13.77C Vancouver 13.77C VancouverOct 5, 2022 7:26 PM - Connect News
ਵੈਨਕੂਵਰ ਪੁਲਿਸ ਵੱਲੋਂ ਜਾਣਕਾਰੀ ਦਿੱਤੀ ਗਈ ਹੈ ਕਿ ਕਾਮਾਗਾਟਾ ਮਾਰੂ ਮੈਮੋਰੀਅਲ 'ਤੇ ਇੱਕ ਵਾਰ ਫਿਰ ਤੋਂ ਤੋੜਭੰਨ ਕੀਤੀ ਗਈ ਹੈ।
ਕਰੀਬ 14 ਮਹੀਨਿਆਂ ਵਿਚਾਲੇ ਕਾਮਾਗਾਟਾ ਮਾਰੂ ਮੈਮੋਰੀਅਲ ਨਾਲ ਤੋੜਭੰਨ ਦਾ ਇਹ ਦੂਜਾ ਮਾਮਲਾ ਹੈ।
ਕਾਂਸਟੇਬਲ ਜੇਸਨ ਡੁਸੈਟ ਦਾ ਕਹਿਣਾ ਹੈ ਕਿ ਪੁਲਿਸ ਦੀਆਂ ਸਪੈਸ਼ਲਾਈਜਡ ਯੂਨਿਟਸ ਦੇ ਕਈ ਡਿਟੈਕਟਿਵ ਸਬੂਤ ਜੁਟਾਉਣ 'ਚ ਜੁਟੇ ਹੋਏ ਹਨ।
ਉਨ੍ਹਾਂ ਕਿਹਾ ਕਿ ਇਸ ਜਾਂਚ 'ਚ ਕੁਝ ਸਮਾਂ ਲੱਗੇਗਾ।
ਉਨ੍ਹਾਂ ਕਿਹਾ ਕਿ ਇਹ ਅਪਰਾਧ ਬੇਹੱਦ ਬੇਤੁਕਾ ਹੈ ਅਤੇ ਇਸ ਮਾਮਲੇ ਨੂੰ ਸੁਲਝਾਉਣ 'ਚ ਕੋਈ ਕਸਰ ਨਹੀਂ ਛੱਡੀ ਜਾਵੇਗੀ।
ਪੁਲਿਸ ਨੂੰ ਮੰਗਲਵਾਰ ਨੂੰ ਸੋਸ਼ਲ ਮੀਡੀਆ ਆਸਰੇ ਪਤਾ ਲੱਗਿਆ ਸੀ ਕਿ ਕਾਮਾਗਾਟਾ ਮਾਰੂ ਮੈਮੋਰੀਅਲ ਦਾ ਸਾਹਮਣੇ ਵਾਲਾ ਸ਼ੀਸ਼ਾ ਭੰਨ ਦਿੱਤਾ ਗਿਆ ਹੈ।
ਇਹ ਮੈਮੋਰੀਅਲ ਕੋਲ ਹਾਰਬਰ ਇਲਾਕੇ 'ਚ ਸਥਿਤ ਹੈ ਅਤੇ ਇਸ ਦਾ ਕੱਚ ਜਾਣਬੁੱਝ ਕੇ ਤੋੜਿਆ ਜਾਪਦਾ ਹੈ।
ਕਾਂਸਟੇਬਲ ਡੁਸੈਟ ਨੇ ਕਿਹਾ ਕਿ ਉਹ ਨਾ ਸਿਰਫ ਅਪਰਾਧ ਨੂੰ ਸੁਲਝਾਉਣਾ ਚਾਹੁੰਦੇ ਹਨ ਬਲਕਿ ਜਾਨਣਾ ਚਾਹੁੰਦੇ ਹਨ ਕਿ ਇਸ ਨੂੰ ਨਿਸ਼ਾਨਾ ਕਿਉਂ ਬਣਾਇਆ ਗਿਆ।
ਯਾਦ ਰਹੇ ਅਗਸਤ 2021 'ਚ ਵਾਪਰੀ ਅਜਿਹੀ ਘਟਨਾ ਦੇ ਮਾਮਲੇ 'ਚ ਯੂਨੀਅਰ ਕੁਰਨੀਆਵਨ ਨਾਮ ਦੇ ਯੁਵਕ 'ਤੇ ਦੋਸ਼ ਲੱਗੇ ਸਨ।
