ਕੈਨੇਡਾ ਦੌਰੇ ’ਤੇ ਆਉਣਗੇ ਇਟਲੀ ਦੇ ਪ੍ਰਧਾਨ ਮੰਤਰੀ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਦਫਤਰ ਦਾ ਕਹਿਣਾ ਹੈ ਕਿ ਇਟਲੀ ਦੀ ਪੀ. ਐੱਮ. ਜਾਰਜੀਆ ਮੇਲੋਨੀ ਅਗਲੇ ਮਹੀਨੇ ਕੈਨੇਡਾ ਦੇ ਦੌਰੇ ’ਤੇ ਆ ਰਹੇ ਹਨ। 2022 ਵਿਚ ਇਟਲੀ ਦੀ ਪ੍ਰਧਾਨ ਮੰਤਰੀ ਵਜੋਂ ਚੁਣੇ ਜਾਣ ਤੋਂ ਬਾਅਦ ਮੇਲੋਨੀ ਦਾ ਇਹ ਪਹਿਲਾ ਕੈਨੇਡਾ ਦੌਰਾ ਹੋਵੇਗਾ। 2 ਮਾਰਚ ਨੂੰ ਉਹ ਟੋਰਾਂਟੋ ਪਹੁੰਚਣਗੇ। ਇਹ ਉਨ੍ਹਾਂ ਦਾ ਕਾਫ਼ੀ ਮਹੱਤਵਪੂਰਨ ਦੌਰਾ ਹੋਵੇਗਾ, ਪਿਛਲੀ ਵਾਰ ਟਰੂਡੋ ਅਤੇ ਮੇਲੋਨੀ ਦੀ ਮੁਲਾਕਾਤ ਜਾਪਾਨ ਵਿਚ ਜੀ-7 ਮੀਟਿੰਗ ਦੌਰਾਨ ਹੋਈ ਸੀ।

ਪ੍ਰਧਾਨ ਮੰਤਰੀ ਟਰੂਡੋ ਨੇ ਉਸ ਦੌਰਾਨ ਐੱਲ.ਜੀ.ਬੀ.ਟੀ. ਦੇ ਅਧਿਕਾਰਾਂ ਨੂੰ ਲੈ ਕੇ ਇਟਲੀ ਦੀ ਔਨ ਕੈਮਰਾ ਆਲੋਚਨਾ ਕੀਤੀ ਸੀ, ਜਿਸ ’ਤੇ ਦੋਹਾਂ ਲੀਡਰਸ ਵਿਚਕਾਰ ਤਲਖੀ ਦੇਖੀ ਗਈ। ਟਰੂਡੋ ਦਾ ਮੇਲੋਨੀ ਨੂੰ ਕਹਿਣਾ ਸੀ ਕਿ ਕੈਨੇਡਾ ਐੱਲ.ਜੀ.ਬੀ.ਟੀ. ਅਧਿਕਾਰਾਂ ਦੇ ਮਾਮਲੇ ਵਿਚ ਇਟਲੀ ਵਲੋਂ ਚੁੱਕੇ ਜਾ ਰਹੇ ਕੁਝ ਕਦਮਾਂ ਬਾਰੇ ਚਿੰਤਤ ਹੈ।*

ਪੀ. ਐੱਮ. ਟਰੂਡੋ ਦੀ ਟਿੱਪਣੀ ਨਾਲ ਮੇਲੋਨੀ ਕਾਫ਼ੀ ਨਾਰਾਜ਼ ਨਜ਼ਰ ਆਈ, ਮੀਟਿੰਗ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਮੇਲੋਨੀ ਨੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ’ਤੇ ਫਰਜ਼ੀ ਖ਼ਬਰਾਂ ਦਾ ਸ਼ਿਕਾਰ ਹੋਣ ਦਾ ਦੋਸ਼ ਲਗਾਇਆ ਅਤੇ ਇੱਥੋਂ ਤੱਕ ਕਿਹਾ ਕਿ ਟਰੂਡੋ ਆਪਣੀਆਂ ਟਿੱਪਣੀਆਂ ਵਿਚ ਥੋੜ੍ਹੇ ਲਾਪਰਵਾਹ ਸਨ।

ਟਰੂਡੋ ਦੇ ਦਫ਼ਤਰ ਨੇ ਲੇਟਸਟ ਰਿਲੀਜ਼ ਵਿਚ ਕਿਹਾ ਕਿ ਮੇਲੋਨੀ ਦੇ ਕੈਨੇਡਾ ਦੌਰੇ ਦੌਰਾਨ ਉਨ੍ਹਾਂ ਨਾਲ ਯੂਕਰੇਨ ਤੇ ਮਿਡਲ ਈਸਟ ਦੇ ਜੰਗੀ ਹਾਲਾਤ ਅਤੇ ਅਫਰੀਕੀ ਭਾਈਵਾਲ ਨਾਲ ਸਹਿਯੋਗ ਵਧਾਉਣ ਸਮੇਤ ਹੋਰ ਗਲੋਬਲ ਚੁਣੌਤੀਆਂ ’ਤੇ ਵਿਚਾਰ-ਚਰਚਾ ਹੋਵੇਗੀ।