ਸੀ.ਯੂ.ਐਸ.ਐਮ.ਏ. ਸਮੀਖਿਆ ਤੋਂ ਪਹਿਲਾਂ ਲੇਬਲੈਂਕ ਅਮਰੀਕੀ ਵਪਾਰ ਪ੍ਰਤਿਨਿਧੀ ਨਾਲ ਕਰਨਗੇ ਮੁਲਾਕਾਤ

ਕੈਨੇਡਾ ਯੂ.ਐਸ. ਟਰੇਡ ਲਈ ਮਿਨਿਸਟਰ ਡੋਮਿਨਿਕ ਲੇਬਲੈਂਕ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਦੇ ਵਪਾਰਕ ਪ੍ਰਤੀਨਿਧੀ ਜੈਮੀਸਨ ਗ੍ਰੀਰ ਨਾਲ ਜਲਦ ਮੁਲਾਕਾਤ ਕਰਨਗੇ। ਇਹ ਬੈਠਕ ਸੀ.ਯੂ.ਐਸ.ਐਮ.ਏ. ਯਾਨੀ ਕੈਨੇਡਾ-ਅਮਰੀਕਾ-ਮੈਕਸੀਕੋ ਸਮਝੌਤੇ ਦੀ ਹੋਣ ਵਾਲੀ ਅਹਿਮ ਸਮੀਖਿਆ ਬਾਰੇ ਹੋਵੇਗੀ। ਲੇਬਲੈਂਕ ਨੇ ਦੱਸਿਆ ਕਿ ਉਨ੍ਹਾਂ ਗ੍ਰੀਰ ਨਾਲ ਫ਼ੋਨ 'ਤੇ ਵੀ ਗੱਲ ਕੀਤੀ ਹੈ।

ਇਹ ਗੱਲਬਾਤ ਗ੍ਰੀਰ ਦੇ ਉਸ ਬਿਆਨ ਤੋਂ ਬਾਅਦ ਹੋਈ ਜਿਸ ਵਿਚ ਉਨ੍ਹਾਂ ਕੈਨੇਡਾ 'ਤੇ ਵਪਾਰਕ ਰੁਕਾਵਟਾਂ ਪੈਦਾ ਕਰਨ ਦੇ ਦੋਸ਼ ਲਾਏ ਸਨ। ਜੈਮੀਸਨ ਗ੍ਰੀਰ ਨੇ ਹਾਲ ਹੀ ਵਿਚ ਕਿਹਾ ਸੀ ਕਿ ਕੈਨੇਡਾ ਵੱਲੋਂ ਅਮਰੀਕੀ ਸ਼ਰਾਬ ਅਤੇ ਡੇਅਰੀ ਉਤਪਾਦਾਂ 'ਤੇ ਲਗਾਈਆਂ ਗਈਆਂ ਰੁਕਾਵਟਾਂ ਕਾਰਨ ਦੁਵੱਲੀ ਗੱਲਬਾਤ ਮੁਸ਼ਕਲ ਹੋ ਰਹੀ ਹੈ। ਲੇਬਲੈਂਕ ਨੇ ਸਪੱਸ਼ਟ ਕੀਤਾ ਕਿ ਕੈਨੇਡਾ ਅਤੇ ਮੈਕਸੀਕੋ ਦੋਵੇਂ ਇਸ ਗੱਲ 'ਤੇ ਸਹਿਮਤ ਹਨ ਕਿ ਤਿੰਨਾਂ ਦੇਸ਼ਾਂ ਦਾ ਇਹ ਸਾਂਝਾ ਸਮਝੌਤਾ ਬਰਕਰਾਰ ਰਹਿਣਾ ਚਾਹੀਦਾ ਹੈ।

ਹਾਲਾਂਕਿ, ਟਰੰਪ ਪ੍ਰਸ਼ਾਸਨ ਇਸ ਸਮਝੌਤੇ ਨੂੰ ਲੈ ਕੇ ਲਗਾਤਾਰ ਅਨਿਸ਼ਚਿਤਤਾ ਪੈਦਾ ਕਰ ਰਿਹਾ ਹੈ। ਟਰੰਪ ਨੇ ਕਈ ਵਾਰ ਸੀ.ਯੂ.ਐਸ.ਐਮ.ਏ.ਤੋਂ ਬਾਹਰ ਨਿਕਲਣ ਜਾਂ ਮੈਕਸੀਕੋ ਅਤੇ ਕੈਨੇਡਾ ਨਾਲ ਵੱਖੋ-ਵੱਖਰੇ ਸਮਝੌਤੇ ਕਰਨ ਦੀ ਗੱਲ ਕਹੀ ਹੈ। ਜੁਲਾਈ ਵਿਚ ਹੋਣ ਵਾਲਾ ਰਿਵਿਊ ਇਹ ਤੈਅ ਕਰੇਗਾ ਕਿ ਮੌਜੂਦਾ ਵਪਾਰਕ ਨਿਯਮਾਂ ਨੂੰ ਜਾਰੀ ਰੱਖਣਾ ਹੈ ਜਾਂ ਉਨ੍ਹਾਂ ਵਿਚ ਕੋਈ ਵੱਡੀ ਤਬਦੀਲੀ ਹੋਵੇਗੀ।