ਲਿਬਰਲਜ਼ ਨੇ ਹਾਊਸ ਔਫ ਕੌਮਨਜ਼ ਵਿਚ ਹੇਟ ਕ੍ਰਾਈਮ ਬਿੱਲ ਕੀਤਾ ਪੇਸ਼

ਕੈਨੇਡਾ ਦੇ ਜਸਟਿਸ ਮਿਨਿਸਟਰ ਸ਼ੌਨ ਫਰੇਜ਼ਰ ਨੇ ਧਾਰਮਿਕ ਸੰਸਥਾਵਾਂ, ਸਕੂਲਾਂ ਅਤੇ ਕਮਿਊਨਿਟੀ ਸੈਂਟਰ ਨੂੰ ਟਾਰਗੇਟ ਕਰਨ ਵਾਲੇ ਨਫ਼ਰਤੀ ਅਪਰਾਧਾਂ 'ਤੇ ਸ਼ਿਕੰਜਾ ਕੱਸਣ ਲਈ ਅੱਜ ਹਾਊਸ ਔਫ ਕੌਮਨਜ਼ ਵਿਚ ਹੇਟ ਕ੍ਰਾਈਮ ਬਿੱਲ ਪੇਸ਼ ਕਰ ਦਿੱਤਾ ਹੈ। ਇਸ ਤਹਿਤ ਕ੍ਰਿਮੀਨਲ ਕੋਡ ਵਿਚ 4 ਨਵੇਂ ਅਪਰਾਧਿਕ ਜੁਰਮ ਸ਼ਾਮਲ ਹੋਣਗੇ। ਮੰਤਰੀ ਨੇ ਬਿੱਲ ਬਾਰੇ ਜਾਣਕਾਰੀ ਦਿੰਦੇ ਹੋਏ ਗੁਰਦੁਆਰਿਆਂ ਅਤੇ ਮੰਦਰਾਂ ਨੂੰ ਨਿਸ਼ਾਨਾ ਬਣਾਏ ਜਾਣ ਦਾ ਵੀ ਜ਼ਿਕਰ ਕੀਤਾ ਅਤੇ ਕਿਹਾ ਕਿ ਸ਼ਾਇਦ ਹੀ ਕੋਈ ਕਮਿਊਨਿਟੀ ਹੋਵੇ ਜੋ ਇਸ ਹੇਟ ਹੀਟ ਤੋਂ ਬਚੀ ਹੋਵੇ।

ਫਰੇਜ਼ਰ ਨੇ ਕਿਹਾ ਕਿ ਹਮਾਸ, ਹਿਜ਼ਬੁੱਲਾ ਵਰਗੇ ਅੱਤਵਾਦੀ ਸਮੂਹ ਨਾਲ ਸਬੰਧਤ ਚਿੰਨ੍ਹਾਂ ਅਤੇ ਸਵਾਸਤਿਕ ਝੰਡੇ ਨੂੰ ਨਫ਼ਰਤ ਫੈਲਾਉਣ ਲਈ ਇਸਤੇਮਾਲ ਕਰਨਾ ਕ੍ਰਾਈਮ ਹੋਵੇਗਾ। ਇਸ ਤੋਂ ਇਲਾਵਾ ਪੁਲਿਸ ਨੂੰ ਚਾਰਜਿਜ਼ ਤੋਂ ਪਹਿਲਾਂ ਸੂਬਾਈ ਅਟਾਰਨੀ-ਜਨਰਲ ਤੋਂ ਮਨਜ਼ੂਰੀ ਨਹੀਂ ਲੈਣੀ ਹੋਵੇਗੀ। ਗੌਰਤਲਬ ਹੈ ਕਿ ਪਾਰਲੀਮੈਂਟ ਦੀ ਫਾਲ ਸਿਟਿੰਗ ਦੇ ਸ਼ੁਰੂ ਵਿਚ ਪੇਸ਼ ਹੋਇਆ ਇਹ ਲਿਬਰਲਸ ਸਰਕਾਰ ਦਾ ਵਾਅਦਾ ਕੀਤਾ ਗਿਆ ਪਹਿਲਾ ਵੱਡਾ ਬਿੱਲ ਹੈ। ਫਰੇਜ਼ਰ ਨੇ ਕਿਹਾ ਕਿ ਇਸ ਕਾਨੂੰਨ ਵਿਚ ਨਫ਼ਰਤ ਸੰਬੰਧੀ ਇੱਕ ਖਾਸ ਅਪਰਾਧ ਵੀ ਸ਼ਾਮਲ ਹੈ ਜੋ ਉਦੋਂ ਲਾਗੂ ਕੀਤਾ ਜਾ ਸਕਦਾ ਹੈ ਜਦੋਂ ਕੋਈ ਕ੍ਰਾਈਮ ਖਾਸ ਤੌਰ 'ਤੇ ਪੀੜਤ ਪ੍ਰਤੀ ਨਫ਼ਰਤ ਕਾਰਨ ਕੀਤਾ ਜਾਂਦਾ ਹੈ।