ਬੀ.ਸੀ. ਭਰ ਵਿਚ ਲਾਈਫਲੈਬਜ਼ ਸੈਂਟਰ ਦੇ ਵਰਕਰਾਂ ਦੀ ਪੜਾਅਵਾਰ ਹੜਤਾਲ ਸ਼ੁਰੂ

ਬੀ.ਸੀ. ਭਰ ਵਿਚ ਲਾਈਫਲੈਬਜ਼ ਸੈਂਟਰ ਦੇ ਵਰਕਰਾਂ ਦੀ ਪੜਾਅਵਾਰ ਹੜਤਾਲ ਸ਼ੁਰੂ ਹੋ ਚੁੱਕੀ ਹੈ। ਹੜਤਾਲ ਦੇ ਪਹਿਲੇ ਦਿਨ ਵੀਰਵਾਰ ਨੂੰ ਲਾਈਫਲੈਬਜ਼ ਦੇ 18 ਸੈਂਟਰ ਬੰਦ ਰਹੇ। ਬੀ.ਸੀ. ਜਨਰਲ ਕਰਮਚਾਰੀ ਯੂਨੀਅਨ ਦੇ ਨੇਤਾਵਾਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਜੇ ਅਮਰੀਕਾ-ਬੇਸਡ ਕੰਪਨੀ ਨਾਲ ਗੱਲਬਾਤ ਜ਼ਰੀਏ ਤਨਖਾਹਾਂ, ਭੱਤਿਆਂ ਅਤੇ ਕੰਮ ਕਰਨ ਦੇ ਹਾਲਾਤ ਦਾ ਮਸਲਾ ਹੱਲ ਨਾ ਹੋਇਆ ਤਾਂ ਵਿਰੋਧ ਪ੍ਰਦਰਸ਼ਨ ਤੇਜ਼ ਕੀਤੇ ਜਾ ਸਕਦੇ ਹਨ।

ਯੂਨੀਅਨ ਦੇ ਪ੍ਰਧਾਨ ਪਾਲ ਫਿੰਚ ਨੇ ਚਿਤਾਵਨੀ ਦਿੱਤੀ ਕਿ ਵਰਕਰਜ਼ 100 ਤੋਂ ਵੱਧ ਸੈਂਟਰ ’ਤੇ ਹੜਤਾਲ ਲਈ ਤਿਆਰ ਹਨ। ਵੈਨਕੂਵਰ ਦੀ ਸਿਟੀਵਿਊ ਲਾਈਫਲੈਬਜ਼ ਦੇ ਬਾਹਰ ਸਮਰਥਕਾਂ ਨੂੰ ਸੰਬੋਧਨ ਵਿਚ ਉਨ੍ਹਾਂ ਕਿਹਾ ਕਿ ਇਹ ਸੰਘਰਸ਼ ਲੜਾਈ ਜਿੱਤਣ ਤੱਕ ਜਾਰੀ ਰਹੇਗਾ।

ਗੌਰਤਲਬ ਹੈ ਕਿ ਇਸ ਪ੍ਰਦਰਸ਼ਨ ਦੀ ਕਾਰਵਾਈ ਵਿਚ ਸੂਬੇ ਭਰ ਦੇ 1,200 ਵਰਕਰ ਸ਼ਾਮਲ ਹਨ। ਲਾਈਫਲੈਬਜ਼ ਬੀ.ਸੀ. ਵਿਚ ਸਭ ਤੋਂ ਵੱਡੀ ਪ੍ਰਾਈਵੇਟ ਮੈਡੀਕਲ ਲੈਬਾਰਟਰੀ ਟੈਸਟਿੰਗ ਪ੍ਰਦਾਤਾ ਹੈ, ਇਸ ਦੀ ਮਾਲਕੀ ਅਮਰੀਕਾ ਬੇਸਡ ਕੰਪਨੀ ਕੁਐਸਟ ਡਾਇਗਨੌਸਟਿਕਸ ਕੋਲ ਹੈ।