ਕੈਨੇਡਾ ਪੋਸਟ ਦੇ ਵਰਕਰਾਂ ਨੇ ਹੜਤਾਲ ਖ਼ਤਮ ਕਰਨ ਦੀ ਬਜਾਏ ਵੀਕੈਂਡ ਤੋਂ ਰੋਟੇਟਿੰਗ ਸਟ੍ਰਾਈਕ ਸ਼ੁਰੂ ਕਰਨ ਦਾ ਕੀਤਾ ਐਲਾਨ

ਕੈਨੇਡਾ ਪੋਸਟ ਦੇ ਲਗਭਗ 55,000 ਪੋਸਟਲ ਵਰਕਰਜ਼ ਦੀ ਨੁਮਾਇੰਦਗੀ ਕਰਦੀ ਯੂਨੀਅਨ ਨੇ ਰਾਸ਼ਟਰ ਪੱਧਰੀ ਹੜਤਾਲ ਖ਼ਤਮ ਕਰਨ ਅਤੇ ਇਸ ਦੀ ਬਜਾਏ ਵੀਕੈਂਡ ਤੋਂ ਰੋਟੇਟਿੰਗ ਸਟ੍ਰਾਈਕ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। ਇਸ ਨਾਲ ਦੇਸ਼ ਦੇ ਜ਼ਿਆਦਾਤਰ ਹਿੱਸਿਆਂ ਵਿਚ ਮੇਲ ਅਤੇ ਪਾਰਸਲ ਡਿਲਿਵਰੀ ਸ਼ਨੀਵਾਰ ਤੋਂ ਮੁੜ ਸ਼ੁਰੂ ਹੋ ਰਹੀ ਹੈ। ਇਹ ਹੜਤਾਲ 25 ਸਤੰਬਰ ਨੂੰ ਉਦੋਂ ਸ਼ੁਰੂ ਹੋਈ ਸੀ ਜਦੋਂ ਫੈਡਰਲ ਸਰਕਾਰ ਨੇ ਕੈਨੇਡਾ ਪੋਸਟ ਦੀਆਂ ਗੰਭੀਰ ਵਿੱਤੀ ਸਮੱਸਿਆਵਾਂ ਨੂੰ ਹੱਲ ਕਰਨ ਲਈ ਵੱਡੇ ਸੁਧਾਰ ਦਾ ਐਲਾਨ ਕੀਤਾ ਸੀ।

ਹਾਲਾਂਕਿ ਮੇਲ ਸੇਵਾ ਮੁੜ ਸ਼ੁਰੂ ਹੋਣ ਵਾਲੀ ਹੈ ਪਰ ਇਹ ਆਮ ਵਾਂਗ ਕੰਮ ਨਹੀਂ ਕਰੇਗੀ। ਯੂਨੀਅਨ ਦੀ ਰਣਨੀਤੀ ਕਾਰਨ ਸੇਵਾ ਵਿਚ ਵਿਘਨ ਪਵੇਗਾ ਕਿਉਂਕਿ ਇੱਕ ਖੇਤਰ ਤੋਂ ਦੂਜੇ ਖੇਤਰ ਵਿਚ ਹੜਤਾਲ ਸ਼ਿਫਟ ਹੁੰਦੀ ਰਹੇਗੀ।

ਕੈਨੇਡੀਅਨ ਯੂਨੀਅਨ ਆਫ਼ ਪੋਸਟਲ ਵਰਕਰਜ਼ ਨੇ ਸੰਕੇਤ ਦਿੱਤਾ ਹੈ ਕਿ ਰੋਟੇਟਿੰਗ ਹੜਤਾਲ ਵਿਚ ਸ਼ਾਮਲ ਹੋਣ ਵਾਲੇ ਸਥਾਨਾਂ ਬਾਰੇ ਲੋਕਲ ਲੋਕਾਂ ਨੂੰ ਉਨ੍ਹਾਂ ਦੀ ਕਾਰਵਾਈ ਦੇ ਸਮੇਂ ਦੇ ਨੇੜੇ ਸੂਚਿਤ ਕੀਤਾ ਜਾਵੇਗਾ। ਇਸ ਕਦਮ ਦਾ ਉਦੇਸ਼ ਨਵੇਂ ਸਮਝੌਤੇ ਲਈ ਕੈਨੇਡਾ ਪੋਸਟ 'ਤੇ ਦਬਾਅ ਬਣਾਏ ਰੱਖਦੇ ਹੋਏ ਮੇਲ ਅਤੇ ਪਾਰਸਲ ਦੀ ਡਿਲਿਵਰੀ ਮੁੜ ਸ਼ੁਰੂ ਕਰਨਾ ਹੈ।