16.61C Vancouver 16.61C VancouverJul 19, 2021 10:29 AM -
ਮਾਹੌਲ ਵਿਗਾੜਨ ਦੇ ਮਾਮਲੇ ਵਿੱਚ ਅਮਰੀਕਾ 'ਚ ਰਹਿੰਦੇ ਪਾਬੰਦੀਸ਼ੁਦਾ ਜਥੇਬੰਦੀ ਸਿਖਸ ਫਾਰ ਜਸਟਿਸ ਦੇ ਆਪੂੰ ਬਣੇ ਕਨਵੀਨਰ, ਗੁਰਪਤਵੰਤ ਸਿੰਘ ਪੰਨੂੰ 'ਤੇ, ਇੰਡੀਅਨ ਵਰਲਡ ਫੋਰਮ ਵੱਲੋਂ ਭਾਰਤੀਆਂ ਵਿੱਚ ਮੁਲਕ ਵਿਰੋਧੀ ਭਾਵਨਾਵਾਂ ਭਰਣ ਅਤੇ ਉਨ੍ਹਾਂ ਨੂੰ ਵੱਖਵਾਦੀ ਤੇ ਵਿਗਾੜ ਵਾਲੀਆਂ ਕਾਰਵਾਈਆਂ ਕਰਨ ਲਈ ਭੜਕਾਉਣ ਲਈ ਅਪਰਾਧਿਕ ਮਾਮਲਾ ਦਰਜ ਕਰਨ ਦੀ ਮੰਗ ਕੀਤੀ ਗਈ ਹੈ।
ਇੱਕ ਅਧਿਕਾਰਿਤ ਬਿਆਨ ਵਿੱਚ ਇੰਡੀਅਨ ਵਰਲਡ ਫੋਰਮ ਵੱਲੋਂ ਆਖਿਆ ਗਿਆ ਹੈ ਕਿ ਪੰਨੂ ਨੇ 1:52 ਮਿੰਟਾਂ ਦੀ ਇੱਕ ਵੀਡੀਓ ਪਾਈ ਗਈ ਹੈ, ਜਿਸ ਵਿੱਚ ਉਸ ਵੱਲੋਂ ਸਿੱਖਾਂ ਨੂੰ 22 ਜੁਲਾਈ ਨੂੰ, ਕੌਮੀ ਰਾਜਧਾਨੀ ਵਿੱਚ ਕਿਰਪਾਨਾਂ ਅਤੇ ਖ਼ਾਲਿਸਤਾਨੀ ਝੰਡੇ ਲੈਕੇ, ਮੁਲਕ ਵਿਰੋਧੀ ਨਾਹਰੇ ਲਾਉਣ ਲਈ ਆਖਿਆ ਗਿਆ ਹੈ।
ਦਿੱਲੀ ਪੁਲਿਸ ਦੇ ਕਮਿਸ਼ਨਰ ਨੂੰ ਭੇਜੇ ਇੱਕ ਸੁਨੇਹੇ ਵਿੱਚ ਫੋਰਮ ਨੇ ਮੰਗ ਕੀਤੀ ਹੈ ਕਿ ਪੰਨੂੰ ਅਤੇ ਉਸਦੇ ਵਿਦੇਸ਼ਾਂ 'ਚ ਵੱਸਦੇ ਸਮਰਥਕਾਂ ਦੇ ਵਿਦੇਸ਼ੀ ਧਰਤੀ ਤੋਂ ਭਾਰਤ ਵਿਰੋਧੀ ਕਾਰਵਾਈਆਂ ਕਰਨ 'ਤੇ ਕਰੈਕਡਾਊਨ ਜਾਰੀ ਕਰਨ ਲਈ ਇੰਟਰਪੋਲ ਦੀ ਮਦਦ ਲਈ ਜਾਵੇ।
ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਪੰਨੂੰ ਵੱਲੋਂ ਖ਼ਾਲਿਸਤਾਨ ਨੂੰ ਉਤਸ਼ਾਹਿਤ ਕਰਨ ਲਈ ਬੁਰੀ ਤਰਾਂ ਨਾਕਾਮ ਮੁਹਿੰਮ "ਰੈਫਰੈਂਡਮ 2020 " ਵਿੱਢੀ ਗਈ ਸੀ, ਜਿਸਨੂੰ ਮੁਲਕ 'ਚ ਰਹਿੰਦੇ ਸਿੱਖਾਂ ਵੱਲੋਂ ਵੀ ਸਮਰਥਨ ਨਹੀਂ ਮਿਲਿਆ ਸੀ।
ਫੋਰਮ ਦੇ ਦੱਸੇ ਮੁਤਾਬਕ, ਪੰਨੂੰ ਕੈਨੇਡਾ, ਯੂਕੇ ਅਤੇ ਯੂਐੱਸ ਵਿਚਲੇ ਆਪਣੇ ਸਮਰਥਕਾਂ ਨਾਲ ਆਈਐੱਸਆਈ ਪਾਕਿਸਤਾਨ ਅਤੇ ਹੋਰਾਂ ਨਾਲ ਮਿਲ ਕੇ, ਪੰਜਾਬ ਦੇ ਹਾਲਾਤ ਵਿਗਾੜਨ ਲਈ, ਕਾਨੂੰਨ ਅਤੇ ਪ੍ਰਬੰਧ ਵਿਗਾੜਨ ਲਈ ਅਤੇ ਸ਼ਰਾਰਤੀ ਨੌਜਵਾਨਾਂ ਨੂੰ ਕੁਰਾਹੇ ਪਾ ਰਿਹਾ ਹੈ।
ਇੰਡੀਅਨ ਵਰਲਡ ਫੋਰਮ ਵੱਲੋਂ ਇਹ ਆਖਦਿਆਂ ਕਿ ਸਿੱਖ, ਮੁਲਕ ਦੀ ਪ੍ਰਭੁਤਾ ਅਤੇ ਅਖੰਡਤਾ ਦੇ ਨਾਲ ਅਤੇ ਕੌਮੀ ਫੋਰਸ ਦੇ ਨਾਲ ਖੜੇ ਹਨ, ਪੰਨੂੰ ਖ਼ਿਲਾਫ਼ ਛੇਤੀ ਤੋਂ ਛੇਤੀ ਸਖ਼ਤ ਦੰਡਕਾਰੀ ਕਾਰਵਾਈ ਦੀ ਮੰਗ ਕੀਤੀ ਗਈ ਹੈ।
