ਜਗਮੀਤ ਸਿੰਘ ਹਾਰੇ ਆਪਣੀ ਬਰਨਬੀ ਸੈਂਟਰਲ ਸੀਟ

ਬੀ.ਸੀ. ਵਿਚ ਫੈਡਰਲ ਐਨ.ਡੀ.ਪੀ. ਨੂੰ ਵੱਡਾ ਝਟਕਾ ਲੱਗਾ ਹੈ। ਜਗਮੀਤ ਸਿੰਘ ਆਪਣੀ ਬਰਨਬੀ ਸੈਂਟਰਲ ਸੀਟ ਹਾਰ ਗਏ। ਉਹ ਲਿਬਰਲ ਉਮੀਦਵਾਰ ਵੇਡ ਚੈਂਗ ਤੋਂ 12,032 ਵੋਟਾਂ ਦੇ ਫਰਕ ਨਾਲ ਤੀਜੇ ਸਥਾਨ 'ਤੇ ਰਹੇ। ਉਨ੍ਹਾਂ ਦੇ ਨਾਲ ਹੀ ਵੈਨਕੂਵਰ ਆਈਲੈਂਡ ਵਿਚ ਪਾਰਟੀ ਨੂੰ ਭਾਰੀ ਨੁਕਸਾਨ ਹੋਇਆ ਅਤੇ ਮੈਟਰੋ ਵੈਨਕੂਵਰ ਦੀਆਂ ਕੁਝ ਸੀਟਾਂ ਵੀ ਹਾਰ ਗਈ।

ਹਾਊਸ ਆਫ ਕਾਮਨਜ਼ ਵਿਚ ਐੱਨ. ਡੀ. ਪੀ. ਦੀਆਂ ਕੁੱਲ 24 ਸੀਟਾਂ ਵਿਚੋਂ 12 ਬੀ.ਸੀ. ਵਿਚ ਹੀ ਸਨ ਅਤੇ ਇਨ੍ਹਾਂ ਵਿਚੋਂ ਵੀ ਪੰਜ ਵੈਨਕੂਵਰ ਆਈਲੈਂਡ ਵਿਚ ਸਨ। ਹੁਣ ਬ੍ਰਿਟਿਸ਼ ਕੋਲੰਬੀਆ ਵਿਚ ਫੈਡਰਲ ਐੱਨ. ਡੀ. ਪੀ. ਮਹਿਜ ਤਿੰਨ ਸੀਟਾਂ 'ਤੇ ਸਿਮਟ ਗਈ ਹੈ ਅਤੇ ਇਸ ਦੇ ਨਾਲ ਹੀ ਜਗਮੀਤ ਸਿੰਘ ਨੇ ਪਾਰਟੀ ਦੇ ਪ੍ਰਧਾਨ ਵਜੋਂ ਅਹੁਦਾ ਛੱਡਣ ਦੀ ਘੋਸ਼ਣਾ ਕੀਤੀ ਹੈ। ਇਸ ਮੌਕੇ ਉਹ ਕਾਫੀ ਭਾਵੁਕ ਵੀ ਹੋਏ। ਉਨ੍ਹਾਂ ਕਿਹਾ ਕਿ ਪਾਰਟੀ ਵਲੋਂ ਜਿਵੇਂ ਹੀ ਅੰਤ੍ਰਿਮ ਲੀਡਰ ਦਾ ਨਾਮ ਅੱਗੇ ਕੀਤਾ ਜਾਵੇਗਾ, ਉਹ ਅਸਤੀਫਾ ਦੇ ਦੇਣਗੇ।

ਗੌਰਤਲਬ ਹੈ ਕਿ ਬੀ.ਸੀ. ਵਿਚ ਐੱਨਡੀਪੀ ਦਾ ਸਮਰਥਨ 2021 ਦੀਆਂ ਚੋਣਾਂ ਵਿਚ 29 ਫੀਸਦੀ ਸੀ, ਜੋ 2025 ਵਿਚ ਸਿਰਫ਼ 13 ਫੀਸਦੀ ਰਹਿ ਗਿਆ। ਜਗਮੀਤ ਸਿੰਘ ਨੇ 1 ਅਕਤੂਬਰ 2017 ਨੂੰ ਫੈਡਰਲ ਐਨ.ਡੀ.ਪੀ. ਦੇ ਲੀਡਰ ਦੇ ਰੂਪ ਵਿਚ ਪਾਰਟੀ ਦੀ ਕੌਮੀ ਪੱਧਰ 'ਤੇ ਕਮਾਨ ਸੰਭਾਲੀ ਸੀ।