ਸਰੀ ਦੇ ਨਿਊਟਨ ਇਲਾਕੇ ਵਿੱਚ ਬੈਂਕ ਡਾਕੇ ਤੋਂ ਬਾਅਦ ਇੱਕ ਵਿਅਕਤੀ ਗ੍ਰਿਫ਼ਤਾਰ

ਸਰੀ ਦੇ ਨਿਊਟਨ ਇਲਾਕੇ ਵਿਚ ਸੋਮਵਾਰ ਨੂੰ ਇੱਕ ਬੈਂਕ ਵਿਚ ਡਕੈਤੀ ਹੋਈ, ਜਿਸ ਦੇ ਸਬੰਧ ਵਿਚ ਪੁਲਿਸ ਨੇ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਸ ਕਾਰਵਾਈ ਵਿਚ ਰੀਅਲ ਟਾਇਮ ਇੰਟੈਲੀਜੈਂਸ ਸੈਂਟਰ ਦੀ ਭੂਮਿਕਾ ਅਹਿਮ ਰਹੀ, ਜਿਸ ਨੇ ਮੁਲਜ਼ਮ ਦੀ ਲੋਕੇਸ਼ਨ ਟ੍ਰੇਸ ਕਰਨ ਵਿਚ ਮਦਦ ਕੀਤੀ।

ਪੁਲਿਸ ਮੁਤਾਬਕ, ਇਹ ਲੁੱਟ ਦੀ ਵਾਰਦਾਤ ਕਿੰਗ ਜਾਰਜ ਬੁਲੇਵਾਰਡ ਦੇ 7100-ਬਲਾਕ ਸਥਿਤ ਇੱਕ ਬੈਂਕ ਵਿਚ ਸ਼ਾਮ 4 ਵਜੇ ਦੇ ਕਰੀਬ ਵਾਪਰੀ। ਮੁਲਜ਼ਮ ਮੌਕੇ ਤੋਂ ਫਰਾਰ ਹੋ ਗਿਆ ਸੀ ਪਰ ਫਰੰਟਲਾਈਨ ਅਫਸਰ ਨੇ ਉਸ ਨੂੰ 70B ਐਵੇਨਿਊ ਅਤੇ 134 ਸਟ੍ਰੀਟ ਦੇ ਕੋਲੋਂ ਹਿਰਾਸਤ ਵਿਚ ਲੈ ਲਿਆ। ਪੁਲਿਸ ਮੁਤਾਬਕ, ਮੁਲਜ਼ਮ ਕੋਲੋਂ ਕੁਝ ਸਬੂਤ ਵੀ ਬਰਾਮਦ ਕੀਤੇ ਗਏ ਹਨ।

ਫਿਲਹਾਲ ਕ੍ਰਿਮੀਨਲ ਕੋਡ ਤਹਿਤ ਚਾਰਜਿਜ਼ ਲਗਾਏ ਜਾਣੇ ਬਾਕੀ ਹਨ ਅਤੇ ਸ਼ੱਕੀ ਦੀ ਪਛਾਣ ਜਨਤਕ ਨਹੀਂ ਕੀਤੀ ਗਈ ਹੈ, ਨਾ ਹੀ ਉਸ ਵਲੋਂ ਘਟਨਾ ਨੂੰ ਅੰਜ਼ਾਮ ਦੇਣ ਬਾਰੇ ਵਿਸਥਾਰ ਜਾਣਕਾਰੀ ਦਿੱਤੀ ਗਈ ਹੈ। ਸਰੀ ਪੁਲਿਸ ਸਰਵਿਸ ਦਾ ਕਹਿਣਾ ਸੀ ਕਿ ਮੁਲਜ਼ਮ ਅਜੇ ਹਿਰਾਸਤ ਵਿਚ ਹੈ ਅਤੇ ਹੋਰ ਸਬੂਤ ਜੁਟਾਉਣ ਲਈ ਲੋਕਾਂ ਤੋਂ ਮਦਦ ਮੰਗੀ ਗਈ ਹੈ।