ਅਮਰੀਕਾ ਨਾਲ ਟੈਰਿਫ ਹਟਾਉਣ ਬਾਰੇ ਗੱਲਬਾਤ ਅਜੇ ਵੀ ਜਾਰੀ: ਡੋਮਿਨਿਕ ਲੇਬਲੈਂਕ

ਕੈਨੇਡਾ ਦੇ ਵਪਾਰ ਮੰਤਰੀ ਡੋਮਿਨਿਕ ਲੇਬਲੈਂਕ ਦਾ ਕਹਿਣਾ ਹੈ ਕਿ ਅਮਰੀਕਾ ਨਾਲ ਟੈਰਿਫ ਹਟਾਉਣ ਬਾਰੇ ਗੱਲਬਾਤ ਅਜੇ ਵੀ ਜਾਰੀ ਹਨ ਅਤੇ ਇਸ ਵਿਚ ਸਮਾਂ ਲੱਗੇਗਾ। ਉਨ੍ਹਾਂ ਦੀ ਇਹ ਟਿੱਪਣੀ ਉਦੋਂ ਆਈ ਹੈ ਜਦੋਂ ਖਬਰਾਂ ਸਨ ਕਿ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅਤੇ ਰਾਸ਼ਟਰਪਤੀ ਡੋਨਲਡ ਟਰੰਪ ਜਲਦ ਹੀ ਸਟੀਲ, ਐਲੂਮੀਨੀਅਮ ਅਤੇ ਊਰਜਾ 'ਤੇ ਲੱਗੇ ਟੈਰਿਫਸ ਬਾਰੇ ਇੱਕ ਸਮਝੌਤਾ ਸਾਇਨ ਕਰ ਸਕਦੇ ਹਨ ਜੋ ਕਿ ਦੱਖਣੀ ਕੋਰੀਆ ਵਿਚ ਹੋਣ ਏ.ਪੀ.ਈ.ਸੀ. ਯਾਨੀਏਸ਼ੀਆ-ਪ੍ਰਸ਼ਾਂਤ ਆਰਥਿਕ ਸਹਿਯੋਗ ਦੀ ਬੈਠਕ ਦੌਰਾਨ ਹੋ ਸਕਦਾ ਹੈ।

ਹਾਲਾਂਕਿ ਲੇਬਲੈਂਕ ਨੇ ਇਸ ਦਾ ਖੰਡਨ ਕੀਤਾ ਅਤੇ ਔਟਵਾ ਵਿਚ ਪੱਤਰਕਾਰਾਂ ਨਾਲ ਗੱਲ ਕਰਦੇ ਕਿਹਾ ਕਿ ਉਹ ਟਰੰਪ ਪ੍ਰਸ਼ਾਸਨ ਦੇ ਪ੍ਰਮੁੱਖ ਮੈਂਬਰਾਂ ਨਾਲ ਲਗਾਤਾਰ ਵਿਚਾਰ-ਚਰਚਾ ਕਰ ਰਹੇ ਹਨ ਤੇ ਗੱਲਬਾਤ ਅੱਗੇ ਵਧੀ ਹੈ ਪਰ ਅਜੇ ਵੀ ਬਹੁਤ ਕੰਮ ਕਰਨਾ ਬਾਕੀ ਹੈ।

ਗੌਰਤਲਬ ਹੈ ਕਿ ਪ੍ਰਧਾਨ ਮੰਤਰੀ 24 ਅਕਤੂਬਰ ਤੋਂ 1 ਨਵੰਬਰ ਤੱਕ ਏਸ਼ੀਆ ਦੇ ਨੌ-ਦਿਨਾਂ ਦੌਰੇ 'ਤੇ ਜਾ ਰਹੇ ਹਨ, ਇਸ ਦੌਰੇ ਦੀ ਸਮਾਪਤੀ ਉਹ ਦੱਖਣੀ ਕੋਰੀਆ ਵਿਚ ਏ.ਪੀ.ਈ.ਸੀ. ਬੈਠਕ ਵਿਚ ਹਿੱਸਾ ਲੈਣ ਮਗਰੋਂ ਕਰਨਗੇ। ਇਸੇ ਦੌਰਾਨ ਉਨ੍ਹਾਂ ਦੀ ਰਾਸ਼ਟਰਪਤੀ ਡੋਨਲਡ ਟਰੰਪ ਅਤੇ ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨਾਲ ਮੁਲਾਕਾਤ ਦੀ ਸੰਭਾਵਨਾ ਹੈ।