ਅਰਵਿੰਦ ਕੇਜਰੀਵਾਲ ਵੱਲੋਂ ਵਿਧਾਨ ਸਭਾ 'ਚ ਨਵੇਂ ਲਾਗੂ ਕੀਤੇ ਗਏ ਖੇਤੀ ਬਿੱਲਾਂ ਦੀਆਂ ਕਾਪੀਆਂ ਪਾੜੀਆਂ; ਭਾਜਪਾ 'ਤੇ ਚੋਣਾਂ ਲਈ ਫ਼ੰਡ ਇਕੱਠੇ ਕਰਨ ਦਾ ਲਾਇਆ ਇਲਜ਼ਾਮ

ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਵੱਲੋਂ ਅੱਜ ਵੀਰਵਾਰ ਨੂੰ ਵਿਧਾਨ ਸਭਾ 'ਚ ਨਵੇਂ ਲਾਗੂ ਕੀਤੇ ਗਏ ਖੇਤੀ ਬਿੱਲਾਂ ਦੀਆਂ ਕਾਪੀਆਂ ਪਾੜਦਿਆਂ ਭਾਜਪਾ 'ਤੇ ਚੋਣਾਂ ਲਈ ਫ਼ੰਡ ਇਕੱਠੇ ਕਰਨ ਦਾ ਇਲਜ਼ਾਮ ਲਾਇਆ|

ਕੇਜਰੀਵਾਲ ਨੇ ਕਿਹਾ," ਭਾਜਪਾ ਨੇ ਬੀਤੇ ਕੁਝ ਸਾਲਾਂ 'ਚ ਚੋਣਾਂ ਬਹੁਤ ਹੀ ਮਹਿੰਗੀਆਂ ਕਰ ਦਿੱਤੀਆਂ ਹਨ|"

ਉਨ੍ਹਾਂ ਪੁੱਛਿਆ,"ਭਾਜਪਾ ਦੇ ਲੀਡਰ ਕਹਿੰਦੇ ਹਨ ਕਿ ਕਿਸਾਨ ਮੁਲਕ 'ਚ ਕੀਤੇ ਵੀ ਆਪਣਾ ਉਤਪਾਦ ਵੇਚ ਸਕਦਾ ਹੈ| ਝੋਨੇ ਦਾ ਘੱਟੋ-ਘੱਟ ਸਮਰਥਨ ਮੁੱਲ ਮੁਲਕ 'ਚ 1 , 868 ਰੁਪਏ ਹੈ| ਪਰ ਉੱਤਰ ਪ੍ਰਦੇਸ਼ ਅਤੇ ਬਿਹਾਰ 'ਚ ਝੋਨਾ 900 ਤੋਂ 1 ,000 ਰੁਪਏ 'ਚ ਵਿਕ ਰਿਹਾ ਹੈ| ਇਹ ਕਿਸਾਨ ਵਧੀਆ ਮੁੱਲ ਲੈਣ ਲਈ ਆਪਣੀ ਫ਼ਸਲ ਕਿੱਥੇ ਵੇਚੇਗਾ?"

ਉਹਨਾਂ ਅੱਗੇ ਕਿਹਾ,"ਮੁਲਕ ਦਾ ਕਿਸਾਨ ਅਸਲ 'ਚ ਆਪਣੀ ਫ਼ਸਲ ਵੇਚੇਗਾ ਹੀ ਨਹੀਂ| ਪੂੰਜੀਪਤੀ ਉੱਤਰ ਪ੍ਰਦੇਸ਼ 'ਚ ਕਿਸਾਨਾਂ ਦਾ ਉਤਪਾਦ ਖਰੀਦੇਗਾ ਅਤੇ ਪੂਰੇ ਮੁਲਖ 'ਚ ਉਸਨੂੰ ਬਹੁਤ ਹੀ ਜ਼ਿਆਦਾ ਕੀਮਤ 'ਤੇ ਵੇਚੇਗਾ|"

ਦਿੱਲੀ ਦੇ ਮੁੱਖ ਮੰਤਰੀ ਨੇ ਆਖਿਆ ਕਿ ਕਿਸਾਨਾਂ ਦੇ ਰੋਹ ਵਿਖਾਵੇ ਦੌਰਾਨ ਹੁਣ ਤੱਕ 20 ਤੋਂ ਵੀ ਵੱਧ ਕਿਸਾਨਾਂ ਦੀ ਮੌਤ ਹੋ ਚੁੱਕੀ ਹੈ|

ਉਨ੍ਹਾਂ ਅੱਗੇ ਪੁੱਛਿਆ,"ਮੈਂ ਕੇਂਦਰ ਸਰਕਾਰ ਨੂੰ ਪੁੱਛਣਾ ਚਾਹੁੰਦਾ ਹਾਂ ਕਿ ਹੋਰ ਕਿੰਨੀਆਂ ਮੌਤਾਂ ਨਾਲ ਸਰਕਾਰ ਦੇ ਕੰਨ ਖੁੱਲਣਗੇ?"

