ਲੈਂਗਲੀ 'ਚ ਵਾਪਰੀ ਜਾਨਲੇਵਾ ਸ਼ੂਟਿੰਗ 'ਚ ਬਿੱਟੂ ਛੱਤਚੋਟ ਦੀ ਮੌਤ

ਲੈਂਗਲੀ 'ਚ ਬੀਤੇ ਹਫ਼ਤੇ ਵਾਪਰੀ ਗੋਲੀ ਚੱਲਣ ਦੀ ਜਾਨਲੇਵਾ ਵਾਰਦਾਤ 'ਚ ਜਾਨ ਗਵਾਉਣ ਵਾਲੇ ਪੀੜਤ ਦੀ ਪਛਾਣ ਹੋ ਗਈ ਹੈ।

ਇੰਟੈਗ੍ਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਯਾਨੀ ਕਿ ਆਈ.ਹਿਟ ਦਾ ਕਹਿਣਾ ਹੈ ਕਿ ਵਿਲੋਬੀ ਇਲਾਕੇ 'ਚ ਵਾਪਰੀ ਸ਼ੂਟਿੰਗ 'ਚ 35 ਸਾਲਾ ਬਿੱਟੂ ਛੱਤਚੋਟ ਨਾਮ ਦੇ ਵਿਅਕਤੀ ਦੀ ਮੌਤ ਹੋ ਗਈ।

ਘਟਨਾ 20 ਅਕਤੂਬਰ ਨੂੰ ਵਾਪਰੀ ਸੀ।

ਲੈਂਗਲੀ ਆਰ.ਸੀ.ਐਮ.ਪੀ. ਨੂੰ ਰਾਤ ਕਰੀਬ 11.15 ਵਜੇ 211B ਸਟ੍ਰੀਟ ਦੇ 7700 ਬਲੌਕ 'ਚ ਸੱਦਿਆ ਗਿਆ ਸੀ।

ਮੌਕੇ 'ਤੇ ਪਹੁੰਚੇ ਅਫਸਰਾਂ ਨੇ ਪੀੜਤ ਨੂੰ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਸੀ ਪਰ ਪੀੜਤ ਨੇ ਮੌਕੇ 'ਤੇ ਹੀ ਦਮ ਤੋੜ ਦਿੱਤਾ ਸੀ।

ਪੀੜਤ ਨੂੰ ਲੈਂਗਲੀ ਵਾਸੀ ਦੱਸਿਆ ਗਿਆ।

ਵਾਰਦਾਤ ਤੋਂ ਬਾਅਦ 232 ਸਟ੍ਰੀਟ ਅਤੇ 76A ਐਵੀਨਿਊ ਕੋਲ ਇੱਕ ਫੋਰਡ F150 ਟਰੱਕ ਅੱਗ ਦੇ ਹਵਾਲੇ ਕੀਤਾ ਮਿਲਿਆ ਸੀ।

ਆਈ.ਹਿਟ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਘਟਨਾ ਸੰਬੰਧੀ ਕੋਈ ਜਾਣਕਾਰੀ ਹੋਵੇ ਤਾਂ ਦੱਸਿਆ ਜਾਵੇ।