ਆਉਣ ਵਾਲੇ ਦਿਨਾਂ ਵਿਚ ਮੰਤਰੀਆਂ ਵਲੋਂ ਚੀਨ ਦੇ ਉੱਚ ਪੱਧਰੀ ਦੌਰੇ ਕਰਨ ਦੀ ਉਮੀਦ ਹੈ: ਕੋਡੀ ਬਲੋਇਸ

ਪੀ.ਐਮ. ਮਾਰਕ ਕਾਰਨੀ ਦੇ ਸੰਸਦੀ ਸਕੱਤਰ ਕੋਡੀ ਬਲੋਇਸ ਦਾ ਕਹਿਣਾ ਹੈ ਕਿ ਆਉਣ ਵਾਲੇ ਦਿਨਾਂ ਵਿਚ ਮੰਤਰੀਆਂ ਵਲੋਂ ਚੀਨ ਦੇ ਉੱਚ ਪੱਧਰੀ ਦੌਰੇ ਕਰਨ ਦੀ ਉਮੀਦ ਹੈ। ਇਸ ਦਾ ਮਕਸਦ ਕੈਨੇਡੀਅਨ ਕੈਨੋਲਾ 'ਤੇ ਟੈਰਿਫਸ ਨੂੰ ਲੈ ਕੇ ਚੀਨ ਨਾਲ ਚੱਲ ਰਹੇ ਵਿਵਾਦ ਨੂੰ ਹੱਲ ਕਰਨ ਦੀ ਕੋਸ਼ਿਸ਼ ਕਰਨਾ ਹੈ। ਲਿਬਰਲ ਸੰਸਦ ਮੈਂਬਰ ਕੋਡੀ ਬਲੋਇਸ ਇਸ ਮਹੀਨੇ ਦੇ ਸ਼ੁਰੂ ਵਿਚ ਸਸਕੈਚਵਨ ਦੇ ਪ੍ਰੀਮੀਅਰ ਸਕਾਟ ਮੋਅ ਦੇ ਨਾਲ ਚੀਨ ਦੌਰੇ 'ਤੇ ਗਏ ਸਨ।

ਸਸਕੈਚਵਨ ਕੈਨੇਡਾ ਵਿਚ ਕੈਨੋਲਾ ਉਤਪਾਦਨ ਲਈ ਪ੍ਰਮੁੱਖ ਖੇਤਰ ਹੈ। ਚੀਨ ਨੇ ਕੈਨੇਡਾ ਵਲੋਂ ਚੀਨੀ ਇਲੈਕਟ੍ਰਿਕ ਵਾਹਨ 'ਤੇ ਪਿਛਲੇ ਸਾਲ ਲਗਾਏ ਗਏ ਭਾਰੀ ਟੈਰਿਫ ਦੇ ਜਵਾਬ ਵਿਚ ਕੈਨੇਡੀਅਨ ਕੈਨੋਲਾ ਨੂੰ ਹਾਲ ਹੀ ਵਿਚ ਟਾਰਗੇਟ ਕੀਤਾ ਹੈ।

ਪੀ. ਐੱਮ. ਕਾਰਨੀ ਦੇ ਸੰਸਦੀ ਸਕੱਤਰ ਬਲੋਇਸ ਦਾ ਕਹਿਣਾ ਹੈ ਕਿ ਪ੍ਰੀਮੀਅਰ ਸਕਾਟ ਮੋਅ ਨਾਲ ਚੀਨ ਦੀ ਚਾਰ ਦਿਨਾਂ ਦੀ ਯਾਤਰਾ ਦੌਰਾਨ ਉਨ੍ਹਾਂ ਚੀਨ ਦੇ ਵਪਾਰ, ਵਿਦੇਸ਼ੀ ਮਾਮਲਿਆਂ ਅਤੇ ਕਸਟਮ ਵਿਭਾਗ ਦੇ ਅਧਿਕਾਰੀਆਂ ਨਾਲ ਮੁਲਾਕਾਤ ਕੀਤੀ ਸੀ ਅਤੇ ਇਹ ਸਾਕਾਰਾਤਮਕ ਸਨ, ਜਿਸ ਨਾਲ ਮੁੜ ਦੌਰੇ ਦੀ ਸੰਭਾਵਨਾ ਬਣੀ ਹੈ। ਉਨ੍ਹਾਂ ਕਿਹਾ ਕਿ ਹੁਣ ਹੋਰ ਫੈਡਰਲ ਮੰਤਰੀ ਚੀਨ ਦਾ ਦੌਰਾ ਕਰ ਸਕਦੇ ਹਨ।