ਦੂਜੀ ਸ਼ੂਟਿੰਗ ਵਾਰਦਾਤ ਤੋਂ ਬਾਅਦ ਫਿਰ ਖੁੱਲਿਆ ਕੈਪਸ ਕੈਫੇ

ਸਰੀ ਵਿੱਚ ਦੋ ਵਾਰ ਗੋਲੀ ਚੱਲਣ ਦੀ ਵਾਰਦਾਤ ਦਾ ਨਿਸ਼ਾਨਾ ਬਣਿਆ ਕੈਪਸ ਕੈਫੇ, ਇੱਕ ਵਾਰ ਫਿਰ ਤੋਂ ਸ਼ੁਰੂ ਹੋ ਗਿਆ ਹੈ। ਇਸ ਕੈਫੇ ਨੂੰ 10 ਜੁਲਾਈ ਨੂੰ ਗੋਲੀ ਚੱਲਣ ਦੀ ਪਹਿਲੀ ਵਾਰਦਾਤ ਤੋਂ ਬਾਅਦ ਕਰੀਬ 10 ਦਿਨ ਲਈ ਬੰਦ ਰੱਖਿਆ ਗਿਆ ਸੀ।

ਪਹਿਲੇ ਮੌਕੇ ਕੈਫੇ ਦੇ ਮੁੜ ਖੁੱਲ੍ਹਣ ਸੰਬੰਧੀ ਕਪਿਲ ਸ਼ਰਮਾ ਵੱਲੋਂ ਇੱਕ ਪੋਸਟ ਸਾਂਝੀ ਕੀਤੀ ਗਈ ਸੀ, ਪਰ ਫਿਰ ਖੁੱਲ੍ਹਣ ਦੇ ਕੁਝ ਹੀ ਹਫਤਿਆਂ 'ਚ ਇਹ ਕੈਫੇ ਅਗਸਤ ਮਹੀਨੇ ਦੇ ਸ਼ੁਰੂਆਤੀ ਦਿਨਾਂ 'ਚ ਫਿਰ ਸ਼ੂਟਿੰਗ ਵਾਰਦਾਤ ਦਾ ਨਿਸ਼ਾਨਾ ਬਣ ਗਿਆ ਸੀ। ਬੁੱਧਵਾਰ ਤੋਂ ਜਾਣੀ ਕਿ 1 ਅਕਤੂਬਰ ਤੋਂ ਕੈਫੇ ਦੇ ਇੱਕ ਵਾਰ ਫਿਰ ਤੋਂ ਖੁੱਲ੍ਹਣ ਮਗਰੋਂ ਅੱਜ ਕਨੈਕਟ ਐਫ.ਐਮ. ਦੀ ਟੀਮ ਨੇ ਕੈਫੇ ਤਕ ਪਹੁੰਚ ਕੀਤੀ ਅਤੇ ਕੈਫੇ ਦੇ ਸਟਾਫ਼ ਨਾਲ ਗੱਲਬਾਤ ਕਰਨ ਦੀ ਕੋਸ਼ਿਸ਼ ਕੀਤੀ।

ਕੈਫੇ ਦੀ ਟੀਮ ਨੇ ਕੈਮਰੇ 'ਤੇ ਕਿਸੇ ਵੀ ਟਿੱਪਣੀ ਤੋਂ ਇਨਕਾਰ ਕੀਤਾ ਅਤੇ ਦੱਸਿਆ ਕਿ ਕੋਈ ਵੀ ਅਧਿਕਾਰਿਤ ਜਾਣਕਾਰੀ ਦੇਣ ਲਈ ਮੈਨੇਜਮੈਂਟ ਨੇ ਇਨਕਾਰ ਕੀਤਾ ਹੈ। ਦੁਪਹਿਰ ਕਰੀਬ 12 ਵਜੇ ਕੈਫੇ ਅੰਦਰ 5 ਕੁ ਕਸਟਮਰਸ ਮੌਜੂਦ ਸਨ ਅਤੇ ਸਟਾਫ਼ ਕਿਸੇ ਵੀ ਆਮ ਦਿਨ ਦੀ ਤਰ੍ਹਾਂ ਕੰਮ ਕਰ ਰਿਹਾ ਸੀ ਅਤੇ ਕੈਫੇ ਦੇ ਆਲੇ-ਦੁਆਲੇ ਨੂੰ ਵੇਖ ਅੰਦਾਜਾ ਲਗਾਉਣਾ ਮੁਸ਼ਕਿਲ ਸੀ ਕਿ ਇਹ ਕੈਫੇ ਦੋ ਵਾਰ ਸ਼ੂਟਿੰਗ ਜਿਹੀ ਵਾਰਦਾਤ ਦਾ ਨਿਸ਼ਾਨਾ ਬਣਿਆ ਸੀ। ਹਾਲਾਂਕਿ ਕੈਫੇ ਦੇ ਬਾਹਰ ਉਸ ਸਮੇਂ ਵੀ ਸਰੀ ਪੁਲਿਸ ਸਰਵਿਸ ਦਾ ਇੱਕ ਵਾਹਨ ਖੜਾ ਸੀ।

