ਲਿਬਰਲ ਪਾਰਟੀ ਨੇ ਸਕਾਰਬਰੋ ਸਾਊਥਵੈਸਟ ਲਈ ਡੋਲੀ ਬੇਗਮ ਨੂੰ ਉਮੀਦਵਾਰ ਕੀਤਾ ਘੋਸ਼ਿਤ

ਕੈਨੇਡਾ ਦੀ ਫੈਡਰਲ ਲਿਬਰਲ ਪਾਰਟੀ ਨੇ ਓਨਟਾਰੀਓ ਦੀ ਸੂਬਾਈ ਰਾਜਨੀਤੀ ਦੇ ਜਾਣੇ-ਪਛਾਣੇ ਚਿਹਰੇ ਅਤੇ ਸੂਬੇ ਵਿਚ ਐਨ.ਡੀ.ਪੀ. ਦੀ ਡਿਪਟੀ ਲੀਡਰ ਡੋਲੀ ਬੇਗਮ ਨੂੰ ਸਕਾਰਬਰੋ ਸਾਊਥ ਵੈਸਟ ਦੀ ਸੰਸਦੀ ਤੋਂ ਆਪਣਾ ਉਮੀਦਵਾਰ ਐਲਾਨਿਆ ਹੈ। ਇਹ ਸੀਟ ਲਿਬਰਲਸ ਦੇ ਲੰਮੇ ਸਮੇਂ ਤੋਂ ਸੰਸਦ ਮੈਂਬਰ ਬਿਲ ਬਲੇਅਰ ਕੋਲ ਸੀ, ਜਿਨ੍ਹਾਂ ਨੂੰ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਯੂ. ਕੇ. ਵਿਚ ਕੈਨੇਡਾ ਦੇ ਹਾਈ ਕਮਿਸ਼ਨਰ ਨਿਯੁਕਤ ਕੀਤਾ ਹੈ। ਉਹ ਇਸ ਸਪਰਿੰਗ ਵਿਚ ਇਹ ਡਿਪਲੋਮੈਟ ਅਹੁਦਾ ਸੰਭਾਲਣਗੇ।

ਬਲੇਅਰ ਦੀ ਸੀਟ 'ਤੇ ਹੋਣ ਵਾਲੀ ਜ਼ਿਮਨੀ ਚੋਣ ਲਈ ਉਤਾਰੀ ਗਈ ਡੋਲੀ ਬੇਗਮ ਨੇ ਲਗਭਗ ਸੱਤ ਸਾਲ ਤੋਂ ਸਕਾਰਬਰੋ ਦੀ ਐਮ.ਐਲ.ਏ. ਵਜੋਂ ਨੁਮਾਇੰਦਗੀ ਕੀਤੀ ਹੈ ਅਤੇ ਹੁਣ ਤੱਕ ਉਹ ਓਨਟਾਰੀਓ ਵਿਚ ਸੂਬਾਈ ਨਿਊ ਡੈਮੋਕ੍ਰੇਟਿਕ ਪਾਰਟੀ ਦੀ ਡਿਪਟੀ ਲੀਡਰ ਵਜੋਂ ਸੇਵਾ ਨਿਭਾ ਰਹੀ ਸੀ।

ਗੌਰਤਲਬ ਹੈ ਕਿ ਇਸ ਤੋਂ ਪਹਿਲਾਂ ਲਿਬਰਲ ਪਾਰਟੀ ਨੇ ਸਾਬਕਾ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਦੀ ਯੂਨੀਵਰਸਿਟੀ-ਰੋਜ਼ਡੇਲ ਰਾਈਡਿੰਗ ਤੋਂ ਟੋਰੌਂਟੋ ਦੀ ਫੈਮਿਲੀ ਡੌਕਟਰ ਡੈਨੀਅਲ ਮਾਰਟਿਨ ਨੂੰ ਉਮੀਦਵਾਰ ਬਣਾਇਆ ਸੀ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਅਜੇ ਤੱਕ ਇਨ੍ਹਾਂ ਦੋਵਾਂ ਹਲਕਿਆਂ ਵਿਚ ਉਪ-ਚੋਣਾਂ ਦੀਆਂ ਤਰੀਕਾਂ ਦਾ ਐਲਾਨ ਨਹੀਂ ਕੀਤਾ ਹੈ।