16.06C Vancouver 16.06C VancouverMay 15, 2025 5:00 PM - Connect Newsroom
ਸਿੰਗਾਪੁਰ ਵਿਚ ਇੱਕ 20 ਸਾਲਾ ਭਾਰਤੀ ਨੌਜਵਾਨ ਨੂੰ ਏਅਰ ਹੋਸਟੇਸ ਨਾਲ ਛੇੜਛਾੜ ਕਰਨ ਦੇ ਦੋਸ਼ ਵਿਚ ਤਿੰਨ ਹਫ਼ਤੇ ਜੇਲ੍ਹ ਦੀ ਸਜ਼ਾ ਹੋਈ ਹੈ। ਰਜਤ ਨਾਮ ਦੇ ਭਾਰਤੀ ਨੇ 28 ਫਰਵਰੀ ਨੂੰ ਸਿੰਗਾਪੁਰ ਏਅਰਲਾਈਨਜ਼ ਦੀ ਪਰਥ ਤੋਂ ਸਿੰਗਾਪੁਰ ਜਾ ਰਹੀ ਉਡਾਣ ਦੌਰਾਨ ਏਅਰ ਹੋਸਟੇਸ ਨੂੰ ਪਿੱਛੇ ਤੋਂ ਫੜ ਕੇ ਆਪਣੇ ਨਾਲ ਪਖਾਨੇ ਵਿਚ ਖਿੱਚ ਲਿਆ ਸੀ।
ਇੱਕ ਯਾਤਰੀ ਨੇ ਉਸ ਨੂੰ ਇਹ ਕਰਦੇ ਦੇਖਿਆ ਅਤੇ ਤੁਰੰਤ ਏਅਰ ਹੋਸਟੇਸ ਨੂੰ ਛੁਡਾ ਕੇ ਬਾਹਰ ਕੱਢਿਆ ਸੀ। ਇਸ ਮਗਰੋਂ ਜਹਾਜ਼ ਦੇ ਚਾਂਗੀ ਏਅਰਪੋਰਟ 'ਤੇ ਪਹੁੰਚਣ ਤੋਂ ਬਾਅਦ ਰਜਤ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਸੀ। ਉਸ ਨੇ ਬੁੱਧਵਾਰ ਕੋਰਟ ਵਿਚ ਦੋਸ਼ ਸਵੀਕਾਰ ਕੀਤਾ।
ਸਿੰਗਾਪੁਰ ਦੇ ਕਾਨੂੰਨ ਅਨੁਸਾਰ, ਛੇੜਛਾੜ ਦੇ ਦੋਸ਼ੀ ਪਾਏ ਜਾਣ ਵਾਲੇ ਵਿਅਕਤੀ ਨੂੰ ਤਿੰਨ ਸਾਲ ਤੱਕ ਦੀ ਕੈਦ, ਜੁਰਮਾਨਾ, ਬੇਂਤ ਮਾਰਨ ਜਾਂ ਅਜਿਹੀ ਕੋਈ ਵੀ ਸਜ਼ਾ ਹੋ ਸਕਦੀ ਹੈ। ਹਾਲਾਂਕਿ, ਰਜਤ ਦੇ ਵਕੀਲ ਨੇ ਅਦਾਲਤ ਨੂੰ ਕਿਹਾ ਕਿ ਉਸ ਦੇ ਮੁਵੱਕਿਲ ਦਾ ਸਾਫ਼-ਸੁਥਰਾ ਰਿਕਾਰਡ ਅਤੇ ਸਕੂਲ ਵਿਚ ਚੰਗਾ ਆਚਰਣ ਉਸ ਨੂੰ ਮਾਮਲੇ ਵਿਚ ਘੱਟ ਸਜ਼ਾ ਦੇਣ ਦੀ ਆਗਿਆ ਦਿੰਦਾ ਹੈ।