ਕੇਜਰੀਵਾਲ ਨੇ ਅੱਗੇ ਕਿਹਾ ਕਿ 1907 ਵਿੱਚ ਵੀ ਪੰਜਾਬ ਦੇ ਕਿਸਾਨਾਂ ਨੇ ਅੰਗਰੇਜ਼ ਸਰਕਾਰ ਖ਼ਿਲਾਫ਼ ਅਜਿਹਾ ਹੀ ਮੁਜ਼ਾਹਰਾ ਕੀਤਾ ਸੀ, ਜਦੋਂ ਉਨ੍ਹਾਂ ਵੱਲੋਂ ਵੀ ਅਜਿਹੇ ਹੀ ਕੁਝ ਕਾਨੂੰਨ ਪਾਸ ਕੀਤੇ ਗਏ ਸਨ, ਜੋ ਉਨ੍ਹਾਂ ਲਈ ਠੀਕ ਨਹੀਂ ਸਨ|

ਅੰਗਰੇਜ਼ਾਂ ਨੂੰ ਉਨ੍ਹਾਂ ਕਾਨੂੰਨਾਂ ਨੂੰ ਰੱਦ ਕਰਨਾ ਪਿਆ ਸੀ| ਉਨ੍ਹਾਂ ਆਖਿਆ,"ਅੰਗਰੇਜ਼ਾਂ ਦੇ ਰਾਜ ਵੇਲੇ ਪੰਜਾਬ ਦੇ ਕਿਸਾਨਾਂ ਵੱਲੋਂ ਵੱਡਾ ਰੋਹ ਵਿਖਾਵਾ ਕੀਤਾ ਗਿਆ ਸੀ| ਉਹ ਅੰਗਰੇਜ਼ਾਂ ਵੱਲੋਂ ਲਾਗੂ ਕੀਤੇ ਗਏ ਤਿੰਨ ਕਾਨੂੰਨਾਂ- ਬਾਰੀ ਦੁਆਬ ਐਕਟ, ਪੰਜਾਬ ਲੈਂਡ ਕੋਲੋਨਾਈਜ਼ੇਸ਼ਨ ਐਕਟ ਅਤੇ ਪੰਜਾਬ ਲੈਂਡ ਐਲੀਵੇਸ਼ਨ ਐਕਟ ਖ਼ਿਲਾਫ਼ 9 ਮਹੀਨੇ ਡਟੇ ਰਹੇ|"

"ਉਹ ਅੰਦੋਲਨ ਭਗਤ ਸਿੰਘ ਦੇ ਪਿਤਾ ਕਿਸ਼ੋਰੀ ਸਿੰਘ ਅਤੇ ਉਨ੍ਹਾਂ ਦੇ ਚਾਚਾ ਅਜੀਤ ਸਿੰਘ ਦੀ ਅਗਵਾਈ 'ਚ ਹੋਇਆ ਸੀ| ਉਨ੍ਹਾਂ ਨੇ ਭਾਰਤ ਨਿਰਮਾਣ ਸੁਸਾਇਟੀ ਬਣਾਈ, ਜਿਸ ਹੇਠ ਉਹ ਅੰਦੋਲਨ ਚੱਲਿਆ| ਅੰਗਰੇਜ਼ ਸਰਕਾਰ ਹਾਲਾਂਕਿ ਕਾਨੂੰਨਾਂ 'ਚ ਸੋਧ ਕਰਨਾ 'ਤੇ ਰਾਜ਼ੀ ਹੋ ਗਈ ਸੀ ਪਰ ਕਿਸਾਨਾਂ ਉਨ੍ਹਾਂ ਨੂੰ ਰੱਦ ਕਰਨ 'ਤੇ ਹੀ ਅੜੇ ਹੋਏ ਸਨ ਤੇ ਆਖਿਰਕਾਰ ਅੰਗਰੇਜ਼ ਸਰਕਾਰ ਨੂੰ ਮੰਨਣਾ ਹੀ ਪਿਆ,"ਉਹਨਾਂ ਕਿਹਾ |

ਕੇਜਰੀਵਾਲ ਨੇ ਕਿਹਾ ਕਿ ਸਿਰਫ਼ ਕਿਸਾਨਾਂ ਹੀ ਗੁਮਰਾਹ ਨਹੀਂ ਹਨ, ਭਾਜਪਾ ਦੇ ਵਰਕਰ ਵੀ ਗੁਮਰਾਹ ਕੀਤੇ ਜਾ ਰਹੇ ਹਨ|

