17.45C Vancouver 17.45C VancouverNov 13, 2024 1:50 PM - Canadian Press
ਕੈਨੇਡਾ ਦਾ ਅਮਰੀਕਾ ਨਾਲ ਸਰਹੱਦ ਸਮੇਤ ਕਈ ਮੁੱਦਿਆਂ 'ਤੇ ਵਿਵਾਦ ਵੱਧ ਸਕਦਾ ਹੈ ਕਿਉਂਕਿ ਟਰੰਪ ਨੇ ਆਪਣੇ ਪ੍ਰਸ਼ਾਸਨ ਵਿਚ ਜੋ ਲੋਕ ਸ਼ਾਮਲ ਕੀਤੇ ਹਨ, ਉਨ੍ਹਾਂ ਵਿਚੋਂ ਉੱਚ ਅਹੁਦੇ ਲਈ ਨਾਮਜ਼ਦ ਕੀਤੇ ਗਏ ਬਹੁਤੇ ਉਹ ਲੋਕ ਨੇ ਜਿਨ੍ਹਾਂ ਨੇ ਪੀ.ਐੱਮ ਜਸਟਿਨ ਟਰੂਡੋ ਦੀ ਆਲੋਚਨਾ ਕੀਤੀ ਹੈ ਅਤੇ ਕੈਨੇਡਾ ਨਾਲ ਸਰਹੱਦ ਮੁੱਦੇ ਦੀ ਚਿਤਾਵਨੀ ਦਿੱਤੀ ਹੈ। ਐਲੋਨ ਮਸਕ ਅਤੇ ਭਾਰਤੀ ਮੂਲ ਦੇ ਵਿਵੇਕ ਰਾਮਾਸਵਾਮੀ ਵੀ ਟਰੰਪ ਸਰਕਾਰ ਵਿਚ ਸ਼ਾਮਲ ਕੀਤੇ ਗਏ ਹਨ।
ਟਰੂਡੋ ਦੇ ਆਲੋਚਕ ਮਾਈਕ ਵਾਲਟਜ਼ ਨੂੰ ਰਾਸ਼ਟਰੀ ਸੁਰੱਖਿਆ ਸਲਾਹਕਾਰ ਨਿਯੁਕਤ ਕੀਤਾ ਗਿਆ ਹੈ। ਉਨ੍ਹਾਂ ਹਾਲ ਹੀ ਵਿਚ ਟਿੱਪਣੀ ਕੀਤੀ ਸੀ ਕਿ ਪੀਅਰੇ ਪੋਲੀਵਰੇ 2025 ਵਿਚ ਟਰੂਡੋ ਨੂੰ ਸੱਤਾ ਤੋਂ ਬਾਹਰ ਦਾ ਰਸਤਾ ਦਿਖਾਉਣਗੇ। ਉਥੇ ਹੀ, ਟਰੰਪ ਵਲੋਂ ਫਲੋਰੀਡਾ ਦੇ ਸੈਨੇਟਰ ਮਾਰਕੋ ਰੂਬੀਓ ਨੂੰ ਆਪਣਾ ਸੈਕਟਰੀ ਔਫ਼ ਸਟੇਟ ਵਜੋਂ ਨਾਮਜ਼ਦ ਕਰਨ ਦੀ ਉਮੀਦ ਹੈ, ਜੋ ਕੈਨੇਡਾ ਵਲੋਂ ਫਲਸਤੀਨੀ ਸ਼ਰਨਾਰਥੀਆਂ ਨੂੰ ਸਵੀਕਾਰ ਕਰਨ ਦਾ ਵਿਰੋਧ ਕਰ ਚੁੱਕੇ ਹਨ, ਉਨ੍ਹਾਂ ਦਾ ਕਹਿਣਾ ਸੀ ਕਿ ਕੈਨੇਡਾ ਦੇ ਇਸ ਕਦਮ ਨਾਲ ਅਪਰਾਧੀ ਸਰਹੱਦ ਰਾਹੀਂ ਅਮਰੀਕਾ ਲਈ ਖ਼ਤਰਾ ਬਣ ਸਕਦੇ ਹਨ।
ਸੰਯੁਕਤ ਰਾਸ਼ਟਰ ਲਈ ਰਾਜਦੂਤ ਵਜੋਂ ਟਰੰਪ ਵਲੋਂ ਚੁਣੀ ਗਈ ਏਲੀਸ ਸਟੇਫਨਿਕ ਵੀ ਕੈਨੇਡਾ ਨਾਲ ਸਰਹੱਦ ਨੂੰ ਲੈ ਕੇ ਸਖ਼ਤ ਰਹੀ ਹੈ। ਸਟੇਫਨਿਕ ਦਾ ਕਹਿਣਾ ਸੀ ਕਿ ਕੈਨੇਡਾ ਪਾਸਿਓਂ ਮਾਨਵ ਅਤੇ ਨਸ਼ਾ ਤਸਕਰੀ ਵਿਚ ਵਾਧਾ ਹੋਇਆ ਹੈ। ਹੁਣ ਦੇਖਣਾ ਹੋਵੇਗਾ ਕੈਨੇਡਾ ਇਨ੍ਹਾਂ ਸਾਰੇ ਮੁੱਦਿਆਂ ਨਾਲ ਕਿਵੇਂ ਨਜਿੱਠਦਾ ਹੈ।
