13.09C Vancouver 13.09C VancouverNov 25, 2024 5:54 PM - The Canadian Press
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅਮਰੀਕਾ ਵਿਚ ਡੋਨਲਡ ਟਰੰਪ ਦੀ ਵਾਪਸੀ ਨਾਲ ਵਧੇ ਦਬਾਅ ਵਿਚਕਾਰ ਕਿਹਾ ਹੈ ਕਿ ਕੈਨੇਡਾ ਨਾਟੋ ਦੇ ਦੋ ਫੀਸਦੀ ਡਿਫੈਂਸ ਖਰਚ ਦੇ ਟਾਰਗੇਟ ਤੱਕ ਪਹੁੰਚਣ ਦੇ ਬਿਲਕੁਲ ਸਹੀ ਰਸਤੇ ’ਤੇ ਹੈ।
ਟਰੂਡੋ ਅੱਜ ਸਵੇਰੇ ਮਾਂਟਰੀਅਲ ਵਿਚ ਸਾਲਾਨਾ ਨਾਟੋ ਸੰਸਦੀ ਅਸੈਂਬਲੀ ਨੂੰ ਸੰਬੋਧਨ ਕਰ ਰਹੇ ਸਨ, ਜਿੱਥੇ ਉਨ੍ਹਾਂ ਪਿਛਲੀ ਕੰਜ਼ਰਵੇਟਿਵ ਸਰਕਾਰ ’ਤੇ ਵੀ ਨਿਸ਼ਾਨਾ ਸਾਧਿਆ, ਟਰੂਡੋ ਨੇ ਸਟੀਫਨ ਹਾਰਪਰ ਸਰਕਾਰ ’ਤੇ ਮਿਲਟਰੀ ਖ਼ਰਚ ਵਿਚ ਕਟੌਤੀ ਦਾ ਦੋਸ਼ ਲਗਾਉਂਦੇ ਕਿਹਾ ਕਿ ਇਹ ਲਿਬਰਲਸ ਹੀ ਹਨ ਜਿਨ੍ਹਾਂ ਨੇ ਕੈਨੇਡਾ ਦੇ ਡਿਫੈਂਸ ਖ਼ਰਚ ਨੂੰ ਲਗਭਗ ਤਿੰਨ ਗੁਣਾ ਕਰਨ ਦੇ ਰਸਤੇ ’ਤੇ ਲਿਆਂਦਾ ਹੈ।
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਕੈਨੇਡਾ ਨਾਟੋ ਦੇ ਟਾਰਗੇਟ ਨੂੰ ਵੀ ਪੂਰਾ ਕਰੇਗਾ। ਗੌਰਤਲਬ ਹੈ ਕਿ ਮੌਜੂਦਾ ਸਮੇਂ ਕੈਨੇਡਾ ਉਨ੍ਹਾਂ 8 ਨਾਟੋ ਦੇ ਮੈਂਬਰਾਂ ਵਿਚੋਂ ਇੱਕ ਹੈ ਜਿਨ੍ਹਾਂ ਨੇ ਆਪਣੀ ਜੀ.ਡੀ.ਪੀ. ਦਾ ਘੱਟੋ-ਘੱਟ ਦੋ ਫੀਸਦੀ ਮਿਲਟਰੀ ’ਤੇ ਖ਼ਰਚ ਕਰਨ ਦਾ ਟਾਰਗੇਟ ਪੂਰਾ ਨਹੀਂ ਕੀਤਾ ਹੈ ਪਰ ਕੈਨੇਡਾ ਨੇ 2032 ਤੱਕ ਟੀਚੇ ਤੱਕ ਪਹੁੰਚਣ ਦਾ ਵਾਅਦਾ ਕੀਤਾ ਹੈ।
ਟਰੰਪ ਦੀ ਵ੍ਹਾਈਟ ਹਾਊਸ ਵਿਚ ਵਾਪਸੀ ਤੋਂ ਬਾਅਦ ਕੈਨੇਡਾ ’ਤੇ ਟਾਰਗੇਟ ਨੂੰ ਪੂਰਾ ਕਰਨ ਦਾ ਦਬਾਅ ਵੱਧ ਰਿਹਾ ਹੈ ਕਿਉਂਕਿ ਟਰੰਪ ਨੇ ਪਹਿਲਾਂ ਹੀ ਚਿਤਾਵਨੀ ਦਿੱਤੀ ਹੈ ਕਿ ਜੋ ਨਾਟੋ ਮੁਲਕ ਗਠਜੋੜ ਵਲੋਂ ਨਿਰਧਾਰਤ ਟੀਚੇ ਨੂੰ ਪੂਰਾ ਨਹੀਂ ਕਰ ਰਹੇ ਅਮਰੀਕਾ ਉਨ੍ਹਾਂ ਦੀ ਕਿਸੇ ਵੀ ਹਮਲੇ ਤੋਂ ਰੱਖਿਆ ਨਹੀਂ ਕਰੇਗਾ।
