ਅਮਰੀਕਾ ’ਚ ‘ਲੇਕ ਅਮਰੀਕਾ’, ਕੈਨੇਡਾ ’ਚ ‘ਲੇਕ ਓਨਟਾਰੀਓ’: ਗੂਗਲ ਦੇ ਨਵੇਂ ਮੈਪਸ ਨੇ ਛੇੜਿਆ ਵਿਵਾਦ

ਕੈਨੇਡਾ ਨਾਲ ਟਰੇਡ ਵਾਰ ਵਿਚਕਾਰ ਗੂਗਲ ਨੇ ਅਮਰੀਕੀ ਉਪਭੋਗਤਾ ਲਈ ਲੇਕ ਓਨਟਾਰੀਓ ਦਾ ਨਾਮ ਬਦਲ ਕੇ ਲੇਕ ਅਮਰੀਕਾ ਕਰ ਦਿੱਤਾ ਹੈ। ਕੰਪਨੀ ਨੇ ਇਹ ਕਦਮ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਦੇ ਉਸ ਕਾਰਜਕਾਰੀ ਆਦੇਸ਼ ਤੋਂ ਬਾਅਦ ਉਠਾਇਆ ਹੈ, ਜਿਸ ਵਿਚ ਉਨ੍ਹਾਂ ਅਮਰੀਕੀ ਸਰਕਾਰੀ ਡੇਟਾਬੇਸ ਵਿਚ ਲੇਕ ਦਾ ਨਾਮ ਬਦਲਣ ਦੇ ਨਿਰਦੇਸ਼ ਦਿੱਤੇ ਸਨ।

ਗੂਗਲ ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਸਰਕਾਰੀ ਹੁਕਮਾਂ ਮੁਤਾਬਕ ਆਪਣੇ ਮੈਪ ਅਪਡੇਟ ਕਰਦਾ ਹੈ, ਇਸ ਲਈ ਹੁਣ ਅਮਰੀਕਾ ਵਿਚ ਬੈਠੇ ਲੋਕਾਂ ਨੂੰ ਇਹ ਲੇਕ ਅਮਰੀਕਾ ਵਜੋਂ ਦਿਖਾਈ ਦੇਵੇਗੀ, ਜਦੋਂ ਕਿ ਕੈਨੇਡਾ ਵਿਚ ਇਸ ਦਾ ਨਾਮ ਲੇਕ ਓਨਟਾਰੀਓ ਹੀ ਰਹੇਗਾ ਅਤੇ ਬਾਕੀ ਦੁਨੀਆ ਵਿਚ ਦੋਵੇਂ ਨਾਮ ਦਿਖਾਈ ਦੇਣਗੇ। ਇਸ ਫੈਸਲੇ 'ਤੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅਤੇ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਨੇ ਸਖ਼ਤ ਪ੍ਰਤੀਕਿਰਿਆ ਦਿੱਤੀ।

ਫੋਰਡ ਨੇ ਇਸ ਲੇਕ ਦੇ ਕੈਨੇਡੀਅਨ ਪਾਸੇ 'ਤੇ ਸ਼ਨੀਵਾਰ ਨੂੰ ਲੇਕ ਓਨਟਾਰੀਓ ਦਾ ਇੱਕ ਵੱਡਾ ਬੋਰਡ ਵੀ ਲਗਾ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਨਾਮ ਹਮੇਸ਼ਾ ਇਸੇ ਤਰ੍ਹਾਂ ਰਹੇਗਾ। ਗੌਰਤਲਬ ਹੈ ਕਿ ਲੇਕ ਓਨਟਾਰੀਓ 5 ਮਹਾਨ ਝੀਲਾਂ ਵਿਚੋਂ ਇੱਕ ਹੈ, ਜੋ ਓਨਟਾਰੀਓ ਅਤੇ ਨਿਊਯਾਰਕ ਵਿਚਕਾਰ ਸਥਿਤ ਹੈ, ਓਨਟਾਰੀਓ ਸੂਬੇ ਦਾ ਨਾਮ ਇਸੇ 'ਤੇ ਹੀ ਰੱਖਿਆ ਗਿਆ ਸੀ।