ਲੈਂਗਫੋਰਡ 'ਚ ਚੋਰੀ ਦੀ ਗੱਡੀ ਹੋਈ ਕਰੈਸ਼, ਪੁਲਿਸ ਕਰ ਰਹੀ ਜਾਂਚ

ਲੈਂਗਫੋਰਡ ਵਿਚ ਰਾਤ ਲਗਭਗ 11 ਵਜੇ ਇੱਕ ਚੋਰੀ ਦੀ ਗੱਡੀ ਇੱਟਾਂ ਦੀ ਇੱਕ ਰਿਟੇਨਿੰਗ ਦੀਵਾਰ ਨਾਲ ਟਕਰਾ ਗਈ। ਵੈਸਟ ਸ਼ੋਰ ਆਰਸੀਐਮਪੀ ਨੇ ਕਿਹਾ ਕਿ ਇਹ ਗ੍ਰੇਅ ਰੰਗ ਵਾਲੀ 2004 ਮਾਡਲ ਦੀ ਜੀਐਮਸੀ ਜਿੰਮੀ ਸੀ, ਘਟਨਾ ਲੈਂਗਫੋਰਡ ਵਿਚ ਪੀਟ ਰੋਡ ਦੇ 2600 ਬਲਾਕ ਵਿਚ ਹੋਈ। ਪੁਲਿਸ ਨੇ ਕਿਹਾ ਕਿ ਗੱਡੀ ਇਸ ਲੋਕੇਸ਼ਨ ਵਿਚ ਇੱਕ ਮਲਟੀ ਯੂਨਿਟ ਰਿਹਾਇਸ਼ ਨਾਲ ਟਕਰਾਉਂਦੀ-ਟਕਰਾਉਂਦੀ ਬਚੀ।

ਇਨਵੈਸਟੀਗੇਟਰਸ ਨੇ ਕਿਹਾ ਕਿ ਉਨ੍ਹਾਂ ਨੂੰ ਚਸ਼ਮਦੀਦਾਂ ਨੇ ਦੱਸਿਆ ਕਿ ਹਾਦਸੇ ਤੋਂ ਤੁਰੰਤ ਬਾਅਦ ਕਈ ਸ਼ੱਕੀ ਵਿਅਕਤੀਆਂ ਨੂੰ ਗੱਡੀ ਵਿਚੋਂ ਬਾਹਰ ਨਿਕਲਦੇ ਦੇਖਿਆ ਗਿਆ।

ਪੁਲਿਸ ਵਲੋਂ ਹੁਣ ਇਨ੍ਹਾਂ ਸ਼ੱਕੀਆਂ ਦੀ ਪਛਾਣ ਕਰਨ ਲਈ ਜਨਤਾ ਤੋਂ ਮਦਦ ਮੰਗੀ ਗਈ ਹੈ। ਪੁਲਿਸ ਨੇ ਕਿਹਾ ਕਿ ਇਹ 15 ਤੋਂ 20 ਸਾਲ ਦੀ ਉਮਰ ਦੇ ਲਗਭਗ 2-4 ਨੌਜਵਾਨ ਸਨ। ਹਾਦਸਾਗ੍ਰਸਤ ਹੋਈ ਗੱਡੀ ਪੁਲਿਸ ਕਬਜ਼ੇ ਵਿਚ ਹੈ।