ਕੈਫੇ 'ਤੇ ਪਹੁੰਚ ਕਰਨ ਤੋਂ ਬਾਅਦ ਕਨੈਕਟ ਐਫ.ਐਮ. ਨੇ ਸਰੀ ਪੁਲਿਸ ਸਰਵਿਸ ਦੇ ਸਟਾਫ਼ ਸਾਰਜੈਂਟ ਲਿੰਡਸੀ ਹੁਟਨ ਨਾਲ ਵੀ ਗੱਲਬਾਤ ਕੀਤੀ ਅਤੇ ਪੁੱਛਿਆ ਕਿ ਕੈਫੇ ਦੇ ਨੇੜੇ ਕੀ ਕਿਸੇ ਖਾਸ ਪ੍ਰਕਾਰ ਦੇ ਸਿਕਿਉਰਿਟੀ ਪ੍ਰਬੰਧ ਕੀਤੇ ਗਏ ਹਨ। ਇਸ 'ਤੇ ਉਨ੍ਹਾਂ ਦੱਸਿਆ ਕਿ ਸਿਕਿਉਰਿਟੀ ਕਾਰਨਾਂ ਦੇ ਚਲਦੇ ਹੀ ਪ੍ਰਬੰਧਾਂ ਸੰਬੰਧੀ ਬਹੁਤੀ ਜਾਣਕਾਰੀ ਨਹੀਂ ਦਿੱਤੀ ਜਾ ਸਕਦੀ, ਪਰ ਉਨ੍ਹਾਂ ਇਹ ਪੁਸ਼ਟੀ ਕੀਤੀ ਕਿ ਕੈਫੇ ਦੇ ਬਾਹਰ ਇੱਕ ਓਵਰਟ ਕੈਮਰਾ ਸਥਾਪਿਤ ਕੀਤਾ ਗਿਆ ਹੈ ਅਤੇ ਕੈਫੇ ਕੋਲ ਲੋਕ ਆਉਂਦੇ ਦਿਨਾਂ ਅਤੇ ਹਫਤਿਆਂ ਲਈ ਇੱਕ ਪੁਲਿਸ ਵਾਹਨ ਜਾਂ ਅਫ਼ਸਰ ਨੂੰ ਵੀ ਵੇਖ ਸਕਣਗੇ।

ਇਸ ਦੇ ਨਾਲ ਹੀ ਕੈਫੇ 'ਚ ਮੌਜੂਦ ਇੱਕ ਕਸਟਮਰ ਨੇ ਕਨੈਕਟ ਐਫ.ਐਮ. ਨਾਲ ਉਚੇਚੇ ਤੌਰ 'ਤੇ ਕੈਫੇ ਦੇ ਬਾਹਰ ਆ ਕੇ ਗੱਲਬਾਤ ਕੀਤੀ ਅਤੇ ਦੱਸਿਆ ਕਿ ਉਹ ਇਲਾਕੇ 'ਚ ਵਾਪਰਦੀਆਂ ਸ਼ੂਟਿੰਗ ਦੀਆਂ ਘਟਨਾਵਾਂ ਤੋਂ ਨਿਰਾਸ਼ ਹਨ। ਉਨ੍ਹਾਂ ਅਪਰਾਧਿਕ ਗਤੀਵਿਧੀਆਂ ਨੂੰ ਅੰਜਾਮ ਦਿੰਦੇ ਲੋਕਾਂ ਨੂੰ ਵੀ ਬੇਨਤੀ ਕੀਤੀ ਕਿ ਅਜਿਹੀਆਂ ਕਾਰਵਾਈਆਂ ਨਾ ਪਾਉਣ ਅਤੇ ਮਹਿਨਤ ਨਾਲ ਤਰੱਕੀਆਂ ਕਰਨ 'ਤੇ ਧਿਆਨ ਦੇਣ।