15.76C Vancouver 15.76C VancouverAug 18, 2022 9:29 PM - Connect News
ਬੀ.ਸੀ. ਲਿਬਰਲ ਪਾਰਟੀ ਲੀਡਰ ਕੈਵਿਨ ਫੈਲਕਨ ਅਤੇ ਸਾਊਥ ਸਰੀ ਤੋਂ ਪਾਰਟੀ ਦੀ ਉਪਚੋਣ ਦੀ ਉਮੀਦਵਾਰ ਐਲੀਨੋਰ ਸਟੂਰਕੋ ਨੇ ਇੱਕ ਵਾਰ ਫਿਰ ਤੋਂ ਪਾਰਟੀ ਦੀ ਸਰੀ ਦੇ ਦੂਜੇ ਹਸਪਤਾਲ ਲਈ ਸਹਿਯੋਗ ਪ੍ਰਦਾਨ ਕਰਨ ਦੀ ਪੁਸ਼ਟੀ ਕੀਤੀ ਹੈ।
ਉਨ੍ਹਾਂ ਕਿਹਾ ਕਿ ਸੂਬੇ ਦੇ ਸਭ ਤੋਂ ਤੇਜੀ ਨਾਲ ਵਧ-ਫੁੱਲ ਰਹੇ ਸ਼ਹਿਰ ਲਈ ਵਧਦੀਆਂ ਲੋੜਾਂ ਅਨੁਸਾਰ ਇਹ ਹਸਪਤਾਲ ਜਰੂਰੀ ਹੈ।
ਕੈਵਿਨ ਫੈਲਕਨ ਨੇ ਕਿਹਾ ਕਿ ਐਨ.ਡੀ.ਪੀ. ਨੇ ਸਰੀ ਦੇ ਵੋਟਰਾਂ ਨੂੰ ਵਾਅਦਾ ਕੀਤਾ ਸੀ ਕਿ ਇੱਕ ਪੂਰੀ ਸਰਵਿਸ ਵਾਲਾ ਹਸਪਤਾਲ ਲਿਆਂਦਾ ਜਾਵੇਗਾ ਪਰ ਇਹ ਪਾਰਟੀ ਕਲੋਵਰਡੇਲ ਇਲਾਕੇ 'ਚ ਸਿਰਫ ਇੱਕ ਅਰਜੈਂਟ ਕੇਅਰ ਸੈਂਟਰ ਪ੍ਰਦਾਨ ਕਰ ਰਹੀ ਹੈ ਜਿਸ 'ਚ 168 ਬੈਡ ਹਨ ਅਤੇ ਇਸ 'ਚ ਆਈ.ਸੀ.ਯੂ. ਅਤੇ ਮੈਟਰਨਿਟੀ ਵਾਰਡ ਦੀ ਸੁਵਿਧਾ ਨਹੀਂ ਹੈ।
ਉਨ੍ਹਾਂ ਕਿਹਾ ਕਿ ਇਹ ਸ਼ਹਿਰ ਦੀਆਂ ਲੋੜਾਂ ਲਈ ਕਾਫੀ ਨਹੀਂ ਹੈ।
ਕੈਵਿਨ ਫੈਲਕਨ ਨੇ ਕਿਹਾ ਕਿ ਬੀ.ਸੀ. ਲਿਬਰਲ ਸਰਕਾਰ ਸ਼ਹਿਰ ਨੂੰ ਫੁੱਲ ਸਰਵਿਸ ਹਸਪਤਾਲ ਪ੍ਰਦਾਨ ਕਰੇਗੀ।
ਉੱਧਰ ਐਲੀਨੋਰ ਸਟੂਰਕੋ ਨੇ ਕਿਹਾ ਕਿ ਸੂਬੇ ਦਾ ਹੈਲਥ ਕੇਅਰ ਸਿਸਟਮ ਚਰਮਰਾ ਗਿਆ ਹੈ ਅਤੇ ਐਂਬੂਲੈਂਸ 'ਚ ਦੇਰੀ, ਐਮਰਜੈਂਸੀ ਰੂਮ ਬੰਦ ਹੋਣ ਜਾਂ ਵਾਕ ਇਨ ਕਲੀਨਿਕਸ ਦੇ ਬੰਦ ਹੋਣ ਜਿਹੇ ਮਾਮਲਿਆਂ ਕਾਰਨ ਵੀ ਮੌਤਾਂ ਹੋ ਰਹੀਆਂ ਹਨ।
ਉਨ੍ਹਾਂ ਸਿਹਤ ਮੰਤਰੀ ਐਡਰੀਅਨ ਡਿਕਸ ਨੂੰ ਨਿਸ਼ਾਨੇ 'ਤੇ ਲੈਂਦਿਆਂ ਕਿਹਾ ਕਿ ਉਹ ਕਲੋਵਰਡੇਲ ਇਲਾਕੇ ਦੇ ਅਰਜੈਂਟ ਕੇਅਰ ਸੈਂਟਰ ਦਾ ਵਾਅਦਾ ਦੋਹਰਾ ਰਹੇ ਹਨ ਪਰ ਹੈਲਥਕੇਅਰ ਸੰਕਟ ਵਿਚਾਲੇ ਲੋਕ ਉਨ੍ਹਾਂ ਤੋਂ ਪ੍ਰੈਸ ਕਾਨਫਰੰਸ ਨਹੀਂ ਬਲਕਿ ਐਕਸ਼ਨ ਦੀ ਆਸ ਰੱਖਦੇ ਹਨ।
