੇ ਦੀ ਪੇਸ਼ਕਸ਼ ਕੀਤੀ ਸੀ। ਉਥੇ ਹੀ, ਇਸ ਮਾਮਲੇ ਵਿਚ ਪੀੜਤਾ ਨੇ ਕਥਿਤ ਤੌਰ 'ਤੇ ਸੋਨੀ ਨੂੰ ਬੇਕਸੂਰ ਦੱਸਿਆ ਹੈ।