9.98C Vancouver 9.98C VancouverJun 15, 2020 4:51 PM -
ਲਿਬਰਲ ਪਾਰਟੀ ਵੱਲੋਂ ਕੋਵਿਡ-19 ਨਾਲ ਨਜਿੱਠਣ ਲਈ ਸ਼ੁਰੂ ਕੀਤੀਆਂ ਗਈਆਂ ਰਾਹਤ ਯੋਜਨਾਵਾਂ ਵਿੱਚੋਂ ਇੱਕ ਮਹੱਤਵਪੂਰਨ ਯੋਜਨਾ ਨੂੰ ਪਹਿਲਾਂ ਨਾਲੋਂ ਵੱਧ ਸਮੇਂ ਲਈ ਜਾਰੀ ਰੱਖਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕਿਹਾ ਕਿ ਉਹ ਹਫ਼ਤੇ ਦੇ ਆਉਣ ਵਾਲੇ ਦਿਨਾਂ ਵਿੱਚ ਵੇਰਵਾ ਜਾਰੀ ਕਰਨਗੇ ਕਿ ਕੈਨੇਡਾ ਐਮਰਜੈਂਸੀ ਰਿਸਪੌਂਸ ਬੈਨਿਫ਼ਿਟ (ਸੀ.ਈ.ਆਰ.ਬੀ) ਨੂੰ ਕਿਸ ਤਰ੍ਹਾਂ ਉਨ੍ਹਾਂ ਲੋਕਾਂ ਲਈ ਜਾਰੀ ਰੱਖਿਆ ਜਾ ਸਕਦਾ ਹੈ ਜੋ ਅਜੇ ਵੀ ਕੰਮ 'ਤੇ ਵਾਪਸ ਜਾਉਣ ਵਿੱਚ ਅਸਮਰੱਥ ਹਨ।
ਇਸ ਯੋਜਨਾ ਤਹਿਤ 16 ਹਫਤਿਆਂ ਲਈ $2000 ਮਹੀਨਾਵਾਰ ਦਿੱਤੇ ਜਾਣ ਦਾ ਪ੍ਰਬੰਧ ਕੀਤਾ ਗਿਆ ਸੀ। ਲੱਖਾਂ ਕੈਨੇਡਾ ਵਾਸੀਆਂ ਨੇ ਇਸ ਯੋਜਨਾ ਦਾ ਲਾਭ ਲਿਆ ਅਤੇ ਹੁਣ ਉਹਨਾਂ ਦੇ 16 ਹਫ਼ਤੇ ਖਤਮ ਹੋਣ ਵਾਲੇ ਹਨ, ਪਰ ਅਜੇ ਵੀ ਉਨ੍ਹਾਂ ਕੋਲ ਰੋਜ਼ਗਾਰ ਨਹੀਂ ਹੈ।
ਐਨ.ਡੀ.ਪੀ. ਨੇ ਅੱਜ ਸਵੇਰ ਇਹ ਸਾਫ਼ ਕੀਤਾ ਹੈ ਕਿ ਬੁੱਧਵਾਰ ਨੂੰ ਪਾਰਲੀਮੈਂਟ ਵਿੱਚ ਸਰਕਾਰੀ ਖਰਚੇ ਨਾਲ ਸੰਬੰਧਿਤ ਮਹੱਤਵਪੂਰਨ ਬਿੱਲ ਦੇ ਮਾਮਲੇ 'ਤੇ ਉਹ ਸਰਕਾਰ ਨੂੰ ਸਮਰਥਨ ਤਾਂ ਹੀ ਦੇਣਗੇ ਜੇਕਰ ਸਰਕਾਰ ਸੀ.ਈ.ਆਰ.ਬੀ. ਦਾ ਵਿਸਤਾਰ ਕਰਨ ਲਈ ਰਾਜ਼ੀ ਹੋਵੇ।
$87 ਬਿਲੀਅਨ ਖਰਚੇ ਦੇ ਇਸ ਬਿੱਲ 'ਤੇ ਪਾਰਲੀਮੈਂਟ ਵਿੱਚ ਹੋਣ ਵਾਲੀ ਵੋਟਿੰਗ ਇੱਕ ਤਰੀਕੇ ਦਾ ਵਿਸ਼ਵਾਸ ਮਤਾ ਹੀ ਹੈ, ਕਿਉਂਕਿ ਜੇਕਰ ਸਰਕਾਰ ਨੂੰ ਲੋੜੀਂਦਾ ਸਮਰਥਨ ਨਾ ਮਿਲਿਆ, ਤਾਂ ਸਰਕਾਰ ਡਿੱਗ ਵੀ ਸਕਦੀ ਹੈ।
ਐਨ.ਡੀ.ਪੀ. ਦੇ ਲੀਡਰ ਜਗਮੀਤ ਸਿੰਘ ਨੇ ਅੱਜ ਕਿਹਾ ਕਿ ਜੇਕਰ ਸਰਕਾਰ ਬਾਕੀ ਪਾਰਟੀਆਂ ਨਾਲ ਸਲਾਹ-ਮਸ਼ਵਰਾ ਕਰੇ ਤਾਂ ਸੰਭਾਵਿਤ ਬੇਭਰੋਸਗੀ ਦਾ ਮਤਾ ਟਾਲਿਆ ਜਾ ਸਕਦਾ ਹੈ।
