ਜੇਸਨ ਕੈਨੀ ਮਈ ਦੇ ਸਮਾਗਮਾਂ ਵਿੱਚ ਐਲਬਰਟਾ ਵੱਖਵਾਦ 'ਤੇ ਕਰਨਗੇ ਬਹਿਸ

ਐਲਬਰਟਾ ਦੇ ਸਾਬਕਾ ਪ੍ਰੀਮੀਅਰ ਜੇਸਨ ਕੈਨੀ ਸੂਬੇ ਦੇ ਕੈਨੇਡਾ ਤੋਂ ਵੱਖ ਹੋਣ ਦੇ ਮੁੱਦੇ 'ਤੇ ਮਸ਼ਹੂਰ ਵਕੀਲ ਕੀਥ ਵਿਲਸਨ ਨਾਲ ਜਨਤਕ ਬਹਿਸ ਵਿੱਚ ਹਿੱਸਾ ਲੈਣ ਜਾ ਰਹੇ ਹਨ। ਇਸ ਸਬੰਧੀ ਪਹਿਲੀ ਬਹਿਸ 1 ਮਈ ਨੂੰ ਐਡਮਿੰਟਨ ਵਿੱਚ ਸਿਵਿਟਸ ਕੈਨੇਡਾ ਸੰਸਥਾ ਵੱਲੋਂ ਕਰਵਾਈ ਜਾਵੇਗੀ।

ਦੂਜੀ ਬਹਿਸ ਮਈ ਦੇ ਅਖੀਰ ਵਿੱਚ ਕੈਲਗਰੀ ਵਿੱਚ ਐਰਸਟੋਟਲ ਫਾਊਂਡੇਸ਼ਨ ਵੱਲੋਂ ਕਰਵਾਈ ਜਾਵੇਗੀ।ਕੈਨੀ ਸ਼ੁਰੂ ਤੋਂ ਹੀ ਐਲਬਰਟਾ ਦੇ ਵੱਖਵਾਦੀ ਅੰਦੋਲਨ ਦੇ ਸਖ਼ਤ ਆਲੋਚਕ ਰਹੇ ਹਨ। ਉਨ੍ਹਾਂ ਨੇ ਇਸ ਤੋਂ ਪਹਿਲਾਂ ਵੱਖਵਾਦ ਦੀ ਮੰਗ ਕਰਨ ਵਾਲਿਆਂ ਨੂੰ angry minority ਕਿਹਾ ਸੀ ਅਤੇ ਚਿਤਾਵਨੀ ਦਿੱਤੀ ਸੀ ਕਿ ਅਜਿਹਾ ਕਦਮ ਪਰਿਵਾਰਾਂ ਅਤੇ ਭਾਈਚਾਰਿਆਂ ਵਿੱਚ ਵੰਡ ਪਾ ਦੇਵੇਗਾ।

ਦੂਜੇ ਪਾਸੇ, 2022 ਦੇ ਫ੍ਰੀਡਮ ਕੋਨਵੋਅ ਦੇ ਪ੍ਰਬੰਧਕਾਂ ਦੇ ਵਕੀਲ ਰਹੇ ਕੀਥ ਵਿਲਸਨ ਦਾ ਮੰਨਣਾ ਹੈ ਕਿ ਐਲਬਰਟਾ ਨੂੰ ਔਟਵਾ ਤੋਂ ਆਰਥਿਕ ਇਨਸਾਫ਼ ਲੈਣ ਲਈ ਆਜ਼ਾਦ ਹੋਣਾ ਜ਼ਰੂਰੀ ਹੈ। ਸੂਬੇ ਵਿੱਚ ਵੱਖ ਹੋਣ ਲਈ ਰੈਫਰੈਂਡਮ ਕਰਵਾਉਣ ਸਬੰਧੀ ਪਟੀਸ਼ਨ ਵੀ ਚੱਲ ਰਹੀ ਹੈ, ਜਿਸ ਨੂੰ 2 ਮਈ ਤੱਕ ਲਗਭਗ 1,78,000 ਦਸਤਖਤ ਇਕੱਠੇ ਕਰਨ ਦੀ ਲੋੜ ਹੈ।

ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਕਿਹਾ ਹੈ ਕਿ ਜੇਕਰ ਪਟੀਸ਼ਨ ਸਫਲ ਹੁੰਦੀ ਹੈ, ਤਾਂ ਇਸ ਸਾਲ ਦੇ ਅਖੀਰ ਵਿੱਚ ਐਲਬਰਟਾ ਵਾਸੀਆਂ ਤੋਂ ਇਸ ਬਾਰੇ ਰਾਇ ਲਈ ਜਾ ਸਕਦੀ ਹੈ।