ਰੋਜ਼ਮਰਾ ਦੀਆਂ ਚੀਜ਼ਾਂ ’ਤੇ ਸੂਬਾਈ ਸੇਲ ਟੈਕਸ ਹਟਾਉਣ ਦੀ ਜਗਮੀਤ ਸਿੰਘ ਨੇ ਕੀਤੀ ਮੰਗ

ਐਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੇ ਕੈਨੇਡਾ ਭਰ ਦੇ ਪ੍ਰੀਮੀਅਰਾਂ ਨੂੰ ਪੱਤਰ ਲਿਖ ਕੇ ਰੋਜ਼ਮਰਾ ਦੀਆਂ ਚੀਜ਼ਾਂ ’ਤੇ ਸੂਬਾਈ ਸੇਲ ਟੈਕਸ ਹਟਾਉਣ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਕੰਮਕਾਜੀ ਲੋਕ ਸੈੱਲ ਫੋਨ ਦੇ ਬਿੱਲ ਤੋਂ ਲੈ ਕੇ ਗ੍ਰੋਸਰੀ ਤੱਕ ਦੀ ਮਹਿੰਗਾਈ ਦਾ ਸਾਹਮਣਾ ਕਰ ਰਹੇ ਹਨ, ਜਗਮੀਤ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਦਾ ਫੈਡਰਲ ਲੈਵਲ ’ਤੇ ਜੀ.ਐੱਸ.ਟੀ. ਘਟਾਉਣ ਦਾ ਸੰਕਲਪ ਅਤੇ ਸੂਬਾਈ ਲੈਵਲ ’ਤੇ ਸੇਲ ਟੈਕਸ ਵਿਚ ਛੋਟ ਲੋਕਾਂ ਨੂੰ ਰਾਹਤ ਦੇਣ ਵਿਚ ਕਾਫੀ ਮਦਦਗਾਰ ਹੋ ਸਕਦੇ ਹਨ।

ਜਗਮੀਤ ਸਿੰਘ ਨੇ ਕਿਹਾ ਕਿ ਜੇ ਸੈਂਟਰ ਵਿਚ ਉਨ੍ਹਾਂ ਦੀ ਸਰਕਾਰ ਬਣੀ ਤਾਂ ਉਹ ਕਰਿਆਨਾ, ਡਾਇਪਰ, ਬੱਚਿਆਂ ਦੇ ਕੱਪੜੇ, ਸੈੱਲ ਫ਼ੋਨ ਅਤੇ ਇੰਟਰਨੈੱਟ ਬਿੱਲ ’ਤੇ ਜੀਐੱਸਟੀ ਹਟਾ ਦੇਣਗੇ ਅਤੇ ਇਸ ਦੀ ਭਰਪਾਈ ਵੱਡੀਆਂ ਕੰਪਨੀਆਂ ’ਤੇ ਵਾਧੂ ਲਾਭ ਟੈਕਸ ਲਗਾ ਕੇ ਕੀਤੀ ਜਾਵੇਗੀ।

ਗੌਰਤਲਬ ਹੈ ਕਿ ਜਗਮੀਤ ਸਿੰਘ ਅਗਲੀਆਂ ਫੈਡਰਲ ਚੋਣਾਂ ਵਿਚ ਟਰੂਡੋ ਅਤੇ ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਲੀਵਰੇ ਖਿਲਾਫ ਮੈਦਾਨ ਵਿਚ ਉਤਰਨਗੇ। ਲਿਬਰਲ ਸਰਕਾਰ ਤੋਂ ਸਮਰਥਨ ਵਾਪਸ ਲੈਣ ਤੋਂ ਬਾਅਦ ਜਗਮੀਤ ਸਿੰਘ ਨੇ ਘੋਸ਼ਣਾ ਕੀਤੀ ਸੀ ਕਿ ਉਹ ਕੈਨੇਡਾ ਦੇ ਅਗਲੇ ਪ੍ਰਧਾਨ ਮੰਤਰੀ ਬਣਨ ਲਈ ਚੋਣ ਲੜਨਗੇ।