14.08C Vancouver 14.08C VancouverSep 29, 2021 8:51 AM -
ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਦੇ ਪੰਜਾਬ ਦੇ ਦੋ ਦਿਨਾਂ ਦੇ ਦੌਰੇ ਬਾਰੇ ਕਾਂਗਰਸ ਲੀਡਰ ਰਾਜ ਕੁਮਾਰ ਵੇਰਕਾ ਨੇ ਅੱਜ ਬੁੱਧਵਾਰ ਨੂੰ ਆਪ ਆਗੂ ਦੀ ਨਿਖੇਧੀ ਕਰਦਿਆਂ ਆਖਿਆ ਕਿ ਕੇਜਰੀਵਾਲ ਧੋਖੇਬਾਜ਼ ਹੈ, ਉਸਨੇ ਕੌਮੀ ਰਾਜਧਾਨੀ ਦੇ ਸਿਰਫ਼ 5 ਫ਼ੀਸਦ ਲੋਕਾਂ ਨੂੰ ਹੀ ਬਿਜਲੀ ਦੀਆਂ 200 ਯੂਨਿਟਾਂ ਮੁਫ਼ਤ ਦਿੱਤੀਆਂ ਹਨ।
ਸੂਬਾਈ ਕੈਬਨਿਟ ਦੀ ਚੰਡੀਗੜ੍ਹ ਵਿੱਚ ਦੂਜੀ ਬੈਠਕ ਤੋਂ ਪਹਿਲਾਂ ਉਨ੍ਹਾਂ ਆਖਿਆ,"ਕੇਜਰੀਵਾਲ ਇੱਕ ਧੋਖੇਬਾਜ਼ ਹੈ। ਉਹਨਾਂ ਨੇ ਦਿੱਲੀ ਦੀ ਵੱਸੋਂ ਦੇ ਸਿਰਫ਼ 5 ਫ਼ੀਸਦ ਲੋਕਾਂ ਨੂੰ ਹੀ ਬਿਜਲੀ ਦੀਆਂ 200 ਯੂਨਿਟਾਂ ਮੁਫ਼ਤ ਦਿੱਤੀਆਂ ਹਨ। ਇੱਥੇ ਅਸੀਂ ਲੋਕਾਂ ਦੀ ਭਲਾਈ ਲਈ ਚਰਚਾ ਕਰਨ ਲਈ ਇਕੱਠੇ ਹੋਏ ਹਾਂ।"
ਨਵਜੋਤ ਸਿੰਘ ਸਿੱਧੂ ਦੇ ਅਸਤੀਫ਼ੇ ਅਤੇ ਪੰਜਾਬ ਕਾਂਗਰਸ ਵਿਚਲੀ ਗੜਬੜ ਨੂੰ ਲੈਕੇ ਉਹਨਾਂ ਆਖਿਆ,"ਮੈਂ ਸਿੱਧੂ ਜੀ ਨੂੰ ਕਾਂਗਰਸ ਦੇ ਨਾਲ ਹੀ ਰਹਿਣ ਅਤੇ ਸਾਡੇ ਨਾਲ ਹੀ ਕੰਮ ਕਰਨ ਦੀ ਸਲਾਹ ਦਿੰਦਾ ਹਾਂ। ਅਸੀਂ ਸਿੱਧੂ ਨੂੰ ਯਕੀਨ ਦਿਵਾਉਂਦੇ ਹਾਂ ਕਿ ਅਸੀਂ ਮਾਮਲੇ ਦਾ ਹੱਲ ਕੱਢ ਲਾਵਾਂਗੇ।"
ਇਸੇ ਦਰਮਿਆਨ,ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਮੁਖੀ ਵੱਜੋਂ ਅਸਤੀਫ਼ਾ ਦੇਣ ਦੇ ਇੱਕ ਦਿਨ ਮਗਰੋਂ, ਨਵਜੋਤ ਸਿੰਘ ਸਿੱਧੂ ਨੇ ਆਖਿਆ ਕਿ ਉਹ ਆਪਣੀ ਨੈਤਿਕ ਮੁੱਲਾਂ ਅਤੇ ਨੈਤਿਕ ਅਧਿਕਾਰਾਂ ਨਾਲ ਸਮਝੌਤਾ ਨਹੀਂ ਕਰ ਸਕਦੇ ਅਤੇ ਇਸ ਗੱਲ ਵੱਲ ਵੀ ਇਸ਼ਾਰਾ ਕੀਤਾ ਕਿ ਉਹ ਸੂਬੇ ਦੀ ਸਾਰੀ ਪ੍ਰਣਾਲੀ ਵਿੱਚ ਦਾਗ਼ੀ ਨੇਤਾ ਅਤੇ ਅਫਸਰਾਂ ਨੂੰ ਮੁੜ ਨਹੀਂ ਚਾਹੁੰਦੇ।
ਸਿੱਧੂ ਦੇ ਪਾਰਟੀ ਦੇ ਸੂਬਾਈ ਮੁਖੀ ਦੇ ਅਹੁਦੇ ਤੋਂ ਅਸਤੀਫ਼ੇ ਨੇ ਪੰਜਾਬ ਕਾਂਗਰਸ ਵਿਚਲੀ ਮੁਸੀਬਤ ਨੂੰ ਹੋਰ ਗੰਭੀਰ ਕਰ ਦਿੱਤਾ ਹੈ ਅਤੇ ਪਾਰਟੀ ਵਿੱਚ ਚਰਚਾਵਾਂ ਤੇ ਵਿਚਾਰ-ਵਟਾਂਦਰਾ ਦੇ ਦੌਰ ਨੂੰ ਵੀ ਵਧਾ ਦਿੱਤਾ ਹੈ।
ਦੱਸਣਯੋਗ ਹੈ ਕਿ ਉਹਨਾਂ ਦੇ ਨੇੜਲੇ ਇੱਕ ਮੰਤਰੀ ਅਤੇ ਤਿੰਨ ਕਾਂਗਰਸ ਨੇਤਾ ਆਪਣੇ ਅਹੁਦਿਆਂ ਤੋਂ ਪਿੱਛੇ ਹਟ ਗਏ ਹਨ।