ਉਨ੍ਹਾਂ ਕਿਹਾ,"ਕੇਂਦਰ ਸਰਕਾਰ ਆਖ ਰਹੀ ਹੈ ਕਿ ਕਿਸਾਨਾਂ ਕਾਨੂੰਨ ਦੇ ਫ਼ਾਇਦੇ ਨਹੀਂ ਸਮਝ ਰਹੇ| ਭਾਜਪਾ ਦੇ ਲੀਡਰ ਕਿਸਾਨਾਂ ਨੂੰ ਮਨਾਉਣ 'ਚ ਲੱਗੇ ਹੋਏ ਹਨ| ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿਤਿਆਨਾਥ ਬਰੇਲੀ 'ਚ ਕਿਸਾਨਾਂ ਨੂੰ ਇਹ ਸਮਝਾ ਰਹੇ ਸਨ ਕਿ ਉਨ੍ਹਾਂ ਦੀ ਜ਼ਮੀਨ ਜ਼ਬਤ ਨਹੀਂ ਕੀਤੀ ਜਾਵੇਗੀ| ਮੈਂ ਪੁੱਛਦਾ ਹਾਂ, ਕਿ ਕੀ ਇਹ ਫ਼ਾਇਦਾ ਹੈ? ਜ਼ਮੀਨ ਉਸਦੇ ਮਾਲਕਾਂ ਦੀ ਹੀ ਮਲਕੀਅਤ ਹੈ|"

ਉਨ੍ਹਾਂ ਆਖਿਆ,"ਸਿਰਫ਼ ਕਿਸਾਨ ਹੀ ਗੁਮਰਾਹ ਨਹੀਂ ਹਨ, ਭਾਜਪਾ ਦੇ ਵਰਕਰ ਵੀ ਗੁਮਰਾਹ ਹਨ| ਸਰਵਉੱਚ ਅਦਾਲਤ 'ਚ ਆਵਾਜਾਈ 'ਚ ਵਿਘਨ ਪੈਣ ਦੇ ਮਾਮਲੇ ਦੀ ਸੁਣਵਾਈ ਹੋ ਰਹੀ ਹੈ| ਕਿਸਾਨਾਂ ਦੇ ਵਕੀਲ ਵੱਲੋਂ ਆਖਿਆ ਜਾ ਰਿਹਾ ਹੈ ਕਿ ਕਿਸਾਨਾਂ ਦੀਆਂ ਮੰਗਾਂ ਜਾਇਜ਼ ਹਨ|"

ਉਨ੍ਹਾਂ ਕਿਹਾ ਕਿ ਕਿਸਾਨ ਮੁਲਕ ਦੀ ਨੀਂਹ ਹਨ|

ਉਹਨਾਂ ਕਿਹਾ,"ਸਰਕਾਰ ਨੂੰ ਕਿਸਾਨਾਂ ਦੇ ਫ਼ਾਇਦੇ ਦੀ ਗੱਲ ਕਰਨੀ ਚਾਹੀਦੀ ਹੈ ਜਾਂ ਫਿਰ ਵਿਚੋਲਿਆਂ ਦੀ ਗੱਲ ਕਰਨੀ ਚਾਹੀਦੀ ਹੈ? ਤਿੰਨੇ ਕਿਸਾਨ ਬਿੱਲ ਬਿਨਾਂ ਵੋਟ ਤੋਂ ਰਾਜ ਸਭਾ 'ਚ ਪਾਸ ਕੀਤੇ ਗਏ ਸਨ|"

'ਆਪ' ਦੇ ਐੱਮਐਲਏ ਮਹੇਂਦਰ ਗੋਇਲ ਨੇ ਵੀ ਦਿੱਲੀ ਵਿਧਾਨ ਸਭਾ ਦੇ ਇਸ ਸੈਸ਼ਨ 'ਚ ਕਿਸਾਨ ਬਿੱਲਾਂ ਦੀ ਕਾਪੀ ਪਾੜੀ|

ਦੱਸਣਯੋਗ ਹੈ ਕਿ ਕਿਸਾਨਾਂ ਵੱਲੋਂ 26 ਨਵੰਬਰ ਤੋਂ ਤਿੰਨ ਨਵੇਂ ਕਿਸਾਨ ਬਿੱਲਾਂ- ਕਿਸਾਨ ਉਪਜ,ਵਪਾਰ ਅਤੇ ਵਣਜ ਬਿੱਲ(ਤਰੱਕੀ ਅਤੇ ਸਹੂਲਤ), 2020 , ਕਿਸਾਨ (ਸਸ਼ਕਤੀਕਰਨ ਅਤੇ ਰੱਖਿਆ) ਸਮਰਥਨ ਮੁੱਲ ਸਮਝੌਤਾ ਅਤੇ ਖੇਤੀ ਸੇਵਾਵਾਂ ਬਿੱਲ,2020 ਅਤੇ ਜ਼ਰੂਰੀ ਵਸਤਾਂ(ਸੋਧ) ਬਿੱਲ,2020 ਖ਼ਿਲਾਫ਼ ਕੌਮੀ ਰਾਜਧਾਨੀ ਦਿੱਲੀ ਦੇ ਵੱਖੋ-ਵੱਖਰੇ ਬਾਰਡਰਾਂ 'ਤੇ ਵਿਰੋਧ ਕੀਤਾ ਜਾ ਰਿਹਾ ਹੈ|